Carta a los Romanos 16

1

2

3

4

5

6

7

8

9

10

11

12

13

14

15

16

¹Febe raillañaiño omoɨ dɨne jaite. Naiñaiñona omoɨ uiñuana jitaidɨcue. Naiñaiñodɨ creyente. Cencrea railla naɨraɨ iñaiño. Cristo dɨbeimo maɨjɨano, nainomo ite creyentiaɨna canocabide.

²Cristomo omoɨ duilla muidona, jɨaɨe creyentiaɨna caɨ feiñoiacacabilla isoi, naiñaiñona raise feiño. Dɨga comɨnɨna naiñaiño canua jira, naiñaiño jitaille dɨese cano. Curna jɨaɨ canode.

³Priscila dɨne cue uaina oredɨcue. Naiñaiño ɨni Aquila dɨne cue uaina jɨaɨ oredɨcue. Cristo Jesús facaina cue dɨga maɨjɨdɨiaɨmaiaɨ.

⁴Cue facaina niadedɨ fiodaitɨiaɨmaiaɨ. Ie jira iaɨmaiaɨri iobidɨcue. Dɨga naɨraɨmo judíuaɨñede creyentiaɨ itɨmacɨ. Cuemona Cristo rafuena cacadɨmacɨ. Cue facaina iaɨmaiaɨ niadedɨ fiodailla jira, iaɨmaiaɨri jɨaɨ iobidɨmacɨ.

⁵Iaɨmaiaɨ jofomo rollena bitɨno dɨne cue uaina oredɨcue. Epeneto dɨne cue uaina jɨaɨ oredɨcue. Cue isiruigamɨe. Asia railla enɨruemo itɨnomona naimɨedɨ Cristona nano ɨɨnotɨmɨe.

⁶María dɨne cue uaina oredɨcue. Omoɨna canollena, omoɨ motomo maɨjɨde.

⁷Andrónico dɨne cue uaina oredɨcue. Junias dɨne cue uaina oredɨcue. Naie iaɨmaiaɨdɨ cue comɨnɨ. Cárcelmo danomo navui itɨcaɨ. Jesucristo oretaganodɨ iaɨmaiaɨna marena ñaɨtɨmacɨ. Naimɨena nia cue ɨɨnoñena facaise Cristona ɨɨnotɨiaɨmaiaɨ.

⁸Amplias dɨne cue uaina oredɨcue. Cristomo naimɨe duilla jira, naimɨedɨ cue isiruigamɨe.

⁹Urbano dɨne cue uaina oredɨcue. Cristo facaina caɨ dɨga maɨjɨcabide. Estaquis dɨne cue uaina oredɨcue. Cue isiruigamɨe.

¹⁰Apeles dɨne cue uaina oredɨcue. Cristomona naimɨedɨ mare rafuedo jaicabide. Aristóbulo jofomo itɨno dɨne cue uaina oredɨcue.

¹¹Herodión dɨne cue uaina oredɨcue. Naimɨedɨ cue comɨnɨ. Narciso comɨnɨmona dajerie ɨɨnotɨmacɨ. Naimacɨ dɨne cue uaina oredɨcue.

¹²Trifena dɨne cue uaina oredɨcue. Trifosa dɨne cue uaina oredɨcue. Caɨ Nama facaina maɨjɨdɨiaɨñuaɨ. Pérsida dɨne cue uaina oredɨcue. Cue isiruigañaiño. Caɨ Nama facaina eo maɨjɨde.

¹³Rufo dɨne cue uaina oredɨcue. Caɨ Namana eo raise ɨɨnote. Naimɨe ei dɨne cue uaina jɨaɨ oredɨcue. Naiñaiñodɨ cue ei isoide.

¹⁴Asíncrito dɨne cue uaina oredɨcue. Flegonte dɨne cue uaina oredɨcue. Hermas dɨne cue uaina oredɨcue. Patrobas dɨne cue uaina oredɨcue. Hermes dɨne cue uaina oredɨcue. Naimacɨ illanomo ite creyentiaɨ dɨne cue uaina oredɨcue.

¹⁵Filólogo dɨne cue uaina oredɨcue. Julia dɨne cue uaina oredɨcue. Nereo dɨne cue uaina oredɨcue. Naimɨe mirɨño dɨne cue uaina oredɨcue. Olimpas dɨne cue uaina oredɨcue. Nana naimacɨ illanomo ite creyentiaɨ dɨne cue uaina oredɨcue.

¹⁶Coninɨ caɨmare omoɨ uaido. Dɨga naɨraɨmo creyentiaɨ itɨmacɨ. Nana naimacɨdɨ omoɨ dɨne naimacɨ uaina oredɨmacɨ.

¹⁷Cue amatɨaɨ, daje rafuena nia lloitɨcue. Omoɨ comecɨaɨ daje isoi lloitañedɨno dɨga nabairiñeno. Uai uaitacabidɨno dɨga nabairiñeno. Omoɨ jai cacaja rafuena lloñedɨmacɨ; iadedɨ jɨaɨe rafuena llotɨmacɨ. Naimacɨ dɨga nabairiñeno.

¹⁸Caɨ Nama Jesucristo facaina maɨjɨñedɨmacɨ; iadedɨ danɨ naimacɨ jitailla rana maɨjɨcabidɨmacɨ. Mare isoide lluamona abɨna raise uiñoñedɨnona jɨfuetɨmacɨ.

¹⁹Ailluena comɨnɨdɨ Cristona omoɨ ɨɨnuana uiñotɨmacɨ. Ieri iobidɨcue. Marecɨnona fɨnuana raise omoɨ uiñuana jitaidɨcue. Maraiñedɨcɨnona omoɨ fɨnuana jitaiñedɨcue.

²⁰Jusiñamuidɨ omoɨna uri itatate. Naimɨe omoɨna canoite, Taɨfena anafefitallena. Caɨ Nama Jesucristo omoɨna duenaillesa.

²¹Omoɨ dɨne Timoteo ie uaina orede. Cue dɨga jɨaɨ maɨjɨcabide. Lucio ie uaina jɨaɨ orede. Jasón ie uaina jɨaɨ orede. Sosípater ie uaina jɨaɨ orede. Naimacɨdɨ cue comɨnɨ.

²²Terciodɨcue. Pablo facaina bie cartana omoɨmo cuetɨcue. Caɨ Namamo cue duilla jira, omoɨmo cue uaina oredɨcue.

²³Gayodɨ ie uaina jɨaɨ orede. Naimɨe jofomo ricabidɨcue. Creyentiaɨdɨ naimɨe jofomo rocabitɨmacɨ.

²⁴Erasto ie uaina orede. Naimɨedɨ bie naɨraɨ ie ucube eenoraɨma. Cuarto ie uaina orede. Naimɨedɨ jɨaɨ creyente.

²⁵Cue mare rafue llua isoi, Jusiñamui omoɨ comecɨaɨna ocuiñotarede. Jesucristo rafuena llocabitɨcue. Jusiñamuidɨ comɨnɨmo naie rafuena jaie uiñotañede;

²⁶iadedɨ Jusiñamui caɨna iena birui jai uiñotade. Nana comɨnɨ iena uiñollena, Jusiñamui facaina lloraɨnɨ mɨcorɨaɨ iena jaie cuetɨmacɨ. Jusiñamui llua jira, Cristona comɨnɨ ɨɨnollena, nana comɨnɨdo bie rafuena llocana birui jaide. Jusiñamuidɨ jaca ite.

²⁷Jusiñamuidɨ naga rana uiñote. Naimɨemo Jesucristo mamecɨdo iobillacɨnona jaca caɨ fecajasa. Mai. Macaɨbaite. Pablodɨcue.