Womusu 89:14-50

¹⁴Wunɛn ɡɑ̃seru tɑ dɑm mɔ. Wunɛn nɔmu ɡɑ dɑm mɔ.

¹⁵Gemɑ mu sɑ̃ɑ wunɛn bɑndun kpɛɛkpɛɛku. Kĩru kɑ bɔrɔkinirɑ rɑ n wɑ̃ɑ wunɛn wuswɑɑɔ.

¹⁶Yinni Gusunɔ, doo nɔɔruɡibɑ be bɑ rɑ nun tɑkɑru ko. Bɑ rɑ sĩwɑ yɑm bururɑm sɔɔ wunɛn wuswɑɑɔ.

¹⁷Bɑ koo nuku dobu ko tɔ̃ɔ bɑɑtere wunɛn yĩsirun sɔ̃. Kpɑ bu bɛɛrɛ wɑ wunɛn ɡem sɔ̃.

¹⁸Domi wunɑ ɑ sɑ̃ɑ ben dɑm kɑ ben bɛɛrɛ. Wunɛn sɑɑbuwɑ sɑ tɑ̃simɔ.

¹⁹Yinni Gusunɔ, wunɑ ɑ sɑ̃ɑ bɛsɛ Isirelibɑn tɛrɛru. Wunɛ Dɛɛro, wunɑ ɑ sɑ̃ɑ bɛsɛn sinɑ boko.

²⁰Gɑsɔ, ɑ kɑ wunɛn sɔm kowo be ɑ nɑɑnɛ sɑ̃ɑ ɡɑri kuɑ kɑ̃siru sɔɔ ɑ nɛɛ, ɑ wunɛn dɑm tɑbu durɔ dɑmɡii ɡoo wɛ̃. A nùn ɡɔsɑ wunɛn tɔmbun suunu sɔɔn di ɑ wɔlle suɑ.

²¹Wiyɑ Dɑfidi wunɛn sɔm kowo. Wiyɑ ɑ bɑndun ɡum tɑ̃re.

²²Wunɛn nɔmu ɡɑ ko n nùn nɛniwɑ kem kem. Geyɑ ɡɑ ko n sɑ̃ɑ win dɑm.

²³Yibɛrɛbɑ bɑ ǹ kpɛ̃ bu nùn sɑmbɑ ko. Tɔn kɔ̃sobu bɑ ǹ kpɛ̃ bu nùn dɑm dɔre.

²⁴Kɑɑ win yibɛrɛbɑ kpeerɑsiɑ. Kɑɑ be bɑ nùn tusɑ sɛ̃suku.

²⁵Wunɛn bɔrɔkiniru kɑ wunɛn tɔn ɡeerɑ ko n wɑ̃ɑ kɑ wi. Kpɑ ɑ nùn dɑm wɛ̃ kɑ wunɛn yĩsiru.

²⁶Kɑɑ de win bɑndun dɑm mu tɛriɑ sɑɑ nim wɔ̃ku ɡe bɑ mɔ̀ Mɛditerɑnɛn di sere kɑ dɑɑ te bɑ mɔ̀ Efɑrɑtiɔ.

²⁷U koo nun sɔ̃ u nɛɛ, ɑ sɑ̃ɑwɑ win tundo kɑ win Yinni. A sɑ̃ɑwɑ win fɑɑbɑ kowo nɡe kpee bɑɑ mì u rɑ kuke.

²⁸Kɑɑ nùn ko wunɛn bii tɔn durɔ ɡbiikoo. Kpɑ u n sɑ̃ɑ hɑnduniɑn sinɑmbu kpuron sinɑ boko.

²⁹Kɑɑ de wunɛn tɔn ɡeeru tɑ n nùn wɑ̃ɑsi. Kpɑ ɑ kɑ nùn ɑrukɑwɑni bɔke ye yɑ ǹ nɔru mɔ.

³⁰Kɑɑ de win bibun bweseru tɑ n bɑndu dimɔ sere kɑ bɑɑdommɑɔ. Kɑɑ de win bɑndu tu dɑm ɡirɑ nɡe wɔllu.

³¹Adɑmɑ win bibun bwese te, tɑ̀ n yinɑ tu wunɛn woodɑbɑ mɛm nɔɔwɑ, mɑ tɑ wunɛn yiirebu ɑtɑfiiru kuɑ,

³²mɑ tɑ ǹ wunɛn sɔ̃ɔsiru swĩi, mɑ tɑ ǹ wunɛn ɡere mɛm nɔɔwɛ,

³³kɑɑ tu sɛɛyɑsiɑwɑ kɑ bokuru ten mɛm nɔɔbu sɑrirun sɔ̃.

³⁴Adɑmɑ ɑ ǹ yinɑmɔ ɑ tu wunɛn tɔn ɡeeru sɔ̃ɔsi win sɔ̃. A ǹ nùn tɔnu kɑndu kuɑmmɛ.

³⁵A ǹ wunɛn ɑrukɑwɑni kusiɑmɔ. A ǹ mɑɑ wunɛn ɡere kɔbiɑmɔ.

³⁶A bɔ̃ruɑ kɑ wunɛn yĩsi dɛɛrɑru mɑ ɑ ǹ Dɑfidi weesu kuɑmmɛ.

³⁷Kɑɑ de win bibun bweseru tɑ n bɑndu dimɔ sere kɑ bɑɑdommɑɔ. Kpɑ win bɑndu tɑ n wɑ̃ɑ bɑɑdommɑ nɡe sɔ̃ɔ.

³⁸Kpɑ tu tɛ nɡe suru. Win seedɑɡii wi u wɑ̃ɑ wɔllɔ u sɑ̃ɑ bɔrɔkini.

³⁹Adɑmɑ wee ɑ sunɔ wi ɑ rɑɑ ɡɔsɑ deri, mɑ ɑ kɑ nùn mɔru kuɑ too.

⁴⁰A wunɛn ɑrukɑwɑni kusiɑ ye ɑ rɑɑ kɑ wunɛn sɔm kowo bɔkuɑ. Mɑ ɑ win sinɑ furɔ kɑsɑ kuɑ.

⁴¹A win ɡbɑ̃rɑnu kpuro kɔsukɑ, mɑ ɑ win kuku yenu sururɑ.

⁴²A derɑ be bɑ sɑrɔ mi, bɑ win ɑrumɑni ɡurɑ. Mɑ bɑ nùn sekuru doke.

⁴³A win yibɛrɛbɑ dɑm kɑ̃. A derɑ bɑ nuku dobu kuɑ.

⁴⁴A derɑ win tɑbu yɑ̃nu nu dɑm dwiiyɑ. A ǹ kɑ nùn yɔ̃re tɑbu sɔɔ.

⁴⁵A win bɛɛrɛ kpeesiɑ. Mɑ ɑ win bɑndu surɑ sere kɑ temɔ.

⁴⁶A derɑ u tɔkɔ kuɑ fuuku, mɑ ɑ nùn sekuru doke.

⁴⁷Yinni Gusunɔ, sere sɑɑ yerɑ̀ kɑɑ n kukuɑ. Sere sɑɑ yerɑ̀ wunɛn mɔru yɑ ko n seewɑ nɡe dɔ̃ɔ yɑrɑ.

⁴⁸A yɑɑyo nɡe mɛ nɛn wɑ̃ɑrun tɔ̃ru tɑ dɛ̃ɛbu nɛ. A yɑɑyo mɑ tɔnu wi ɑ tɑkɑ kuɑ kpuro u koo rɑ ɡbi.

⁴⁹Wɑrɑ u koo kpĩ u n wɑ̃ɑ u kun ɡu. Wɑrɑ u koo kpĩ u tii yɑrɑ ɡɔribun wɑ̃ɑ yerun di.

⁵⁰Yinni, mɑnɑ wunɛn ɡɑsɔn durom mɛ, mu dɑ. Mɑnɑ nɔɔ mwɛɛ te ɑ Dɑfidi kuɑ kɑ bɔrɔkiniru tɑ wɑ̃ɑ.