Sam 89:3-26

³Ele zama si Goi, “Ele tavetia Rau si keke vinariva egoi koasa tie pu vizatia Rau, ele va tatara nia Rau se Devita,

⁴‘Sari na tutimu goi si kaqu koa baṉara doduru totoso. Kaqu kuria Rau sa mua habohabotuana baṉara koari doduru sinage.’ ”

⁵Kei Zihova madi kera vahesi Igo ri doduru pa Maṉauru, kera nia rini pa dia vinarigara rina tie madidi sapu va gorevura i Goi sari na Mua Zinama,

⁶Ura esei koari na Maṉauru si boka ṉana kamoa se Zihova? Esei koari na tinoni pa Maṉauru si kekeṉoṉo gua e Zihova?

⁷Ta pamaṉae Mu si Goi koari na vinarigara tadi na maqomaqo madidi pa Maṉauru meke turu matagutu hola sarini pa kenumu Goi.

⁸Kei Zihova, na Tamasa Patutokaemu, Esei si ṉiṉira kekeṉoṉo gua Agoi Zihova, ta ronuemu si Goi koari doduru Mua tinavete.

⁹Koa ṉati hiniva nia Goi sa kolo raneboṉi ṉiṉirana, meke va bulei Goi sari na ololobagea lavalavata.

¹⁰Ele muzara va mate pania Goi se Rehabi sa noki variva mate pa lamana; ele va kilasi Goi sari na Mua kana.

¹¹Tamugoi sari na maṉauru, meke sa pepeso. Va podakia Goi sa kasia popoa, meke sari doduru likakalae pu koa vasina.

¹²Sari doduru popoa pa kali gede meke pa kali matao, si na Mua tinavetedi Goi. Sa toqere Tabora meke sa toqere Hemoni si kera vahesi Igo pa dia qinetuqetu, gua tugo ri na tinoni.

¹³Na Tamasa ṉiṉira hola si Goi, patuarana sa lima mataomu.

¹⁴Sa Mua binaṉara si ta sokirae pa tinoṉoto na vinilavilasa va toṉoto. Sa tataru na tinaronue si ta dogoro koari doduru Mua tinavete.

¹⁵Ta manae tugo sari na tie pu kera vahesi Igo, saripu toa pa korapa kalalasana sa Mua tataru vatukana!

¹⁶Pa guguamu Agoi si koa qetuqetu doduru rane si arini, meke vahesi Igo rini koari na Mua tinoṉoto.

¹⁷Agoi poni gami sa ṉiniraṉira pude va kilasi sari mami kana, pa korapa Mua tataru si va mataqara gami Goi.

¹⁸Kei Zihova, Agoi tugo vizatia sa mami tie kopu; Agoi tugo sa Tamasa Hopemu pa Izireli, sapu vizata poni gami sa mami baṉara.

¹⁹Ele vata dogoro pule nigo, meke ele zama guahe si Goi koari na Mua nabulu ta ronuedi pukerane, “Ele va baṉaria Rau sa tie varane pa vinaripera, Ele ponia Rau sa binaṉara koa sa sapu ele vizata vagia Rau koari nana tinoni.

²⁰Ele va baṉaria Rau se Devita sa Qua nabulu; ele zoropo nia oela Rau si asa pa vina madina.

²¹Sa Qua ṉiniraṉira nabuna si kaqu koa koasa ninae rane sa Qua ṉiniraṉira si kaqu va ṉiṉira ia si asa.

²²Sari na nana kana si lopu kaqu boka koa mataqara hola nia, lopu boka va kilasia rina tie kaleadi si asa.

²³Kaqu va huara ineti Rau sari nana kana, meke kaqu va mate pani Rau sarini pu kukiti nia si asa.

²⁴Kaqu tataru nia Rau meke koa turaṉia Rau, meke pa pozaqu Rau si kaqu koa mataqara si asa.

²⁵Kaqu va noma la ia Rau sa nana binaṉara, kamoa pa kolo Meditareniani meke sa nana ṉiniraṉira si kaqu kamo la pa Ovuku Iuparetisi.

²⁶Kaqu poza Nau, ‘Qua Tamasa, Tamaqu, na qua Patu aqoroana, na qua Hinarupu,’ gua.