Luk 13:14-31

¹⁴Mba kɔ pəntɛlɛ wəbɛ wəka dəkəcəpəs dadɔkɔ, ntɛ Yesu ɛnataməs wəran wəkakɔ simiti, dɔsɔk da kəŋesəm mɔ, kɔ wəbɛ nwɛ oloku afum: «Mata camət-tin meyi mmɛ pəmar pac-bəc mɔ, nəder nətɛn kətaməsnɛ mata mamɔkɔ disrɛ, mba ta nəder simiti, dɔsɔk da kəŋesəm.»

¹⁵Kɔ Yesu oloku kɔ ntɛ: «Nəna abaŋɛnɛ dofum: Simiti, dɔsɔk da kəŋesəm, anɔ ɔntɔgbeki wana wɔn, kɔ pəyɔnɛ fɛ ti-ɛ, sɔfale sɔn pəkekərɛ kəkɔ-mun-ɛ?

¹⁶A wəran nwɛ owur dokom da Abraham, a kɔ Sentani səsumpər səkot kəyɛfɛ meren wəco kɔ camət-maas mɔ, pəmar fɛ pasikəli kɔ bənda yayɔkɔ simiti, dɔsɔk da kəŋesəm ba?»

¹⁷Yesu kəloku moloku mamɔkɔ, kɔ tɔsɔŋɛ ater ɔn fəp kəlapərnɛ; mba pənabɔt kənay fəp, mɔyɔ mɔpɔŋ mamɔkɔ Yesu ɔŋc-yɔ mɔ.

¹⁸Kɔ Yesu oloku sɔ: «Ake dɛbɛ da Kanu dowurɛnɛ-ɛ? Ak’ indetubcɛnɛ di-ɛ?

¹⁹Tɛŋgbɛn tɛfɛt ntɛ fum ɛlɛk, pələm dalɛ dɔn disrɛ mɔ. Tɛŋgbɛn tatɔkɔ topoŋ, pɔyɔnɛ kətɔk kəpɔŋ, bɛmp yeder yɔlɔ wara wawɔkɔ kəroŋ mɔ.»

²⁰Kɔ Yesu oloku sɔ: «Ak’ indetubcɛnɛ dɛbɛ da Kanu-ɛ?

²¹Dɛbɛ da Kanu dowurɛnɛ kɔ lebin ndɛ wəran ɛŋlɛk pəbɛr kəcom nkɛ ɛnalompəs kɔ abek ŋa farin dacɔ mɔ, a kɔ kəcom kaŋkɔ kəmpɛ fəp mɔ.»

²²Ntɛ Yesu ɛŋcali sədare səfɛt kɔ səpɔŋ kəkɔ ka Yerusalɛm mɔ, pəc-təksɛnɛ sɔ afum.

²³Kɔ fum wəlɔma eyif kɔ: «Wətəksɛ, afum apic ŋɔ Kanu kəndekɔ-yac ba?» Kɔ Yesu oloku ŋa:

²⁴«Nəna sɔ nəsɛp nədekɔ nəbɛrɛ dəkəbɛrɛ dɛwɛkɛnɛ dadɔkɔ, bawo ic-lok’un: Afum alarəm ŋandesɛp kəbɛrɛ ka di, mba ŋafɔdekɔ-tam.»

²⁵«Kɔ wəka kəlɔ endekɔ-yɛfɛ pəcaŋ kumba, nəna aŋɛ nəŋyi doru mɔ, nədeyɛfɛ kəsut-sut kumba, nəc-loku: ‹Wətəksɛ! Məgbitɛ su!› Tɛm tatɔkɔ endekulɛ nu: ‹Iŋcərɛ fɛ kəca nkɛ nəyɛfɛ mɔ!›

²⁶Tɛm tatɔkɔ tɔ nəndekɔ-cop kəloku: ‹Sənadi yeri, səmun kɔ məna, məc-təksɛ nde mirit mɔpɔŋ ma dare dosu.›

²⁷Nkɔn pəc-lok’un, ‹Iŋcərɛ fɛ aka nde nəyɔnɛ mɔ! Nəbɔl’em day, nəna akaŋɛ nəŋyɔ mes mɛlɛc mɔ!›

²⁸Difɔ afum ŋandekɔ-bok, ŋac-ŋaŋərɛnɛ sek, kɔ nəŋkɔnəŋk Abraham, Isiyaka, Yakuba kɔ adəŋk a Kanu fəp dɛbɛ da Kanu dəntɔf, a paləm nəna dabaŋka-ɛ.

²⁹Afum ŋandekɔ-yɛfɛ kəca nkɛ dec dɛmpɛ kɔ nkɛ dec dɛŋkalɛ mɔ, kəca kətɔt, kɔ kəmerya, ŋader ŋandɛ dɛmɛsa nde dɛbɛ da Kanu dəntɔf.

³⁰Tɛm tatɔkɔ, alɔma aŋɛ ŋayɔnɛ mɔkɔ aləpsər mɔ, ŋandekɔ-yɔnɛ akiriŋ; akɔ ŋayɔnɛ akiriŋ mɔ, ŋayɔnɛ aləpsər.»

³¹Tɛm tatɔkɔ, kɔ aFarisi alɔma ŋander ŋaloku kɔ: «Məyɛfɛ nnɔ mɔkɔ! bawo Herodu ɛfaŋ kədif’əm.»