1Ee kana malu epo papeyamopa akali Atasesisi doko baa yuu Pesa dokona mupwa ingyuo kareyamopa Esera kareya. Eserana rora ambasu wambu dupwana akali Erone baa purisi mupwa ingyuo kareyamo doko rakange angingyuo kareya. Esera baa Serayana ikinyingi. Seraya baa Asarayana ikinyingi. Asaraya baa Ilikayana ikinyingi.
2Ilikaya baa Saluminya ikinyingi. Salumi baa Satokona ikinyingi. Satoko baa Akitupinya iki-nyingi.
3Akitupi baa Amarayana ikinyingi. Amaraya baa Asarayana ikinyingi. Asaraya baa Merayotena ikinyingi.
4Merayote baa Serayana ikinyingi. Seraya baa Usinya ikinyingi. Usi baa Bukinya ikinyingi.
5Buki baa Apisuyana ikinyingi. Apisuya baa Pineyasena ikinyingi. Pineyase baa Eliasana ikinyingi. Eliasa baa Eronena ikinyingi.
6Esera baa mana nyisi akali. Kamongo Isaraele wambunya Anatu dokome lowa pii peparae Mosese maiyamo dupwa mana nyepala soo gisiya. Kamongo banya Anatumi Esera keta elyape pisakamiyamo dokome baa kee lao piso siyamuli pyuo gapomane akali mupwa dokome baa bange peparae maiya. Atasesisi baa kiŋi karo ee kana yanda ipingi nembo kareyamopa Esera baa Bapilone piso yuu Jerusaleme panya peya. Pao dokopa baame Isaraele akali purisi dupwape Lipae dupwape tembole anda dokona musiki pingipi tembole anda isingipi yulu pingi akalipi lapo lanyuo peya.
8Kana mupwa dokona yuu gii mupwa dokona Bapilone yaki nyepala Anatumi nyisiyamosa kana kingi paki dokona yuu gii mupwa dokopa yuu Jerusaleme epo pyaka siyami.
10Eserame Kamongona lowa dupwa rae maiyuo mana nyepala moko minyuo karo lowa dupwa Isaraele wambu mana lamaiyuo kareya.
11Kiŋi Atasesisimi purisi akali Esera lenge dokome mawa pii Kamongome Isaraele wambu dupwa maiyamo dupwa soo giso kareyamo doko pepa pase dapa lao pyao palyapala maiya.
12Namba kiŋi Atasesisimi emba purisi akali Esera Anatu yake panda karenge dokona mawa pii dupwa soo gisingi doko pyao jilyu.
13Nambame yuu rapu pyuo karenge dokona Isaraele wambupi purisi dupwape Lipae dupwape yuu Jerusaleme panya lao suu pilyaminyi dupwa emba role pyao kapa pena lao lalu lao leto.
14Nambamoo namba nyiso yulu pingi akali yanda ipingi nyepo dusipamepe Anatunya lowa dupwa emba keta jiyamo dupwa yuu Jerusaleme dokonape Juta dokonape apa pyuo mondo lao minyuo karamipi lao kandala puu letamano.
15Anatu bange reto maingi dupwa nambape namba nyiso yulu pingi akali dusipamepe Isaraele wambunya Anatu banya tembole anda yuu Jerusaleme karenge doko kana golope kana kulingipi maimwali lao suu pilyamano dupwa embame nyepala minyuo pare.
16Embame kana golope kulingipi yuu Bapilone dokona nyiinyi dupwape dee bange peparae Isaraele wambupi nakamana purisi dupwapeme nakamana Anatunya tembole anda Jerusaleme karenge dokona mee mailyaminyi dupwa opetae nyuo minyuo pare.
17Nakamame kana doko kando mondo lao keyange ingyuo nembo mena bulamakao kalipi sipisipi kalipi sipisipi yakanepe witi jingipi waene ipwangepe ropo pyapala Jerusaleme tembole anda kana pyare lasi dokona reto Anatu mairi.
18Maipala kana kulingipi kana golope kakana silyamo dupwame nyepala embape embena akali yango dupwape pinya suu pilyaminyili pyuo Anatumi pimili lao suu pilyamo dokona palyuo pirami.
19Bange wakale wakale dupwa tembole anda dokona yulu pirami lao jiyami dupwa peparae yuu Jerusaleme dokona Anatu mairi.
20Maipala tembole anda dokona yulu pinya saka nayami kande dokopa nambana kana retenge anda dokona nyere.
21Namba kiŋi Atasesisimi akali kana rapu pingi ipwa Yuporisa neta anda penge dorena yuunya karaminyi dupwame purisi akali Esera lenge Anatu yake panda karenge dokona lowa soo gisingi doko bange kee laramo dupwa peparae mainya leto.
22Mairaminyi dupwa kana kulingi kilokerame malu mee (3,400) dee witi kilokerame malu mee (10,000) dee waene lita malu (2,000) dee olipi ipwange lita 2,000 opetaeko dusipa iki manda manju mairami. Maipala kota peparae nyimwali lao suu pyaraminyili pyuo kapa mairami.
23Dokona nakamame bange peparae Anatumi banya tembole anda dokona nyipuli lao suu pyaramuli pyuo mondo lao maiyalapape. Dokopa Anatumi nambape dee enakana akali nambana panda nyuo kararami dupwape kando imbwa nara.
24Nakamame purisipi Lipaepe musiki pingi akalipi tembole andana kama waa nyii nana lao rapu pyuo karenge dupwape yulu pingi akalipi tembole anda dokona yulu wakale mende pyuo karenge wambu dupwape keta takisi kapa nyii nare.
25Emba, Eserame Anatumi mona palenge singinya renge jiyamo dokome iso karenge akali lapope kote singi akali lapope rombo palyare. Palyarene dokopa ipwa Yuporisa neta anda penge dorename yuunya wambu Anatunya lowa minyuo karaminyi dupwa rapu pyuo kararami. Kararaminyi dokopa wambu mende lowa dupwana see nayami kande doko mana lamairi.
26Mendemepe Anatunya lowa dupwanape kiŋinya lowa dupwanape kamba lara ramo dokopa waiya lao randa nyera. Nyeramo doko pyao kumarami panda yuu mendasa karapusi ingyuo pena larami panda banya yuupi bangepe nyerami panda karapusi dokona palyaraminyi kata dusipana mende randa nyera.
27Esera baame lao, Kamongo namwana rora ambasu dupwana Anatu doko lakando karalapape. Baame kiŋi akali doko Kamongona tembole anda Jerusaleme dokona karenge doko angiŋi lao ketae nembara lao banya mona piya.
28Anatumi namba kando sakame kumuo kareyamosa kiŋi dokope banya akali nyiso yulu pingi dupwape banya akali mupwa porai renge palenge dupwapeme namba kando rae mailyaminyi. Nambana Kamongo Anatu dokome nambana mona porainyi pyambuyamosa nambame Isaraele rara dupwana akali kyawa malu dupwa kongo piyunusa namba pipya kapu kyuo Jerusaleme epeyami.
