Mboe 89:14-50

¹⁴Peeze ku, ina imender se mbulu ku ta urpewe pataŋana kizin tomtom mi kamam mbulu ndeeŋeŋana men. Mi mbulu ku ta boozomen izzwe kembei: Nu toto sua ku mbukŋana mi urur lelem pa wal ku.

¹⁵Yooba, zin wal ta tiluplup zin pa suŋŋana, mi kalŋan izalla ma tipakurkuru na, menmeen zin. Pa wal ta kembei tipa pai kizin pa mat ku leleene, tana nu mbotmbot raama zin mi kampewe zin.

¹⁶Zin tiute mbulu ta kamam na. Tana aigule ta boozomen, zoŋ ise ma ila zoŋ isula na, lelen ambai kat, mi tipakurkuru pa mbulu ku ndeeŋeŋana.

¹⁷Nu pombolmbol yam, tanata niyam ise mi zoyam iwe biibi. Kampeŋana ku, ta ikam yam ma amlip pa koyam koi bizin.

¹⁸O Yooba, nu itum ta pamender king tiam be iwe siŋgiao piam. Nu Anutu tiam Israel, mi nu potomŋom. Mi nu ta ur king tiam be ikam peeze piam.

¹⁹Zin wal ta tiurur lelen pa Anutu mi titoto mbulu kini na, muŋgu kat ni ipatooŋo zin pa mbulu tabe ni ikam. Iso pizin ta kembei: “Naŋgaŋ ta, ni imbotmbot la mazwoyom. Nio ituŋ aŋpeikati be aŋpakuri ma iwe biibi. Mi aŋpomboli ma ilip pa zin wal malmal kan.

²⁰Nio aŋdeeŋe mbesooŋo tio Dabit, mi aŋliŋ ŋgere potomŋana isala uteene kek bekena aŋuri pa uraata.

²¹Nio kola aŋkiskisi mi aŋpombolmboli. Mi nomoŋ woono ko isilou i.

²²Ka koi sa ko irao ilip pini na som. Mi tomtom sananŋana sa ko irao be ikoto i na som.

²³Pa nio ko aŋmuŋmuuŋgu pini mi aŋkazas ka koi bizin. Zin wal ta so tiurur koi pini na, nio ko aŋpun zin ma timetmeete lup.

²⁴Nio ko aŋtoto sua ta aŋbuk pini na, mi aŋurur leleŋ pini. Mi ko irao aŋzemi na som. Ko aŋbotmbot raami mi aŋpombolmboli be iliplip pa ka koi bizin. Tana zaana ko iwe biibi kat.

²⁵Nio ko aŋkam ma toono kini iwe biibi. Ko ipera pa Tai Mediterenian, mi ilela pa toono uunu, to ila imiili su yok Euprates.

²⁶Ni ko iso pio ta kembei: ‘Nu na nio Tamaŋ. Nu Merere tio mi ulaaŋa tio mbolŋana ta pombolmbol yo mi menderkalkaala yo.’

²⁷Mi nio ko aŋkami ma iwe lutuŋ muŋgamuŋga. Tana ni ko ilip pa king ta boozomen.

²⁸Nio ko aŋurur leleŋ pini ma alok. Mi sua ta aŋbuk pini na, ta kembena. Ko imbol mi imbotmbot ma alok.

²⁹Mi nio ko aŋpamender wal kini be tikam peeze pizin Israel. Peeze kizin ko imbotmbot ma alok, kembei ta saamba. Pa popoŋana kini ko tiparpekelkel zin ma tiwe king, mi timbutultul se Dabit muriini peeze kana, mi iseeŋge iseeŋge ma ila.

³⁰Tamen, sombe popoŋana kini tipizil ndemen pa sua tio, mi tipa pai kizin ma indeeŋe pa tutu tio som,

³¹mi tirepiili tutu tio ta imbot pataaŋa kek na kembei koroŋ sorok, mi timolo tutu tio,

³²nako aŋbalis zin pa zooroŋana kizin. Zin ko tire yoyouŋana pa sanaana kizin.

³³Tamen ko irao aŋtatke muŋaiŋana tio pa Dabit mi popoŋana kini na som. Mi sua ta aŋbuk pini na, irao aŋpizil ndemeŋ pa na som.

³⁴Pa sua tana, irao aŋrepiili kembei koroŋ sorok na som. Sua ta ipet pa ituŋ kwoŋ na, irao aŋtooro na som. Som kat.

³⁵Pa nio Merere potomŋoŋ. Tana sua ta aŋpombol ma imbol kek, nako imbotmbot ta kembei ma alok. Irao aŋpakaam Dabit pa na som. Som ma som kat.

³⁶Sua ta kembei: Popoŋana kini ko irao timap na som. Ko motoŋ pizin ma timbotmbot mi tikamam peeze, mi iseeŋge iseeŋge ma ila. Peeze kizin ko imbotmbot ma alok, kembei ta zoŋ.

³⁷Peeze kizin ko imbol ma imbotmbot kembei ta puulu. Pa Ni ta imbotmbot ta saamba a, irre koroŋ ta boozomen mi itoto sua kini.”

³⁸Yooba, muŋgu nu so sua ta kembei. Tamen koozi nu ketem malmal biibi kat pa king ta itum roogi mi uri pa uraata na. Mi lelem pini som, mi pizil kat ndemem pini.

³⁹Sua mbukŋana ta kam pa mbesooŋo ku na, iŋgi nu reege kek. Mi kinke mogar kini mi pundu sula toono.

⁴⁰Siiri bibip mi mbolŋan ta tiliu kar kini na, nu reege zin ma tisu lup. Mi pasaana ruumu kini mbolŋan ta boozomen ma borok su toono.

⁴¹Tana wal boozomen ta tiwwa len sorok ma timar na, tikemem len koroŋ kini. Mi wal ta tigarau i na, tirepilpiili i mi tikamam ŋeu pini.

⁴²Yooba, nu ta pombol king tiam ka koi bizin ma timaŋga pini mi tilip pini. Tana kam ma zin ta boozomen menmeen zin.

⁴³Mi pimiili Dabit zaaba kini ma imiili mini mi ipasaana itunu. Pa indeeŋe ta ni ikam malmal na, nu pomboli som.

⁴⁴Tana koroŋ kini ndabokbokŋan ta zaana biibi pa na, nu tatke pini. Mi muriini peeze kana na, nu reege ma borok su toono.

⁴⁵Ni naŋgaŋ kaibiim. Tamen nu kami ma isaana ma iwe kolman karau men. Tana pamiaŋi biibi kat.

⁴⁶O Yooba, ŋiizi na motom mar piam mini? Ko ketem malmalŋana ku imbotmbot se tiam ma alok?

⁴⁷Yooba, lelem isaana piam. Motom ŋgal. Niam tomtom ambotmbot su toono ma molo som. Nu itum ta mbuuzu yam pa toono ma ampet. Ko uraata ku tana iwe koroŋ sorok?

⁴⁸Asiŋ ta irao imeete som mi imbot mataana iyaryaara men isu toono ti? Asiŋ irao itatke itunu pa meeteŋana mburaana? Som.

⁴⁹Yooba, muŋgu nu toto sua ku mbukŋana mi urur lelem pa wal ku. Tamen buri na, muŋaiŋana ku ila parei? Sua ku mbukŋana ta kam pa Dabit mi pombol ma imbol kat na, parei ta toto mini som?

⁵⁰O Yooba, motom iŋgal yam mbesooŋo ku. Pa iŋgi zin karkari tipamiaŋ yam, mi tirepilpiili yam ma leleyam isaana kat.