لُكِ 13:14-31

¹⁴كْنْ عِسَ تٌ عَ رَيَلَنشِ مَلَبُ لْشْي نّ، سَلِدٍ شُنمَتِ نَشَ شْنْ عَ مَ، عَ عَ قَلَ حَمَ بّ، «شِ سٍننِ نَن نَ عَ دَشَ مِشِ شَ وَلِ نَشَن كُي. وٌ شَ قَ مَرَيَلَنيِ قٍندٍ نَ لْشْييٍ نّ، كْنْ وٌ نَشَ قَ مَلَبُ لْشْي تَن مَ.»

¹⁵مَرِفِ نَشَ عَ يَابِ، «وٌ تَن قِلَنكَقُييٍ! مَلَبُ لْشْي مَ، وٌ بِرِن مُ وٌ شَ نِنفٍ شَ نَ مُ وٌ شَ سٌقَلٍ قُلُنمَ شّ عَ شِرِدٍ، وٌ عَ شَنِن يٍ مِندٍ؟

¹⁶عِبُرَهِمَ شَ دِ نَن يِ فِنّ رَ، كْنْ سٍنتَنّ بَرَ عَ شِرِ كَبِ حّ قُ نُن سٌلٌمَسَشَن. عَ مُ لَنمَ ﭑ شَ عَ قَن قُلُن مَلَبُ لْشْي مَ؟»

¹⁷عَ تٌ نَ قَلَ، عَ يَشُي بِرِن نَشَ يَافِ، كْنْ حَمَ تَن نَشَ سّيوَ عَ شَ كَابَنَكٌ قٍ بِرِن نَ.

¹⁸عِسَ مَن نَشَ عَ مَسٍن عٍ بّ، «عَلَ شَ مَنفّيَ مَنِيَشِ مُنسٍ رَ؟ ﭑ نْمَ عَ مِسَالِدٍ تَلِ وْيّنيِ مُندُن نَ؟

¹⁹عَ لُشِ نّ عَلْ كٌندٍ شْرِ شُرُدِ شّمّ نَشَن سِ عَ شَ بْشِ مَ. عَ نَشَ تٍ، عَ قِندِ وُرِ بِلِ رَ، شْنِيٍ قَ عٍ تّي سَ عَ كْن نَ.»

²⁰عَ مَن نَشَ عَ مَسٍن، «ﭑ شَ عَلَ شَ مَنفّيَ مِسَالِ مُنسٍ رَ؟

²¹عَ لُشِ نّ عَلْ لّبِنِ، فِنّ نَشَن سَ قَرِن بُسَلِ تَفِ شُن مَ، نَ قَ قَرِن بِرِن نَتٍ.»

²²عِسَ نُ سِفَمَ كَوَندِ تِ رَ تَايٍ بِرِن كُي، عَ شُنفبٍ نُن عَ شُرِ. نَ بِرِن، عَ نُ نَ دَرِ سَلَمُ كِرَ نَن شْن.

²³مِشِ ندٍ نَشَ عَ مَشْرِن، «مَرِفِ، نْندِ نَن عَ رَ، عَ مِشِ فبٍفبٍ مُ كِسِمَ؟» عَ نَشَ عَ يَابِ،

²⁴«وٌ كَتَ وٌ شَ سٌ نَادّ عِشُتُشِ نَن نَ، بَرِ مَ ﭑ شَ عَ قَلَ وٌ بّ، مِشِ وُيَشِ كَتَمَ نّ سٌدٍ نَا، كْنْ عٍ مُ نْمَ.

²⁵عَ وَشَتِ عَ لِمَ بَنشِ كَنيِ كٍلِمَ نّ عَ نَادّ بَلَن. وٌ تَن قَمَ نّ تِدٍ تَندٍ وٌ نُ نَادّ كْنكْن نَ، وٌ عَ قَلَ، ‹مَرِفِ، نَادّ رَبِ مُشُ بّ.› نَ تّمُي، عَ وٌ يَابِمَ نّ، ‹ﭑ مُ وٌ كٌلٌن، ﭑ مُ وٌ كٍلِدٍ كٌلٌن.›

²⁶وٌ مَن عَ قَلَمَ نّ عَ بّ، ‹عِ مِشِيٍ شَرَنشِ مُشُ شْنيِ نّ، وٌن بِرِن نَن وٌن دّفٍشِ، وٌن بِرِن نَن وٌن مِن.›

²⁷كْنْ عَ وٌ يَابِمَ نّ، ‹ﭑ شَ عَ قَلَ وٌ بّ، ﭑ مُ وٌ كٌلٌن، ﭑ مُ وٌ كٍلِدٍ كٌلٌن. وٌ كٍلِ ﭑ يَ عِ، وٌ تَن قٍ كٌبِ رَبَيٍ!›

²⁸عِبُرَهِمَ، عِسِيَفَ، يَشُبَ، نُن نَمِحْنمّ بِرِن، وٌ عٍ تٌمَ نّ عَلَ شْنيِ عَرِيَننَ، كْنْ وٌ تَن نَمِنِمَ تَندٍ، وَ نُن حِنيِ رَشِنيِ نَ دّننَشّ.

²⁹مِشِيٍ كٍلِمَ سٌفٍتٍدٍ نُن سٌفٍفٌرٌدٍ، عٍ كٍلِ كْولَ نُن يِرٍقَنيِ بِرِ، عٍ عٍ دّفٍ عَلَ شَ مَنفّيَ نِينِ بُن مَ.

³⁰نَ كُي، شَنبِرَتِيٍ قِندِ مَ نّ يَرٍرَتِيٍ رَ، يَرٍرَتِيٍ قَن قِندِ شَنبِرَتِيٍ رَ.»

³¹نَ وَشَتِ مَ، قَرِ سّنِ ندٍيٍ نَشَ قَ عِسَ شْن، عٍ عَ قَلَ عَ بّ، «عِ شَ كٍلِ بٍ. سِفَ يِرٍ فبّتّ، بَرِ مَ هٍرٌدٍ وَ مَ عِ قَشَقٍ.»