ROMANOS 16

1

2

3

4

5

6

7

8

9

10

11

12

13

14

15

16

¹Bets, bzian, leṉ dze rii laa Feb, tib wnaa ne ruṉ xtsiiṉ Dios guiedz Cencré, laa me guiaad nëz lo to i.

²Laa naa rso diidz lo to, zeeṉe glanso me i niowse goḻcaania me, goḻcaania me zigne rieguiaḻ ycaania ne zha ne ngab lo Dios. Goḻsiguieḻ goḻdeed grë ncuaaṉe yquiin me; sac goṉ, teḻ me ndal grë zha ne ziyacnie me lo xliaadz zho, haxta naa blactaa ziyacnie me naa.

³Ni rnab naa lo to, goḻsiguieḻ goḻdeed zhibdiuzh naa lo grë zha qui. Goḻdeed tib zhibdiuzh naa lo Aquil i, grop tsieel me Priscil. Blactaa ziyacnie zho naa zidziuuṉ no xtsiiṉ Jesús,

⁴haxta bdedlaa zho niet zho psilaa zho naa lo guieḻgut. Rzacdox zdoo naa miṉe beeṉ zho ga, niicle grëragaa zha zit ne nacgrë new, rzac zdoo zhow.

⁵Ni scagaa, grë zha ne rcaalsa lidz zho riegooḻnie Dios, goḻdeed zhibdiuzh naa lo zho. Goḻdeed zhibdiuzh naa lo Epenet, rley naa rsoladz naa me; lëë me nac zha Asia ne glopaa bzëëb xnëz Jesús.

⁶Goḻdeed zhibdiuzh naa lo Marí, blactaa noyuṉ me xtsiiṉ Jesús lo to.

⁷Goḻdeed zhibdiuzh naa lo Andrónic, lo Junias, grop meṉladz naa zha ne no i; gzapaa no zho bdzio ladzguiib. Glo zho bliladz Jesús lo naa, zha nziuu nac zho lo grë zha ne pxeeḻ Dios nonee Xtiidz me.

⁸Goḻdeed zhibdiuzh naa lo Ampliat, lëë stib zha ne rdzieel xtidz naa ga;

⁹lo Urban, rsoladz naa me, tipse bdziuuṉ no xtsiiṉ Jesús grop no; lo Staquis, stib zha ne nziuu lo naa, goḻdeed zhibdiuzh naa lo zho;

¹⁰lo Apel, ye me blactaa ncuaaṉe bded me blu me gaṉle ne nli dib zdoo me rnalo me Jesús; lo grë zha ne no lidz Ristob ne.

¹¹Goḻdeed zhibdiuzh naa lo Herodion, ye me meṉladz naa nac me; lo grë zha ne no lidz Narcis, zha ne rliladzle Jesús;

¹²lo Trifen, lo Trifós, ni lo Pérsida, gza meṉ wnaa rii blactaa noyuṉ zho xtsiiṉ Jesús.

¹³Goḻdeed zhibdiuzh naa lo Ruf, zëëb xtiidz me lo grë zha ne nacgrë ne; goḻdeed zhibdiuzh naa lo xniaa me ne, ruṉ naa cuent lëë stib xnia naa ga, blactaa pteedlo me naa.

¹⁴Goḻdeed zhibdiuzh naa lo Asíntric, lo Flegon, lo Hermes, lo Patrob, lo Hermas ni lo grëragaa zha bets ne nacgrë zho.

¹⁵Goḻdeed zhibdiuzh naa lo Filólogo, lo Jul, lo Nerew grop bzian me, lo Olimp ni lo grëraa zha bets ne nacgrë zho.

¹⁶Grëse to bets, grëse to bzian, goḻcaania zhibdiuzh naa. Grëse zha ne rliladz Jesús nëz rii, laa zho rxeeḻ bdiuzh lo to.

¹⁷Nu ne laa naa csiaaḻle lo guits rii, laa naa rso diidz lo to, nsin goḻso lo grë zha ne ziaad loxaque dieṉ zha codiḻ zho to, dieṉ zha guṉgüet zho to, rlu zho miṉe ni nacdraa Xtiidz Jesús; yquiaadiagde to zhiwseed zho.

¹⁸Grë zha co, led xtsiiṉdraa Jesús ga ruṉ zho, sinque laa zho noxco ncuaaṉe gdeed guxt xcuerp zho. Diidz nex, diidz ndooladz rnee zho; grë miech ne beeḻze pe rliladz, znuse rquidie zho zho.

¹⁹Saṉgue to, zëëb diidz ne ib rsaande to miṉe nac Xtiidz Dios, zienaḻ to miṉe rnabey me. Rley naa ron naa squitaa nguzobdiidz to. Racladz naa tibaque squi niini gac to, zeeṉa guieṉ to niapse ncuaaṉe yquiin guṉ to, ni lalnu tsode to lo guieḻntseeb.

²⁰Scagaa Dios meṉ ne rtiche grëse zhgab, grëse dzeb, merle quixdze me Satanás, zeeṉa peet grieelodraa guṉ ma. Jesús, meṉ ndzon ne rnabey ne, me gacnieṉ to.

²¹Goḻcaania zhibdiuzh Timoté, meṉ ne quianie naa xtsiiṉ Jesús, laa me rxeeḻ bdiuzh lo to; scaque zha ladz naa Lus, Jasón ni Sosípater, laa zho rxeeḻ bdiuzh lo to.

²²(Naa nac Ters, naa noquia guits rii, ye naa laa naa rxeḻ zhibdiuzh naa lo to i. Rleynie naa to, sac ye to ngab lo Jesús.

²³Goḻcaania zhibdiuzh Gay, meṉ ne rbëz naa lidz, laa me rxeeḻ bdiuzh lo to. Lidz me nu rcaalsa grë zha ne rliladz Jesús nëz rii. Ye Rast, meṉ ne nac wxtis quianap xtimi guiedz rii, ni bets ne Cuart, laa zho rxeeḻ bdiuzh lo to.

²⁴Jesús meṉ ne rnabey ne, me gacnieṉ to grëse to. Sca gaca.)

²⁵Laa naa rsaṉ to ladznia Dios, me gacnieṉ to lozh sodziits to lo Xtiidz me, miṉe none naa lo miech. Haxta zeeṉe gard tsaa guidzliu, znu no guic Dios csilaa me grë miech lo xtoḻ zho, per choot gocnaṉda, naraa laaw bzhoobneṉ.

²⁶Laa niina, nzian zaatne nogaaz Xtiidz me, zeeṉa grëse zho guieṉ Jesús none gnalo zho, ni miṉe rnabey me miṉ co no guṉ zho. Grë zha ne biadteed xtiidz Dios padzeela, bzeetle zho ne znu gaca, ni ible Dios rnabey ne znu gaca.

²⁷¡Mese nac Dios, mese nac meṉ ne nlipaa rieṉ! ¡Tibaque sca goḻgotsaa dziuuṉnon ne me, grëse ne ne nac ne zha ne ngab lo Jesús! Sca rieguiaḻa. Pabl