Lucas 13:14-31

¹⁴Meneng ontò neopal se obanen te simbahan so aldaw te peg-etod se pegpegolì i Jesus te bayi sìyan. Yan se doun te minikagi sikandin diyà te kedita te otaw kidoen, “Kelikit te simana, enem se aldaw mepakay megterbaho se otaw, aw yan se aldaw mepakay aw kegolian kaw. Meneng eked kepakay aw seini, so aldaw te peg-etod.”

¹⁵Minikagi si Jesus diyà kandin, “Tay law. Eden niyo aw egpenimanem kaw. Pengkey aldaw te peg-etod, gayed niyo eg-elinen se baka aw kodà niyo, aw eg-ibingen niyo dan doton te wayeg amon ipeinem niyo.

¹⁶Aw mepakay tebangan se ayam-ayam te aldaw te peg-etod, mepakay heman aw kegolian se bayi seini sebad bowad-bowad i Abraham aw impeeleg i Satanas te sempolò teg walo se omay. Keilangan tebangan sikandin pengkey aldaw te peg-etod.”

¹⁷Peg-ikagi din kenyan, ontò neyàyà se kedita dan migpoon kandin. Meneng ontò neluba se kedita te otaw so medita se kepelahan eg-inangen din.

¹⁸Nayan, minikagi heman si Jesus, “Meg-indan a den kenyo te tegdeyanan tepad te peglowan te Timanem.

¹⁹Iling iyan te ontò deitek benì intanem te otaw kidoen te pawà din. Timobò iyan aw timilles lamig neinang ontò dakel kayo, aw migsalag se manok kidoen.”

²⁰Minikagi heman sikandin, “Seini se doma tegdeyanan tepad te peglowan te Timanem.

²¹Iling iyan te yist, so aw isanged iyan diyà te dakel arina, lomebag se kedakel niyan.”

²²Pegpesalo i Jesus doton te Jerusalem, minapit sikandin kidoen te teg sebad-sebad lonsod inokitan din amon megtoladà.

²³Doen otaw mig-insà kandin, kagi din, “Sir, pilabok lay se otaw mekelowà lekat te salà?” Timaba si Jesus,

²⁴“Pegpekagsen kaw mokit te lelebangan mesigpit. Penenalan kaw kanak. Medita se otaw meibeg mokit kidoen pesalo doton te peglowan te Timanem te modi aldaw, meneng eked dan peopi.

²⁵Aw megtakep se tig-apò te balay, pengkey tomawal kaw doton te lowà, eked kaw din peopi. Pengkey mikagi kaw, ‘Sir, owangi bag se tetakep nikaw.’ Meneng tomaba sikandin, ‘Wedà ko ketegahi aw kenan kaw lekat.’

²⁶Mikagi kaw heman, ‘Meneng kimaen kay doma no, aw migtoladà ka heman kidoen te lonsod day.’

²⁷Meneng mikagi sikandin, ‘Wedà ko ketegahi aw kenan kaw lekat. Kesayo kaw, kedita niyo eg-inang te medaet.’

²⁸Aw domateng se aldaw te peglowan te Timanem, ontò kaw megkelag aw megyangget-yangget se ngipen niyo tandà te kegemakan niyo, so kitaen niyo si Abraham, aw si Isaac, aw si Jacob, aw kedita te telekeliwat te kagi te Timanem gebii impeawop din. Meneng sikiyo se ipekesayo aw eked kaw peopi.

²⁹Medita se otaw domateng lekat te kedita te ogpeanan te keneyonan, pengkey kenà dan Judiyo, aw ipeakop dan diyà te peglowan te Timanem.

³⁰Na, doen menge otaw medanà songkani, meneng meinang dan melangkaw kidoen te peglowan te Timanem. Doen heman menge otaw melangkaw songkani, meneng meinang dan kwani medanà.”

³¹Nayan, doen menge Parisiyo dimoton ki Jesus, aw minikagi dan diyà kandin, “Kesayo ka den lekat dini, so ibeg ekon i Herod imetayan ka.”