Luka 13:14-31

¹⁴Kɔni salibon kuntii ka wo bɛɛ lakɔrɔsi ka diminya. A monɛra Isa ma ka a masɔrɔn a ka lakɛndɛyali kɛ Ɲɔɲɔn lon. Kuntii wulira ka a fɔ jama yɛ ko: «Tele wɔɔrɔ ye an bolo ka baara kɛ. Ai ye na kɛndɛya ɲinin tele wɔɔrɔ wo kɔrɔ. Ai kana na Ɲɔɲɔn lon fewu!»

¹⁵Maari ka salibon kuntii jabi: «Ai ye filankafuilu le ri. I ɲa lɔ! Ni nisi wala fali kɛra ai bolo, ai tɛ wa ie furɛn ka ie mayɛlɛman ka ie lamin Ɲɔɲɔn lon wa?

¹⁶Ni ai ye wo kɛla, a ye di? Muso ɲin ye Iburahima bɔnsɔn de ri. Setana ra a sidi jankarɔ la kɛbi san tan ni seyin. N ma kan ka wo furɛn ka a lakɛndɛya Ɲɔɲɔn lon wa?»

¹⁷Wo jabili ka Isa juuilu bɛɛ maloya. Kɔni jama bɛɛ sewara Isa la kosɛbɛ, ka a masɔrɔn a tɛrɛ ye kabannako bailu kɛla.

¹⁸Wo rɔ Isa ka ɲininkali kɛ ko: «Alla la mansaya ni nfen mununni? N di se a ni nfen lala a ɲɔɔn ma?

¹⁹Alla la mansaya ye iko sɛbɛni fira kisɛ. Cɛ do ka wo ta ka wa a lan a la nako rɔ. Kisɛ wo fɛrɛnda, ka bonya ka kɛ jiri ju ri. Kɔnɔilu ka ie ɲaan la jiri wo bolonilu la.»

²⁰Isa ka ɲininkali kɛ ko: «N ye Alla la mansaya lala nfen ma ikɔ tuun?

²¹A ye iko lɛbɛn. Ni muso ka wo ta ka dooni kɛ farɛni muu siyaman dɔ, a ri farɛni muu bɛɛ funu.»

²²Wo kɔ, Isa watɔla Jerusalɛmu, a tɛrɛ ye mɔɔilu karanna sila la so bailu ni so misɛnnilu la.

²³Do ka Isa maɲininka ko: «Maari, mɔɔ gbɛnsɛni ri kisi wa?» Isa ka ie jabi:

²⁴«Ai ye iraja ka don da doomanin na. Ka a masɔrɔn n di a fɔ ai ɲana, mɔɔ siyaman di don diya ɲinin ka kaɲa.

²⁵Maari, mɛn ye bontii ri, ni a wulira ka bon da latuun, ai ri to kɛnɛ ma. Ai ri da makonkon ka a fɔ ko: ‹Maari, i ye da laka an yɛ.› Bontii ri jabili kɛ ko: ‹N ma a lɔn i bɔni yɔrɔ mɛn dɔ.›

²⁶Ai ri a fɔ ko: ‹Maari, an bɛɛ ka damunun kɛ ka an min yɔrɔ kelen. I ka an karan an na soilu la.›

²⁷Maari ri a fɔ ai yɛ ko: ‹Ai kojuukɛlailu, n ma ai lɔn, n ma ai bɔ diya lɔn. Ai ye bɔ yan!›

²⁸«Wo lon, ai wa Iburahima ni Isiyaka ni Yakuba ni nabiɲumailu bɛɛ yen Alla la mansaya rɔ, ka a tɛrɛn ai lafilini kɔkan. Ai ri kasi ka mɔnɛ fo ka ai ɲin makin.

²⁹Mɔɔilu ri bɔ dunuɲa fan bɛɛ rɔ ka na isii Alla la mansaya rɔ ka damunun kɛ.

³⁰Nba, doilu ye kɔmamɔɔilu ri bi, mɛnilu ri kɛ ɲɛmɔɔilu ri sini. Doilu fanan ye ɲɛmɔɔilu ri bi, mɛnilu ri kɛ kɔmamɔɔilu ri sini.»

³¹Wo waati kelen, Farisi doilu nara Isa lali ko: «I ye yan bila ka wa yɔrɔ gbɛrɛ rɔ, baa Mansa Herodi ye i faa ko rɔ.»