WALOMA 16

1

2

3

4

5

6

7

8

9

10

11

12

13

14

15

16

¹Nomwika mmakono genu lumbu jetu Foibe, shemasi wa wanhu wamtogole Kilisto ako mdiwambo da Kenikilea.

²M'bokeleni mditwaga da Mndewa, kamba vowolondigwa kutenda wanhu wa Mulungu wang'alile, mgweleleni kinhu chochose choyolonda kulawa kumwenu, kwavija kawataza wanhu bwando hamoja na nie mwenyego.

³Walamseni Pilisila na Akuila, wasang'hana wayangu msang'hano ya Yesu Kilisto,

⁴awo wauhonzile ugima wao sama yangu nie. Sio nie niiyeka niwaheweza, ila vivija na Wamhazi wose wamtogole Kilisto.

⁵Vivija walamseni wanhu wamtogole Kilisto awo woiting'hana mng'anda yao. Mulamseni mbwigaangu Epaineto, ayo yakalile wa mwanduso kum'bokela Kilisto muisi ya Asia.

⁶Mulamseni Maliamu, ayo yawasang'hanikile mweye ng'hani.

⁷Mulamseni Enduloniko na Yunia, Wayahudi wayangu wakalile mkifungo hamoja na nie, awo watangigwe ng'hani mmwanza wa watumigwa wa Kilisto, na hewo wanilongola nie mkumtogola Kilisto.

⁸Mulamseni Ampiliato, mbwigaangu muuhamoja na Mndewa.

⁹Mulamseni Alibano, msang'hana mietu hamoja na Kilisto, na mbwigaangu Sitaku.

¹⁰Mulamseni Apele, ayo yatogoligwe na Kilisto. Walamseni awo wali mng'anda ya Alisitobulo.

¹¹Mulamseni Muyahudi miyangu Helodiana. Walamseni awo wamtogole Mndewa wali mng'anda ya Nakiso.

¹²Walamseni Tulufena na Tulufosa, awo wosang'hanika sama ya Mndewa. Mulamseni mbwigaangu Pesisi, ayo yasang'hanike ng'hani sama ya Mndewa.

¹³Mulamseni Lufo, yasaguligwe na Mndewa, mulamseni na mamaake, ayo vivija yakalile kamba mamaangu.

¹⁴Mulamseni Asinikilito, Filegoni, Helime, Patuloba, Helima na ndugu wamtogole Kilisto wali hamoja nao.

¹⁵Mulamseni Filologo, Yulia, Nelea na lumbu jake, na Olimpa, na wanhu wose wamtogole Kilisto wali hamoja nao.

¹⁶Ilamseni wenyego kwa wenyego na mnonelo ung'alile. Madale gose ga wanhu wamtogole Kilisto gowalamsa.

¹⁷Ndugu zangu, nowayalalila kamba mwitiganye na awo wogala mbagu na ving'hwaso mzinzila zenu, mkugahindula mafundizo gamfundizigwe. Mwinege nawo.

¹⁸Kwavija wanhu kamba hiwo hawamsang'hanila Mndewa wetu Kilisto, ila wosang'hanila gaja gowosulukila wenyego. Muulonzi unyilibuke na mbuli za kunogeza woivwizila mioyo ya wanhu wali na ngelegeza ndodo.

¹⁹Kila munhu kahulika mmbuli ya wende umulinao, avo nodeng'ha sama yenu. Nolonda muwe na nzewele mmbuli ya gaja ganogile, ila muwe wabozi mmbuli ya gaja gehile.

²⁰Mulungu wa tindiwalo mbwisa komuhonda Mwenembago hasi ha magulu genu. Ngekewa ya Mndewa wetu Yesu Kilisto iwe hamoja na mweye.

²¹Timoteo, msang'hana miyangu, kowalamsa, na Lukio, na Yasoni, na Sosipata, Wayahudi wayangu.

²²Nie Tatio, nyandike lupwilili luno, nowalamsa mditwaga da Mndewa.

²³Gayo, mwenekae wangu na wanhu wose wamtogole Kilisto, kowalamsa. Elasto, mwika hela wa idiwambo, na ndugu yetu Kwato, wowalamsa.

²⁴Ngekewa ya Mndewa wetu Yesu Kilisto iwe hamoja na mweye mose. Amina.

²⁵Yenzi yose imcholele Mulungu yali na udaho wa kuwagela mweye mhiko kubitila Usenga wangu Unogile na kumpeta Yesu Kilisto, kubitila lugubulo lwa nyong'onyo ifisigwe songela mwaka.

²⁶Ila sambi igubuligwa kubitila Nyandiko Zing'alile za wahokozi, na kubitila ndagizi ya Mulungu wa digunge itendigwa itangigwe na Wamhazi wose, giladi wanhu wose wamtogole na kumtegeleza heyo.

²⁷Ha Mulungu, yeiyeka yali na nzewele, yayenzigwe milongo yose kubitila Yesu Kilisto! Amina.