Luk 15:1-16

¹Takis tilipqilip aka megeri aka siŋgisöndok ambazip tosatŋi mi jesöŋgöŋan Jisösgö Buŋaŋi mötpingö kaget.

²Mewö kagetmö, Farisi aka Köna keugö böhi yeŋön Jisösgöra uruŋinan böliiga irikuruk keu kewö jiget, “Azi miaŋön siŋgisöndok ambazip eŋgimemba yembuk tata nene neza.”

³Mewö jigeraŋgöra Jisösnöŋ dopkeu kun kewö jii mötket,

⁴“Eŋgöreŋök kungö lamaurupŋi 100 malgetka mieŋgöreŋök kunŋan sohoba jaŋjuŋ aniga toŋan denöwö akŋa? Yaŋön mönö 99 mi gölme qararaŋkölkölŋe eŋgömosöta anda mohot jaŋjuŋ anöhi, miaŋgö jaruba anda mala miwikŋaiiga teköma.

⁵Miwikŋaiba urusösöŋgai aka awötŋe ala kama.

⁶Mire kaba alaurupŋi aka tosatŋi kösutŋe malmei, mi eŋgoholi tokogetka kewö jii mötme, ‘Lamani sohoyöhi, mi lök miwikŋaizalaŋgöra mönö nömbuk sösöŋgai akin’

⁷Nöŋön kewö jibi mötme: Miaŋgö dop siŋgisöndok azi mohotŋan uruŋi meleŋmawi, yaŋgöra Suep mire sösöŋgai ketaŋi asuhuma. Ambazip 99 nanŋine jeŋine solanŋi diŋdiŋi aka uruŋini meleŋbingö qahö möta maljei, yeŋgöra sösöŋgai mewöŋi qahö asuhuma.” Mewö.

⁸“Mewöyök ambi kunŋan silwö moneŋ kötŋi 10 memba maliga mieŋgöreŋök mohokŋan geba sohoiga denöwö akŋa? Yaŋön mönö kiwa ohotiriba kapaŋ köla miri usuŋda jaruma. Jaruba mala miwikŋaiiga teköma.

⁹Mi miwikŋaiba ambi alaurupŋi aka ambi tosatŋi kösutŋe maljei, mi eŋgoholi tokogetka kewö jii mötme, ‘Nöŋgöreŋ soujeŋi mohotŋan sohoyöhi, mi miwikŋaizalaŋgöra mönö nömbuk sösöŋgai aki.’

¹⁰Miaŋgö dop nöŋön kewö jibi mötme: Siŋgisöndok ambazip kunŋan uruŋi meleŋniga Anutugö garataurupŋi yeŋön miaŋgöra sösöŋgai öŋgöŋgöŋi akŋe.” Mewö.

¹¹Jisösnöŋ toroqeba kewö jiyök, “Azi kungö nahönyahötŋi yahöt malohot.

¹²Munŋan iwiŋaŋgöra kewö jiyök, ‘Iwini, gi mönö moneŋ sukinapki mendeŋda nöŋgö bahöŋi niŋgiman.’ Mewö jiiga öröyuaiŋi pakpak dopŋire mendeŋda etkiyök.

¹³Mi etkiiga nahönŋi moröŋan sömaŋi yahöt karöbut mala inap yuaiŋi pakpak mi kölölohoba memba kantri kungen anök. Miaŋgöreŋ anda nanŋi imbi-imbi aka köna ketaŋi ambi yembuk kiam bau ewö söŋaup malmal mala moneŋ inapŋi gil teköyök.

¹⁴“Yuai pakpak gil teköiga bödi (buörö) ketaŋi asuhuba gölme pakpak mi dop kölök. Yaŋön nalö miaŋgöreŋ könahiba öngöpŋi aka osiyök.

¹⁵Osiba kantri miaŋgö toŋi kungöreŋ anda nupköra qesim waŋgiiga melaii yaŋgö bau selŋe geba bau galömŋina malök.

¹⁶Miaŋgöreŋ mali bau yeŋön sokop kötŋi neget eka ‘Ölöp mi nembi gölömni dop kölbawak,’ jiyökmö, mi mewöyök kunŋan qahö waŋgiyök.