Luk 15:1-16

¹Abaŋəs dut kɔ afum aciya ŋalɔtərnɛ Yesu kəkɔ-cəŋkəl kɔ.

²AFarisi kɔ acicəs a sariyɛ ŋac-cɔpɛnɛ: «Fum wəkawɛ eŋselɛnɛ aciya, pəwosɛ kədi yeri kɔ ŋa.»

³Mba kɔ Yesu oloku ŋa capafɔ ncɛ:

⁴«Nəna afum akaŋɛ dacɔ, anɔ ɔŋyɔ ŋkesiya tasar tin (100), a ŋin ŋɔsɔlər kɔ, a pəsak yɔkɔ 99 dətɛgbɛrɛ kəkɔ-tɛn ŋin ŋɔkɔ ŋɔsɔlər kɔ mɔ, haŋ pənəŋk ŋi-ɛ?

⁵Kɔ wəkayi ɔŋkɔ pənəŋk ŋi-ɛ, pəgbaŋnɛ ŋi amera ŋobotu disrɛ,

⁶ɔŋc-kɔna-bɛrɛ nde ndɔrɔn, ewe anapa ɔn kɔ andɛ ɔn nde ndɔrɔn, pəloku ŋa: ‹Nəwoləs kɔ ina, bawo inəŋk aŋkesiya ŋem ŋɔkɔ ŋɛnasɔlər’im mɔ.›

⁷Ic-lok’un: Pəbotu pɔŋkɔ-yi darɛŋc teta fum wəkin nwɛ ɔŋkɔ-səkpər amera pəcəmɛ dɔpɔ dolompu darəŋ mɔ, pətas teta afum 99 aŋɛ ŋantɔmar kəsəkpər mera, bawo ŋalomp mɔ.»

⁸«Kɔ pəyɔnɛ fɛ ti-ɛ, wəran wəre ɔŋyɔ pəsam gbəleŋ wəco, a gbəleŋ bin bɔsɔlər kɔ ta omot lamp, ta ɛfɛŋ kəlɔ, ta ɛntɛn pi bel-bel, haŋ pənəŋk pi mɔ?

⁹Kɔ wəran nwɛ ɛnəŋk pəsam gbəleŋ mpɛ-ɛ, eŋwe anapa ɔn, kɔ andɛ ɔn, pəloku ŋa: ‹Nəwoləs kɔ ina bawo inəŋk pəsam gbəleŋ mpɛ pɛnasɔlər’im mɔ.›

¹⁰Ic-lok’un, pəbotu peyi mɛlɛkɛe a Kanu dacɔ teta fum wəciya wəkin gboŋ nwɛ ɛŋsəkpər amera pəcəmɛ pəlompu darəŋ mɔ.

¹¹Kɔ Yesu oloku sɔ: «Fum wəlɔma ɛnayɔ awut arkun mɛrəŋ.

¹²Kɔ wəkɔ ɛfɛtɛ mɔ, oloku kas: ‹Papa məsɔŋ’im da pəmar idesɔtɔ kɛ kam mɔ.› Kɔ kas eyer daka dɔn awut ɔn akaŋɛ mɛrəŋ dacɔ.

¹³Ntɛ mataka mepic meŋcepər mɔ, kɔ wan wəfɛt ɛŋcaməs daka dɔkɔ ɛnasɔtɔ mɔ fəp. K’osumpər dɔpɔ k’ɔŋkɔ pəbɔlɛ, atɔf ŋocuru. Nde ɛnakɔ pəyi yama-yama pəc-ləsər-ləsər daka dɔkɔ ɛnayɔ mɔ.

¹⁴Ntɛ wan nwɛ elip kədi daka dɔn mɔ, kɔ dor dɔpɔŋ dɛmbɛrɛ atɔf ŋaŋɔkɔ ɛnayi mɔ, kɔ ca yoŋcop kəbut kɔ.

¹⁵K’ɔŋkɔ pəyi nda fum wəlɔma wəka atɔf ŋaŋɔkɔ, wəkɔ ɛnasɔŋ kɔ kəkɛk ka sɔp yɔn mɔ.

¹⁶Wan nwɛ pəfaŋ kədi yeri ya sɔp, mba ali fum ɛnasɔŋ fɛ kɔ yi.