Ʒare Biri 14:4-12

⁴Iŋuc murâ jaŋaczia ʒiŋuc muhuc nazaŋ gazaŋ embiŋ: “Nâŋâc micne moc âkendâŋnepene eki jowac‐nâpome Aigita mâreŋko risienʒepeneŋ.”

⁵Iŋuc mupie Mose â Aroŋ jahe Israe kikefuŋ sasawa jaŋere maio mâreŋko hetutuckerâ fopic.

⁶Ehame Nuŋte ŋokâ Josua â Jefunere ŋokâ Kalebe, mâreŋ hone tâcneniŋte mâmâc rapic jahe ŋaqi‐jekic bâsuckepic.

⁷Ehuc Israe kikefuŋ mâmâc sâko ʒiŋuc jazapic: “Mâreŋ hone tâcnezo rambeŋ i mâreŋ biaŋne jâmbâŋ.

⁸Eme Wofuŋ e nâŋâcne maname sâckeme mâreŋ ira jowac‐nâpo rarâ nâre tahac eocmu; mâreŋ i susu â baŋac fusucmarâ qâmbâriŋkehuc foekac.

⁹Mocjaha, ŋoŋe Wofuŋ mu kâroŋ mi ecnenʒepieŋ, ehuc mâreŋ rune jaŋere wâc mi hâwic‐ŋopazejec, nâŋâc jopa jâpec sâcne ejarenaŋmu. Ŋeŋezic‐jeŋic rârieha Wofuŋzi nâŋâc bafic‐nâpoocmu, irec jaŋere mi hâwic‐ŋopazejec.”

¹⁰Iŋuc jazapire kikefuŋ ʒeŋgoma jaŋe qânâzi hehâmoc‐jofazo mumbiŋ. Iŋuc muhapie Wofuŋte tatamaczi tutumaŋ qoruc bozeo ira fuarâ Israe kikefuŋ batamaec‐jopawec.

¹¹Ehame Wofuŋzi Mose ʒiŋuc âzâcnewec: “Ŋic ʒi jaŋe qaisocnuhuc jueŋgopieŋ i mo dameŋko beheniŋmu? Me ŋondeŋ‐jeŋicko mâsi wiac fuŋne fuŋne baekopac i honehuc mo dameŋko moc manasiŋnuniŋmu?

¹²No mupe huc hâmoczi rocjopame omaenʒepieŋ, ehame go basawecgupe ɋaricfâcge jaŋe ŋic ʒi jaŋere sâc sirickehuc guru sâko erâ junʒepieŋ.”