Xabakuki 1

1

2

3

¹Waliyiya falan naxan so Nabi Xabakuki yii fe tooni alo xiyena:

²Alatala, n luma i maxandɛ han waxatin mundun yi n mali feen na i mi n xuiin mɛ? N luma gbelegbelɛ han waxatin mundun yi n naxa, “Gbalona!” i mi n nakisi?

³Nanfera i tinxi n yɛɛn yi lu hakɛn na? Nanfera i tinxi a yamaan xa ɲaxankata? Halagin nun gbalona n yɛtagi waxatin birin. Lantareyaan nun yɛngɛn bata gbo ayi.

⁴Nanara, sɛnbɛ mi fa sariyan na, kiti kɛndɛn mi sama mumɛ! Bayo muxu ɲaxine bata tinxin muxune rabilin, kiti tinxintarene yi lu sɛ.

⁵Ɛ yɛɛn ti siyane ra, ɛ e mato, ɛ yi kabɛ, ɛ yigitɛgɛ. Bayo n fena nde ligama nɛn ɛ waxatini ito yi ɛ mi yi lɛ naxan na, hali xa a fala ɛ xa.

⁶Bayo n Babilɔn kaane rakelima nɛn, siya kininkinintare wɛkilɛxina, e yi bɔxɔn birin yisiga e yi yirene tongo e gbee mi naxanye ra.

⁷E magaxu, e sɛnbɛn gbo, e fangan nan e sariyan nun e xunna kenla ra.

⁸E soone xulun burunna ɲarin xa, e xaɲɛ ɲinbari ra kankone xa. E soo ragine gixin fama nɛn tuganɲɛ sa keli yire makuyeni. E gima alo singbinna nɛɛn fɔnɲɛ seen ma.

⁹E birin fama gbalon nan xili ma. E ganle yɛɛn tixi e sigaden nan na, e suxu muxune malan alo ɲɛmɛnsinna.

¹⁰E mangane magelema, e gelema kuntigine ma. E gelema yire makantanxine birin ma e gbingbinne nan nafalama taan yinna xɔn e dangu yinna xun ma, e taan suxu.

¹¹E yi dangu alo foye kala tiina, e birin hakɛ kan, e fangan nan e gbee ala ra.

¹²Koni Alatala xa mi i tan na xabu a fɔlɔni ba, n ma Ala sariɲanxina? Nayi, e mi nxu faxama! Alatala, i bata e findi nxu makiti muxune ra. Ala, n kantan fanyena, i bata e sɛnbɛ so alogo e xa nxɔ wanle saran nxu ra.

¹³I yɛɛne sariɲan fe ɲaxin toon ma. I mi tinɲɛ yamana ɲaxankatan matoɛ. Nanfera nayi, i yɛɛn tixi yanfantenni itoe ra? Nanfera i dunduxi muxu ɲaxini itoe yi yamaan naxɔri naxanye tinxin e xa?

¹⁴I bata adamadiine liga alo yɛxɛne baani, alo kari mi niimaseen naxanye ma.

¹⁵Yaxune e birin suxuma kɔnna ra, e yi e rate e yalaan na, e e malan e bɛnbɛnla kui, e ɲaxan han!

¹⁶Nayi, e yi saraxane ba e yalane xa e yi wusulanna gan e bɛnbɛnle xa, bayo ne nan a ligama e balon yi gbo ayi, e donse ɲaxumɛne sɔtɔ.

¹⁷Nayi, a mɔn xa lu a yalani kunkunɲɛ nɛn ba, a mɔn yi siga siyane halagɛ kininkinintareyani ba?