1Eme irec faicnao Perisia ŋicwofuŋ Arataʒeʒe e ŋicwofuŋ gie‐ticne bahuc juhame jaha Aʒariare ŋosa Seraja ŋokâ‐ticne Eʒerazi risiewec. E apa ŋiric ŋurucfâc‐ticne ine ʒiŋuc: Hilikia,
2Salum, Zadoko â Ahitubu,
3Amaria, Aʒaria â Merajoti,
4Ʒerakia, Uʒi â Buki,
5Abisua, Pinehasi, Eleaʒa â taha bapa micne Aroŋ.
6Eme Eʒera e hâcne Babe mâreŋkonec risiewec. E miti qaqazu erâ juhuc Israere Wofuŋ Anutuzi sâcmutâc dâŋ Mose râcnewec irec mamana saric juwec. E Wofuŋ Anutu‐ticnezi bafickewecte wiac sasaware ŋicwofuŋ numucneme manacnewec.
7Ehame Arataʒeʒezi ŋicwofuŋ juhame jara 7 ewec dameŋ ira Israe ŋic tucne, erâ taha bapa â Lewiŋic â gae hehe ŋic â haesac motâc soŋaŋ â taha ufuŋte kiŋaŋ qaqa tucne Jerusalem haeo risiembiŋ wâc.
8Eme Eʒera e ŋicwofuŋzi gie‐ticne bahuc juhame jara 7 irec mosa wahame arec 5 ewec dameŋ ira Jerusalem haeo fisiwec.
9E fufuŋke mosare ʒoaŋ gie bapa 1 ira Babe mâreŋkonec faharewecte rahuc juku mosa wahame arec 5 ewec irec ʒoaŋ gie bapa 1 ira Jerusalem haeo fisiwec. E Anutu‐ticnere mesanaŋzi basanaŋkeme fisiwec hâcne.
10Eʒera e Wofuŋte sâcmutâc irec mamana gie bahuc bâjâpeocte maŋticne domawec, ehuc Israe maŋnao dâŋsanaŋ â mumutâc‐ticne i jaza qazuc eocte maŋkewec hâcne.
11Eme ŋicwofuŋ Arataʒeʒezi papia ʒiŋuc qâreŋkerâ taha bapa â miti qaqazu erâ Israe ŋic jaŋere Wofuŋte sâcmutâc â mumutâc irec mamana saric Eʒera e râcnewec:
12“Ŋicwofuŋ jaŋere ŋicwofuŋ Arataʒeʒe noni taha bapa â sambâŋte Anuture sâcmutâc dâŋte qaqazu Eʒera gore bubiaŋ dâŋ ʒi râekopac.
13No ʒiŋuc mutarakopac: Uucmaŋ‐naneo Israe ŋic jaŋeraonec ŋic i me i, me taha bapa me Lewiŋic jaŋe gohec Jerusalem haeo raniŋte maŋjeŋiczi afeckeme sâcne ranʒepieŋ.
14Go ŋicwofuŋ â soŋaŋfâc‐nane 7 nâŋe Judaŋic â Jerusalem hae rune jaŋe Anutugere sâcmutâc dâŋ megao fokac irec sâcko juŋgopieŋ me weniŋuc irec fuŋne hone manac ecmurâ sorecguŋgopeneŋ.
15Erâ ŋicwofuŋ â soŋaŋfâc‐nane nâŋe buafec jaha Israere Anutu Jerusalem haeo ŋeŋe juju eekac ere taha siliwa â gol râembeŋ i baracmurâ sorecguŋgopeneŋ wâc.
16Erâ Babe mâreŋ sâko irec maŋnao siliwa â gol bâfuacmu i mecne, â ŋic ŋokac me taha bapa Jerusalem haeo Anuture ufuŋ ŋekac irec biŋe buafecko taha râembiŋ i mâmâc barazemec.
17Eme go moneŋ izi aimuŋ jaha bulimakao ŋicne â lama ŋicne â motecne, erâ padi â waiŋzi taha i furine barâ Anutugere ufuŋ Jerusalem haeo ŋekac irec alata faio taha râezemec.
18Erâ go â qomâfâcge ŋoŋe siliwa â gol nâfocne ŋeocmu i Anutu‐ŋeŋiczi guriŋ baŋareha iŋuc me iŋuc ezo eŋareocmu sâc enʒepieŋ.
19Erâ kuʒi râqâc wiac Anutugere ufuŋte giere biŋe garekicne i Jerusalemte Anutu ere maio râezemec.
20Erâ dameŋ ira me ira Anutugere ufuŋte wiac i me i moc basapie ine ŋicwofuŋte kânoŋkonec moneŋzi kitâcneme rorâ râezemec.
21“Eme ŋicwofuŋ Arataʒeʒe no Eufrata opâ ocniŋucnao mâreŋ fokac irec moneŋ soŋaŋ juŋgopieŋ sasawa jaŋe ʒiŋuc mujarekopac: Ŋoŋe taha bapa â sambâŋte Anutu sâcmutâc dâŋticnere qaqazu Eʒerazi wiac irec me irec muŋareme aimuŋ jaha ebac enʒepieŋ.
22Ehuc siliwa ŋemâc‐ticne 100 â padi târu 100 â waiŋ ʒopo 100 â wokemaŋ ʒopo 100 jaha râcnenʒepieŋ, â hâwec ine ʒare tâmiric.
23Sambâŋ Anutuzi wiac irec me irec mutâcne‐ŋareocmu irec sâc jaha ufuŋ‐ticnere ezo, juku kimbeŋ‐ticnezi ŋicwofuŋ no â ŋokâfâc‐nane nâŋere uucmaŋ imackezacte.
24Erâ wâc ʒiŋuc ŋazaŋgopeneŋ: Taha bapa â Lewiŋic â gae hehe ŋic â motâc soŋaŋ â taha ufuŋte kiŋaŋ qaqa, me Anuture ufuŋte kiŋaŋ qaqa i me i jaŋe sahac taha fuŋne fuŋne râeniŋte ʒoɋac mi ejarenʒepieŋ.
25“Eme Eʒera go ine Anutugere maŋɋârâŋ gare tahac ekicne fogarekac irec sâcko sâcmutâc mamana â mumutara ŋic âkendâŋ‐jopatec Eufrata opâ ocniŋucnao mâreŋ fokac irec ŋic ŋokac juŋgopieŋ jaŋerao mumutara gie bahuc junʒepieŋ. Anutugere sâcmutâc dâŋ manaeŋgopieŋ ŋic iŋucne râec‐jopazemec, â ŋic gâcne sâcmutâc dâŋ mi manaeŋgopieŋ jaŋe ine qazu‐jarezemec.
26Eme moc e Anutugere sâcmutâc dâŋ me ŋicwofuŋte sâcmutâc dâŋ mi reŋkeocmu e hâmocte biŋe ezejec. Me hâmocte biŋe mi eme guru‐ŋeŋickonec bârârienʒepieŋ, me mafa wiac‐ticne jâoc ronʒepieŋ, me kâpâcwâru ficko ŋeocte mutaracnenʒepieŋ.”
27Apa ŋosafâc‐nâŋec jaŋere Wofuŋ Anutu e muac baafec ecnezo! Eki hâcne ŋicwofuŋte maŋ baafeckeme Wofuŋte ufuŋ Jerusalem haeo ŋekac i ericke bâpiaŋ enaŋte bafic‐nâpokac.
28Erâ mume ŋicwofuŋ â soŋaŋ fekicnefâc‐ticne tâpirihec jaŋe nore manapie sâckewec. Eme Wofuŋ Anutu‐nanere mezi basanaŋnume hâbihec erâ Israe guru sâc irec micne jaŋe nohec mâmâc ranaŋte hetumaŋ‐jopapo.
