Luukaṉu 15:1-16

¹Yaṉangu tjuṯaya tjungurringangi Yiitjula, palumpa wangka kulilkitja, kamantaku mani mantjilpayi tjuṯa, Katutjaku ngurrpa tjuṯaṯarra.

²Paratji tjuṯa, Muutjaku wangka nintilpayi tjuṯaṯarraya Yiitjuku pikarringkula wangkarra waṉingiya yalatji, “Wati ngaatjanya kuya. Paluru Katutjaku ngurrpa tjuṯangka nyinarra ngalkupayi.”

³Palulanguru Yiitjulu tjananya yara watjaṉu yalatji,

⁴“Tjiipiku mayutjungku tjiipi tjuṯa, yantaṯa kutju, kanyinmalpa. Tjiipi kutju yankula kawaḻirringanyingka, yaalytjinku tjiipiku mayutju paluru? Yankula tjiipi palumpa ngurririnamalpa. Tjiipi palunya tjuṯangku nayintiyi nayinangku ngalkulinanyingka, wantirra tjiipi kutjuku yankula ngurririnamalpa. Rawalingku ngurririnkula nyakula yunyparringkula mantjilku.

⁵Mantjira tjaḻira ngurrakutu katiku.

⁶Katirra palumpa walytja tjuṯa tjananya wati paluru tjungura tjakultjunku yalatji, ‘Tjungulaka yunyparringkula nyinama!, tjiipi kutjutju yankula kawaḻirringutja ngayulu ngurririnkula mantjiṉutjangka.’ Yalatjiya tjungu yunyparringkula nyinaku.

⁷Tjiipiku mayutju, kutjupa tjuṯaṯarra tjungu yunyparrinytja nguwanpa, Katutjanya ilkari ngurrara tjuṯaṯarraya tjungu puntura yunyparriku, yaṉangu kutju Katutjaku ngurrpa nyinarra tjukarurrulpi Katutjaku nyinanytjala. Katutjaku walytja kutjupa tjuṯaku, tjukarurru nyinapayi tjuṯaku, Katutjanya tjanampa yunypa nyinanyi, tjiipiku mayutju tjiipi nayintiyi nayinaku yunypa nyinanytja nguwanpa.”

⁸Yara kutjupa tjananya Yiitjulu watjaṉu, “Kungka kutju, pipitiyi tala tiinpalatjarra nyinaku. Pipitiyi tala kutju palumpara waḻpangku katirra kawaḻinku waaḻangka yunngu. Kungka paluru yaalytjinku? Tuutji mantjira tilira waaḻawana purinytju ngurrilku, pipitiyi tala palunya mantjilkitjangku. Kutu ngurrira ngurrira nyakula mantjilku.

⁹Pipitiyi tala palunya mantjira palumpa walytja tjuṯa tjungura tjananya tjakultjunku, ‘Tjungula yunyparrirra nyinama!, pipitiyi tala kutjuṉa ngurrira mantjiṉutjangka.’ Yalatjiya tjungu yunyparringkula nyinaku.

¹⁰Kungka paluru, palumpa walytja tjuṯaṯarraya tjungu yunyparrinytja nguwanpa, Katutjanya ilkari ngurrara tjuṯaṯarraya tjungu puntura yunyparriku, yaṉangu kutju Katutjaku ngurrpa nyinarra tjukarurrulpi Katutjaku nyinanytjala.”

¹¹Yara kutjupa Yiitjulu tjananya watjaṉu, “Paapangku pulanya katja kutjarra kanyilku.

¹²Katja ngaṉṯitjangku paapa tjapilku yalatji, ‘Paapa. Nyuntu tjiḻpirringkula ngurra tiṉa kutu kanyiṉi. Aapa tjalamilara mani mantjira ngayunya yuwaṉi!’ Palulanguru paapa paluru puṯu kuliṉangi ‘Ngayuku katjangku wiyaṉi yalatji tjapintjaku. Ngayulu wiyarringanyingka kutju katja kutjarrangku ngurra tjalamilara ngayuku mani mantjintjaku.’ Yalatji puṯu kulira, kala paluru ngurra aapa tjalamilara mani tiṉa palumpa katja ngaṉṯitjakulpira yungku.

¹³Palulanguru katja ngaṉṯitja paluru mani tiṉatjarra ngurrangka rawawiya nyinarra, yulytja mani mantjira payikingka tjunkula waṉma yanku ngurra kutjupakutu. Ngurra palula palumpa maḻpa tjuṯangku tjungungku wayina tjikira kuya palyara palumpa mani wiyalku.

¹⁴Yalatji katja ngaṉṯitja paluru wiyawana nyinarra palumpa mani wiyarriku. Ngurra palula tjanampa kapiwiyarriku. Palulanguru mangarri tjanampa palunya ngurrara tjuṯaku wiimarriku. Katja ngaṉṯitja paluru puṯu kulinmalpa mangarri ngalkukitjangku.”

¹⁵“Palulanguru pikipikiku mayutjukutu paluru yankula, tjapilku waarrkarrikitjangku. Mayutju paluru watjalku katja ngaṉṯitja palunya, pikipiki tjuṯa yaṉṯayaṉṯantjaku.

¹⁶Waarrkana kutjupangku pikipiki tjuṯaku mangarri kuyakuya katirra tjunku. Paluru wiya katja ngaṉṯitja mangarri palunya yungkuku. Yalatji watjalku, ‘Wiya. Mangarri ngaatja pikipiki tjuṯaku kutju, wiya nyuntupanta.’ Pikipiki tjuṯangkuya mangarri kuyakuya ngalkuṉingka, katja ngaṉṯitja paluru nyakula yanymarriku mangarri ngalkukitja. Mangarriku paluru puṯu tjapilku.