Luku 13:14-31

¹⁴Kutu pieke handaa mo pi hotu haemeke da handeteke hayeke halima꞉ta꞉ Yesuma꞉ mo wanda꞉ta꞉ mo Hoto Pila꞉ Natena꞉ kone epeaeyeke handa Yesu yaapo mineke pankeekeme. Koto ekina꞉ ipikana꞉ma꞉ mo wanda꞉hali pa꞉ta꞉ alota꞉ E poka꞉peke nate manuta꞉ yunki mindiki hata꞉ taama꞉ ika꞉ yenimanu epeaena꞉ hone wimika꞉na꞉ta꞉ kota꞉ koto nate nina꞉ a꞉pa꞉peke ya꞉la꞉pate pa do Hoto Pila꞉ Natena꞉ta꞉ ota꞉ dia꞉me leekeme.

¹⁵Mo Tekehalima꞉ ipika꞉ pi hombo peaaso alota꞉ Makeaasa꞉ hau pu haleme haliwekio. Iki ma꞉nda꞉ hondoma꞉ mo Hoto Pila꞉ Natena꞉ ika꞉ kao o donki ma꞉na꞉ make mo ho̱linda꞉ pa꞉ta꞉ mea hama lomba꞉ ta꞉pao ikali na꞉na꞉yeke mea pelimikie.

¹⁶Koto tupa꞉ kone do Eipoloha꞉ma꞉na꞉ tapake wanda꞉ta꞉ hoke temokoma꞉ 18 bapina꞉ tonkao ula꞉ puta꞉ mo Hoto Pila꞉ Natena꞉ta꞉ na ka꞉la꞉pa꞉ tapaena꞉pe laa lota꞉ piekeme.

¹⁷Koto hombo peayeke ekima꞉ta꞉ Yesu ipika꞉ a꞉nda꞉ tunkuliki haliwekima꞉ yaala꞉ma꞉ homolo haena꞉ta꞉ mo wanda꞉halima꞉ta꞉ mo epeke haumanu piekeeki handolo hata꞉ ta꞉na꞉ma꞉ wotu homemekeme.

¹⁸Yesuma꞉ alota꞉ Koda꞉na꞉ Kilu Tombuao Hala꞉ ekita꞉ alekema꞉ handa꞉la꞉pe laa manda꞉ meanope.

¹⁹Mo Kilu Tombuao Hala꞉ ekita꞉ mo (ki̱mi̱le̱ma꞉ handeke) masidadi wae ale sikita꞉ hali ma꞉nda꞉ma꞉ mea ipika꞉ ena꞉ tande leekeeki opaata꞉ ota꞉ aneke ti hombeleke hao paleke palekena꞉ ba titima꞉ dake hapeke ya꞉la꞉me leekeme.

²⁰Kutupa Yesuma꞉ paa make lota꞉ pitolo alota꞉ Koda꞉na꞉ Kilu Tombuao Hala꞉ ekita꞉ alekema꞉ manda꞉ mealua꞉pe.

²¹Dupa manda꞉ meanoe. Wanda꞉ ma꞉nda꞉ma꞉ mo palaowa pombei yaasa꞉ yisitisiki mea palaowa nu homeke mea apa꞉tao kawasona꞉ dakole dakole pealieke. Kutu pilia꞉ hoki naneta꞉ koto palaowa paeyao pombei ya halieke leekeme.

²²Yesuma꞉ mo Diutuseleme da nane opolo poluekema꞉ yeke handaa hosiki da sunu make daoni pa꞉ta꞉manu amba꞉la pominolo hata꞉ pi wala꞉tiki pomiekeme.

²³Kutupieke ma꞉nda꞉ma꞉ Yesu pa꞉ta꞉ lota꞉ pitolo hata꞉ alota꞉ Tekehalio. Koda꞉ma꞉ta꞉ pa tepo tepo wanda꞉hali homeke detena꞉ yeke petelia꞉pe laa leekeme. Yesuma꞉ mo pi hombo peaaso alota꞉

²⁴Ikana꞉ma꞉ mo dekepeke pota꞉ kake pa꞉ta꞉ honda꞉ pambuluekema꞉ honkopu hapa꞉peke. Pa ekipeke. Wanda꞉hali wotuma꞉ honda꞉ pambuluekema꞉ taapolo pelemepate honda꞉ pambolo pua꞉pa꞉peke na ya꞉lieke.

²⁵Mo da teke halima꞉ta꞉ tiao pota꞉ pokilieke. Kutu pia꞉ka꞉na꞉ta꞉ iki hama hata꞉ta꞉ pota꞉ kake kilikili laaso alota꞉ Tiekeo. Niki epomono pota꞉ lomba꞉e lelimipate ipikana꞉ma꞉ hombo peaaso alota꞉ Ikita꞉ I̱ na handoloma꞉ Ikita꞉ hanema꞉ epelemepe laa lelieke.

²⁶Koto leliepate ikana꞉ma꞉ ipika꞉ pi hombo peaaso dupa lelimikie. Nikita꞉ neke ame̱le̱ mandakena꞉ pita꞉ ne ikali noma꞉ hande make nakana꞉ma꞉ta꞉ mo nika꞉ da sunu pa꞉ta꞉ pimanu wala꞉tiki pomime laa lelimikie.

²⁷Koto lemekena꞉ ipikana꞉ma꞉ pa do tupa꞉ lelieke. Ikita꞉ hane wanda꞉halipa꞉ I̱ mina꞉pa꞉lao pupa꞉e. Ikita꞉ hoke hau pu haleme wanda꞉halie lelieke.

²⁸Kutupa ikana꞉ma꞉ta꞉ mo Eipoloha꞉ma꞉ Aisa꞉ke Dieikope make mo potopede haliweki paeyao make mo Koda꞉na꞉ Kilu Tombuao Hala꞉ eki pa꞉ta꞉ halimieki handolo hata꞉ ikita꞉ hama tolu lia꞉ka꞉na꞉ta꞉ kota꞉ ikita꞉ e̱ tieke alo hata꞉ kake lenkene lo halimikie.

²⁹Wanda꞉halita꞉ mo nate pamba꞉la꞉ nane make nate opa꞉la꞉ nane make mo nepoko yaapo nane make opolo endi peaata꞉ Koda꞉na꞉ Kilu Tombuao Hala꞉ alena꞉ ne pamba꞉la꞉ ekina꞉ a꞉pa pitilimikie.

³⁰Koto ekina꞉ta꞉ ame do wetepena꞉ haleme wanda꞉hali mandaneta꞉ titina꞉ halimikie. Kutupa titina꞉ haleme wanda꞉halita꞉ wetepena꞉ halimikie leekeme.

³¹Koto dina꞉ kone mandane Pa꞉tisi haliwekima꞉ Yesu pa꞉ta꞉ a꞉pa alota꞉ Kini Hetodima꞉ neke luekema꞉ taapa꞉la꞉me. Neketa꞉ do da yu mina꞉pa꞉lao ota꞉ ame do kone pua꞉peke lemekeme.