Godigo Nogi Ugwaba Sabo Tęąbi Po Wabo Buku Dabe 89:14-50

¹⁴Nage te king bidiyu, tama nago te we bidi dabe doloba pai kolesagade tonalubao. Tama nago po tų dolo naga ebao. Nago te tigidali we bidi wei mu elama, tama nago naga po sesemane wali peyu yali, tama nago po hasegelama eyu, me egobeo. Te tobage kolesaga ebo da, te nago naga we bidi tonalubo sę page mu dao.

¹⁵Te we bidi dabego nageba balia weyu, lotu po weyu yali, tama nago te olo tau mabo wiegi yai kolesagade biliyu, te augwa te ulade bilibo tiwai ebao, te augwa wiegi yai pemene emainao.

¹⁶Augwaligo te nago wiegi yai kolesaga augwaliba ebo te homu kone palu, tama tigidali sogo giligade me hulide augwa te wiegi yai pemene eyu, tama nago nogi ugwaba sabo dao.

¹⁷Magi baso meni, nage naga te nagede dago bomo elalubaso, tama dago wiegi yai pemene nageba ebao. Nago te olo tau sabo wiegi yai kolesaga dabolo elama, tama da te hwįbode tau selama, te boi bidi aiyaba elaluai dao.

¹⁸Awe, nago digi te da seselalubo bidi sa muai. Nage te da Israelgo Tedali Wiegi Yai God, nago te dena king dabolo mawai dao.

¹⁹Te ugwadu sogo polobadu, nago te nage wali pabo bidi dabe muba te na menama, tama nago augwaliba te tama po wali, “Eno te polaluabo ami bidi me deli sa munama, tama eno agaba te kingo hat madi muai. Eno aga te we bidi dabe tomode selama, tama aga te king munama bidai.

²⁰Eno Devit nigilalio, ena sę bidi da, tama eno aga te dagego king pedalumainu yai dao.

²¹Tama tiyu, eno bomo te aga dali sesemane bidaibao. Mu tama, eno bomogo aga tau saibao.

²²Te aga boi bidi dabego te hwįbode aga aiyaba elaluyu, mone mao me wagobeo, tama te dwai sę ebo bidi dabego aga me elalugobeo.

²³Te ena digi eno agai boi bidi dabe agala selama, tama te aga wei isiąbo bidi dabe ela muyu yaibao.

²⁴Te eno aga wei mu elama, tama ena aga dali sesemane sogo bididuaibao. Te aga boi bidi dabe dali hwįbo sogo, te eno agai tigidali sogo augwali aiyaba elalumainu ilaibao.

²⁵Te eno elama, tama agai tonalubo tǫ te genuai tamu ąį Mediterenian tedu gagalasa peyu, te wę Yufretis elalubo madiba usu nigi paibao.

²⁶Tama agai enabolo te tama po waibao, ‘Nage Aya me eno God dao. Nago ena tonalu, tama ena sesemane tau sabo dao.’

²⁷Tialima, te eno polalubo gomunai wai aga munama, tama aga te polalubo king pedelama, te tigidali tǫde king aiyaba elalueibao.

²⁸Te eno sesemane sogo aga wei mu iduaibao. Tama eno te po dąų wabo kontrak aga dali elama, tama te dąų walali po kontrak te sesemane elalua peyu, elalua paibao po wai dao.

²⁹Sesemane sogo te aga hani bidi me deli te king pedalu, ela piduaibao wali. Tama aga hani king me deligo te Israel dabe sesemane tonaluaibao, te dagalu ugwadu sesemane elalubo tiwai gilama yaibao.”

³⁰“Tiali goli, te agai wąį nǫų hani dabego te eno bomai po sela sąnama, tama augwaligo eno kolesaga wali me pisąma,

³¹tama augwaligo eno po tudiba munama, tama augwaligo eno bomai po wali me pisąbaso da,

³²teda eno augwaligo dwai sęba homu kone paliyu, tama augwaliba te dene mawaibao. Tama eno te augwa yali dwai sęde homu kone palu, te augwali keloago elaiba wai.

³³Tiali goli, te sogo me te Devit te eno wei mu elaludaibao. Tama eno aga me tagalogobeo, tama eno agade te dąų walali po mu me tagalogobeo.

³⁴Tama eno aga dali te dąų walali bomai po te kontrak me tagalisiąma, tama eno te ena po deli me hasegeliyu me egobeo. Mu menio.”

³⁵“Eno dąų walubo po te deli sogo naga weyu, tama eno ena digi tedali wiegi yai nogi nogilama weyu, te po dąų walali, tama te sesemane sogo me elalua pidu, elalua paibao. Eno te tama wai. Eno te tibo po Devitba me wagobeo wai.

³⁶Te aga hani wąį nǫų dabe me sia sisąma, te sesemane me elaludaibao wai. Tama aga hanigo te we bidi dabe sesabi elama, mu tonalu, te giliga me elalubo tiwai gilama yaibao.

³⁷Te augwali sesemane elaludu, te polua dagalude elalubo tiwai eyu, tama te we bidi dabeba te eno po mu da weyu, te ola mawaibao,” wali.

³⁸Genuai Bidi, nago te po Devit dali polobadu dąų walai goli, megi nago te sa muani kingba nago wado po wali. Nago aga tagalama, aga tudiba muani.

³⁹Nago te naga sę bidi dali dąų walali te kontrak po togwali. Nago agai te kingo tobolude mubo madi te tǫba sąnama, tama meda yali.

⁴⁰Nago agai taun bagulali obo dabe togolama, tama agai te ami bidi dabego bomai be dabe te dolalio.

⁴¹Te pądu soabo bage tigidaligo te agai doado bage dabe wi sabo dao. Tama te abagi dabego agaba posobo po wabo dao.

⁴²Nago aga te boi bidi dabego elalumainu ilali, tama nago augwali deliba sisinama, te dili bubo sę emainu yai.

⁴³Nago agai ami bidi dabego te hwįbo nai dabe usu isąbo sę ilali, tama nago aga te hwįbo side aiyaba elalumainu ilalio.

⁴⁴Nago aga elaluama, tama aga te king ma bidibeo, tama agai te we bidi munu ma tonalubeo. Tialima, agai genuai nogi dali, bomo dali si silalio.

⁴⁵Nago aga monu dabe polo tama pedalumainu ebaso, tama hale genuai mugo aga mesegelalio.

⁴⁶Genuai Bidi, nisu naga sogo te nage dualaludaibawe? Te sesemane sogo usu nama da, agawe? Nisu naga sogo te nago haliga sębę te sia posolo mu ebo tiwai elaluaibawe?

⁴⁷Genuai Bidi, iya, nago te pęwadage sogo naga bidabo bidiba homu kone palao. Nago da nigali, tiali goli da te isaibao. Nago odolali da nigali da, agawe?

⁴⁸De mu te sesemane bidada pidu, bidada pelama, tama te me isigobe dawe? De te bomo elama bididu, te aga gų pageba me pogobewe? Te mena bidi deli me tegobeo, mu menio.

⁴⁹Genuai Bidi, magi yaliwe? Nago megi da, da wei me ebe da, agawe? Te nago Devit dali te dąų walali pode menagi yaibawe?

⁵⁰Genuai Bidi, nago naga sę bidi, ena homu kone palao. Te bidi dabego enaba posobo po obao. Eno te gasa hani dabego te kęnę po wabo sęgę tolobo dao.