Sam 89:34-47

³⁴Lopu kaqu hite kumatia Rau sa Qua vinariva egoi koasa, babe vagi pania si keke Qua vina tatara koasa.

³⁵Kekeke totoso mo tavetia Rau pa Pozaqu Hopena sa Qua vina tatara koe Devita. Lopu kaqu kokoha si Rau koe Devita.

³⁶Lopu kaqu tava murimuri palae sa tutina sa, kaqu koa baṉara ninae rane ka rane. Gua sapu koa hola ninae rane sa rimata, si kaqu koa hola gua tugo asa sa nana binaṉara.

³⁷Kaqu ta sokirae va nabu gua tugo sa sidara sapu koa ninae rane si asa. Kaqu turu va ṉiṉira gua tugo sa mamaṉa lavata si asa, sapu koa hola ninae rane,” gua si Goi.

³⁸Ba kamahire si bugoro nia tu Goi sa baṉara pu ele vizatia Goi; ele etulu pania, na veko pania tugo Goi si asa,

³⁹ele kumatia Goi sa Mua vina tatara koasa Mua nabulu, ele va gore pania Goi sa nana binaṉara, guana gona la nia Goi pa kosiri sa nana toropae baṉara.

⁴⁰Ele huari Goi sari na gobana sa nana vasileana nomana, meke huara pani Goi sari na dia vasina varipera ṉiṉiradi.

⁴¹Sari doduru tie ene holadi vasina si hiko vagi sari nana likakalae, sari doduru butubutu pu koa tata koa sa si hegehegere nia si asa.

⁴²Ele va mataqari Goi sari nana kana, meke va qetuqetu i Goi si arini.

⁴³Sari nana tiṉitoṉa varipera si va lokelaedi i Goi, meke ele va kilasia Goi si asa pa vinaripera.

⁴⁴Ele vagi pania Goi sa nana ṉiniraṉira, meke va gore pania Goi si asa pa nana binaṉara.

⁴⁵Lopu sana va kamo ia Goi sa nana binarogoso, meke va kurekurea Goi si asa.

⁴⁶Kei Zihova, ve seunae gua si kaqu va paere pule Nigo si Goi, ninae rane? Ve seunae gua si kaqu huruṉu gua na nika sa Mua binugoro?

⁴⁷Kei Zihova, Mu balabala ia sapu papakana mo sa qua tinoa; Mu balabala ia sapu Agoi tu tavete gami si gami pude lopu kaqu toa hola pa tinoa hie.