Luka 13:14-31

¹⁴Sunago tanuagana nuana i baaea paana ede Iesu asubena sabate eai i abi hemauri, ia abo arinana i heuio, i ribalau tatao aridi eai, i ene, “Asubena haligigi‐esega tatao se paisoaidi: arinai se laoma bena se mauri: sabate asubenana eai nige’e.”

¹⁵Guiau ia arinana i heuio i ene, “Oa tauboraborasom, sabate asubenana eai gamagarimiu emi bulumakau, e emi asini edi numa eai au eairidi, eo au laedi goila bena se nom wa?

¹⁶Eo teina sine ta hinage ia Aberahama tubuna esau, Satani ia i auaui, borimai saudoudoi‐haligigi‐haiona, asubena sabate eai ana auau abo se eairigabaei, e nige’e?”

¹⁷Wau riba wa i ribaedi, abo ana papate se taumaeamaea: na tatao gamagaridi se kode ariri paana ginauri lolololodi gamagaridi i ginauridi.

¹⁸Ia abo i ene, “Eaubada ena basileia doha saha? Saha abo arinai ea heaheasoniei?

¹⁹Ia doha hinage sinapi tumana esau, tau esau ie abi, i hesuru ena oea eai; abo ie ini abo i hemala oeagi lailai; malagaibu manudi abo se toalau lagana eai.”

²⁰Eo i ribauio hinage i ene, “Saha arinai Eaubada ena basileia abo ea heaheasoniei?

²¹Ia doha hinage yeast sine esau ie abi falawa nonoi haiona boeadi eai i toreyamui, e abotai abo i sese ohi.”

²²Eanua lailaidi eo eanua gagiridi abo i baeawaidi, i lauheataedi, ie lau Ierusalema dobilana eai.

²³Tau esau i ribalau ia arinai, i ene, “Guiau e, tatao eseesegadi mo abo se mauri?” Ie ribalau aridi eai, i ene.

²⁴“Adidirimiu au abi, abo au lulagelau dobila gagirina arinai: paana ea heribamiu ta tatao gamagaridi bena se lulagelau, abina nige se ata.

²⁵Ena numa tanuaga i toro’o, dobila i guduyao, eo omi au totoro murimuri eai dobila eai au ipeipesi, au ene, ‘Guiau e, Guiau e, dobila u soeama:’ ia abo arinamiu i heuio, i ribalaowa arimiu eai, i ene, ‘Omi aidobu, ea hekaumiu.’

²⁶Omi abo au riba, au ene, ‘Ai aiai, eo ai ainom matam eai, ema baubau eai u lauheata wa.’

²⁷Ia abo i ene, ‘Ea heribamiu ta, ea ’ne, Emi abalaoma nige ea nuatui; au laugabaegu, omi gamagarimiu laulau baaea tauabidi.’

²⁸Metai abo se doudou, eo moadi se taburuyahisidi, huiana ne Aberahama, eo Isaako, eo Iakobo eo peroveta gamagaridi, Eaubada ena basileia eai abo au itadi, omi mo abo se aiduiemiu murimuri eai.

²⁹Isi headi teha aruabu, eo teha lalasi, teha bauri, eo teha eawana aridi eai se tupagogoma, eo se bawabigabiga Eaubada ena basileia eai.

³⁰Isi headi taumurimurita abo se bagubaguna, eo isi headi taubagubaguna abo se murimurita.”

³¹Nei asubenana ne, Parisea, tataodi headi se laoma, se ribalau ia arinai si ene, “U lau udoi hari tupo eai: paana Heroda bena i unuim.”