Roma 16

1

2

3

4

5

6

7

8

9

10

11

12

13

14

15

16

¹Ŋokac âgo‐nâŋec Foibe, Keŋkereai kikefuŋ bafic‐jopahuc juekac, e fâ fisime

²ŋoŋe mitio munârekicne irec sâcko Wofuŋte erâ hezu hewâneŋ ecnenʒepieŋ. Erâ e irec me irec ecneme bafickenʒepieŋ. Ŋokac e no nahacne â gâcne mâmâc kiŋaŋ qanârehuc juwec.

³Erâ Prisika â Aqila, Kristo Jesu gie‐ticnere babafic jahec‐nane jahe jasaniŋ, mamanac‐nane jaherao fokac.

⁴Jahe hâcne nore erâ sahac‐jekic qaisockezo epicte no sawa mâcne, hae sâc kikefuŋ nâŋe jahere bubiaŋ bajueŋgopeneŋ.

⁵Jahere ficko mitire tumaŋneeŋgopieŋ ŋic ŋokac i jaŋe wâc mu ʒeri ejarekopac. Âgo‐nane Epaineto, Asia mâreŋ masunao micne barâ Kristoŋic ewec, e wâc mu ʒeri ecnekopac.

⁶Maria e wâc mu ʒeri ecnekopac âzâcneniŋ, e ŋoŋere erâ gie bocjaha bawec.

⁷Androniko â Junia, Judaŋic âgo jahec‐nane, kâpâcwâru mâmâc bacnâpokicne, jaherao mamanac‐nane fokac i jasaniŋ. Jahe ŋic ʒâŋe biŋeheczi aposolo jaŋere guruo juhuc, no mâc juhape Kristore miti bânierâ manapic.

⁸Mitio âgo‐nane Ampiliato e wâc mu ʒeri ecnekopac.

⁹Urbano, Kristore giere babafic embeŋ, â Sitaki âgo‐nane jahe wâc mu ʒeri ejactekopac i jasaniŋ.

¹⁰Apele, Kristore ŋic fârine, â Aristobulo ere wiacfâc jaŋe mu ʒeri ejarekopac.

¹¹Judaŋic âgo‐nane Herodioŋ erâ Narikiso wiacfâcne gâcne mitio jueŋgopieŋ, jaŋerao mamanac‐nane fokac.

¹²Ŋokac jahec Tirifaina â Tirifosa, Wofuŋte erâ gie sâko bapic, â Peasi e iŋuc jaha Wofuŋte erâ gie paŋʒâic bawec, jaŋe mu ʒeri ejarekopac wâc.

¹³Wofuŋte bufuŋ Rufu â neŋgoc‐ticne, e no wâc neŋgoc enarewec, jaherao mamanac‐nane fokac.

¹⁴Asiŋkrito, Filegoŋ, Hereme, Patoroba, Herema â âgofâc‐jeŋic jaŋe mu ʒeri ejare‐fârekopac.

¹⁵Filologo â ŋokac Julia erâ Nereo â seŋticne â Olumpa â miti ŋic ŋokac jaŋehec jueŋgopieŋ, jaŋe mâmâc mu ʒeri ejare‐fârekopac.

¹⁶Ŋaŋac wâc mitio meo babac enʒepieŋ. Hae sâc Kristore kikefuŋ jaŋe ŋoŋere mamanac wâc juŋgopieŋ.

¹⁷Âgofâc, ŋoŋerao fâfâuc bâfuahuc, miti qazu‐ŋarekicne i bâsifuckezo eeŋgopieŋ ŋic i jaŋere ruc bahuc dic bajarenʒepieŋ.

¹⁸Ŋic iŋucne jaŋe Wofuŋ Kristo mâcne, jaŋe jaŋacne hobu kiŋaŋ qacneeŋgopieŋ. Ehuc mumumbiaŋ dâŋ muhuc ŋic ŋokac omane mu bâmiriŋ ejarehuc eatuc‐jopaeŋgopieŋ.

¹⁹Miti mana rereŋ‐ŋeŋicte biŋe i hae sâc rafârewec. Eme no irec ŋoŋere bubiaŋ manahuc kecʒiŋuc eniŋte ŋazape: Wiac biaŋnere maŋafec junʒepieŋ â wiac sâqocnere ine maŋ ŋeŋemâc enʒepieŋ.

²⁰Anutu wama rune eki mi ʒoraha Sataŋ ro bawaha âte ecneocmu. Wofuŋ Jesu Kristo ere aki anonoczi ŋoŋerao fozejec.

²¹Babafic‐nane Timoteo â Judaŋic âgofâc‐nane Lukio â Jasoŋ â Sosipate jaŋe ŋoŋere mamanac juŋgopieŋ.

²²Teatio no papia ʒi (Paulore mickonec) qâreŋkehuc iŋuc jaha Wofuŋte maio ŋoŋere manasukopac.

²³Gaio e no â kikefuŋ mâmâc sasawa hezu hewâneŋ enâreekaczi iŋuc jaha ŋoŋere manasukac. Erâ hae soŋaŋ Erasto â âgo‐nâŋec Qato jahe iŋuc jaha eŋarekopirec.

²⁴Wofuŋ‐nâŋec Jesu Kristo ere aki anonoczi ŋoŋerao fotâcnerâ fosejec. Jâmbomac.

²⁵Anutu e Biŋebiaŋ muekopac â Jesu Kristore dâŋ muromackeekopac irec sâcko mamanasiŋko keteŋ‐ŋopaocte tâpiri focnekac. Anutu juju sanaŋ dâŋticne hâcne soŋne fowarehuc jukume

²⁶dameŋ ʒiŋuczia ere micte muropiekicne â ŋicne ŋicne mana rereŋ eniŋte miti papiao bajaŋgeŋkekicne.

²⁷Eme Anutu hâcne, buc maŋɋârâŋ juekac, erao Jesu Kristore erâ mumuteŋzi mumuteŋ hati foraʒihuc juzejec sanaŋ. Jâmbomac.