Lucas 13:14-31

¹⁴Pero uwinquir e sinagoga qꞌuijna conda uwira que e Jesús war utzꞌacpes e ajmuacobꞌ tama e día tuaꞌ e jiriar, y tamar era uyare e gente y che: —Ayan seis día conda erer capatna, y tamar e seis día era erer watox tuaꞌ ixtzꞌacpesna, pero machi tuaꞌ iche tama e día tuaꞌ e jiriar, che uwinquir e sinagoga era.

¹⁵Entonces ojron Cawinquirar y che: —Ajqꞌuecranerox, ¿machi ca iwiti iwacax o ichij tuaꞌ iqꞌueche axin tuaꞌ iwajcꞌu e jaꞌ tuaꞌ uyuchꞌi tama inteꞌ día tuaꞌ e jiriar?

¹⁶Pero e ixic era xeꞌ jax inteꞌ uwijchꞌoc catata viejobꞌir Abraham y xeꞌ turu dieciocho añoix ajmuac umen e Satanás, ¿machi ca uyubꞌi atzꞌacpesna tama e día tuaꞌ e jiriar? che e Jesús.

¹⁷Pues conda cꞌapa ojron e Jesús cocha era, subꞌajrobꞌ tunor tin e war aqꞌuijna uwirobꞌ e Jesús. Pero tunor e sian gente war atzay uwirobꞌ tunor e nuxi milagro lo que cay uche e Jesús.

¹⁸Pues ojron e Jesús otronyajr y che: —¿Tucꞌa tuaꞌ inwareox que lar tacar uchinam e Dios? ¿Tucꞌa ojroner tuaꞌ inchecsu tiut que bꞌan uchinam e Dios?

¹⁹Uchinam e Dios lar tacar ut e mostaza que motor que chuchu ut e semilla era pero conda apajcꞌa umen inteꞌ winic y acay achꞌiꞌ aquetpa inteꞌ nuxi teꞌ tiaꞌ erer acꞌotoy aturuan e mut tama ucꞌabꞌ y tiaꞌ erer uche usijcobꞌ. Y bꞌan uchinam e Dios ubꞌan. Tama ucajyesnibꞌir imbꞌijc taca ayan e gente tamar, pero axin abꞌoro este que aquetpa inteꞌ nuxi chinam, che e Jesús.

²⁰Entonces ojron e Jesús otronyajr y che: —Cꞌani inwareox otronyajr era tucꞌa lar tacar uchinam e Dios.

²¹Uchinam e Dios lar tacar imbꞌijc e levadura lo que uche asibꞌi e pan conda ayajra tama e harina conda war achena e pan umen inteꞌ ixic, che e Jesús.

²²Pues conda war axana e Jesús tama e bꞌir tuaꞌ acꞌotoy tama e chinam Jerusalem, war uchecsu uyojroner e Dios tut tunor e sian gente tama e chinamobꞌ y tama e aldea tiaꞌ war anumuy.

²³Entonces checta inteꞌ winic tut e Jesús xeꞌ uyubꞌi tuaꞌ y che: —Niwinquiraret, ¿ma ca jax meyra xeꞌ tuaꞌ acorpesnobꞌ? che e winic.

²⁴Y e Jesús che: —Turbꞌanic ibꞌa tuaꞌ ixochoy tama e puerta xeꞌ intꞌum taca ut tuaꞌ ixcꞌotoy tama uchinam e Dios, porque cꞌani inwareox era que ayan meyra gente xeꞌ cꞌani uyusre oꞌchoyobꞌ tamar, pero machi tuaꞌ oꞌbꞌnobꞌ.

²⁵Conda inteꞌ ajyum otot acꞌapa umaqui e puerta tuaꞌ axin awayan, nox xeꞌ warox patir cꞌani icay ipejca tut e puerta y che: “Cawinquiraret, pasa apuerta.” Pero e ajyum otot tuaꞌ asutpa uyareox y che: “Machi innata tiaꞌ tariox.”

²⁶Y de allí nox xeꞌ turox patir tuaꞌ ixsutpa iware e ajyum otot y che: “Non cay cacꞌuxi e paꞌ tacaret, y net cay acansion tama cachinam.”

²⁷Pero e ajyum otot asutpa uyareox y che: “Inwareoxix que machi innata tiaꞌ tariox. Loqꞌuenic tara tunorox xeꞌ ajmabꞌambꞌanirox.”

²⁸Y tama e día yajaꞌ conda ixixin ixyajra patir ucꞌani tuaꞌ ixaru y tuaꞌ icꞌuxi ut iwej conda ixixin iwira que turobꞌ e Abraham taca e Isaac y e Jacob taca tunor e profetobꞌ macuir uchinam e Dios, pero que nox war ixquetpa patir.

²⁹Y cꞌani acꞌotoyobꞌ meyra sian gente tama tunor or e rum. Watobꞌ tama e lugar tiaꞌ atobꞌoy watar e qꞌuin, y watobꞌ tiaꞌ anamtzꞌa e qꞌuin, y bꞌan teinxejr yajaꞌ y bꞌan teinxejr bꞌana. Tama tunor or e rum cꞌani watobꞌ e gente tuaꞌ umorojse ubꞌobꞌ tor e mesa tuaꞌ awiobꞌ tama e nojqꞌuin tiaꞌ tuaꞌ acay acꞌotori Cadiosir.

³⁰Y tama e tiempo yajaꞌ tin e nuquir winic tara tor e rum cꞌani aquetpa que majax nuquir winic, y tin e majax nuquir winic tara tor e rum cꞌani aquetpa nuquir winic yajaꞌ, che e Jesús.

³¹Y tama e día era cꞌotoyobꞌ cora fariseobꞌ xeꞌ cay uyareobꞌ e Jesús y che: —Loqꞌuen tara porque e rey Herodes cꞌani uchamset, che e fariseobꞌ.