Sam 89:20-35

²⁰Ele va baṉaria Rau se Devita sa Qua nabulu; ele zoropo nia oela Rau si asa pa vina madina.

²¹Sa Qua ṉiniraṉira nabuna si kaqu koa koasa ninae rane sa Qua ṉiniraṉira si kaqu va ṉiṉira ia si asa.

²²Sari na nana kana si lopu kaqu boka koa mataqara hola nia, lopu boka va kilasia rina tie kaleadi si asa.

²³Kaqu va huara ineti Rau sari nana kana, meke kaqu va mate pani Rau sarini pu kukiti nia si asa.

²⁴Kaqu tataru nia Rau meke koa turaṉia Rau, meke pa pozaqu Rau si kaqu koa mataqara si asa.

²⁵Kaqu va noma la ia Rau sa nana binaṉara, kamoa pa kolo Meditareniani meke sa nana ṉiniraṉira si kaqu kamo la pa Ovuku Iuparetisi.

²⁶Kaqu poza Nau, ‘Qua Tamasa, Tamaqu, na qua Patu aqoroana, na qua Hinarupu,’ gua.

²⁷Kaqu va evaṉae nia na tuqu koreo kenuna Rau si asa; meke na baṉara pu noma hola ni sari doduru baṉara pa pepeso.

²⁸Kaqu kopu nia Rau sa Qua tataru nabuna koa sa doduru totoso. Sa Qua vinariva egoi koasa si kaqu koa hola ninae rane.

²⁹Sa nana habotuana baṉara si kaqu koa hola gua tugo sa mamaṉa lavata, meke sari na tutina sa si kaqu koa baṉara doduru totoso.

³⁰Ba pude sekei ri na tutina sa sari na Qua tinarae, meke lopu luli sari na Qua zinama,

³¹meke be lopu luli rini sari na Qua vina tumatumae, meke lopu taveti rini gua saripu garunu ni Rau,

³²si kaqu va kilasi Rau sarini koari na dia sinea; kaqu va sigiti Rau si arini koari na dia tinavete seadi.

³³Ba lopu kaqu beto sa Qua tataru koe Devita, meke lopu kaqu va karia Rau sa Qua vina tatara koasa.

³⁴Lopu kaqu hite kumatia Rau sa Qua vinariva egoi koasa, babe vagi pania si keke Qua vina tatara koasa.

³⁵Kekeke totoso mo tavetia Rau pa Pozaqu Hopena sa Qua vina tatara koe Devita. Lopu kaqu kokoha si Rau koe Devita.