Sam 86:5-14

⁵Kei Baṉara leamu hola si Goi koa gami, meke ele taleosoni gami Goi. Va siṉi ni tataru nabuna Goi sarini pu varavara atu.

⁶Kei Zihova, Mu va avosia sa qua vinaravara, Mu toka nau pa qua tinepa atu koa Goi.

⁷Pa totoso tasuna si tepa atu Igo rau, sina hoke olaṉi Goi sari na qua vinaravara.

⁸Loketoṉa tamasa pule si kekeṉoṉo gua Agoi, kei Baṉara, loke tinavete pule si kekeṉoṉo gua rina Mua tinavete.

⁹Sari doduru butubutu pu taveti Goi, si kaqu mae hoqa todoṉo meke vahesi Igo si Goi, Baṉara, meke kaqu va lavatia sa Pozamu Goi.

¹⁰Ura na Tamasa lavata si Goi, meke variva magasa sari na Mua tinavete, Agoi mo Telemu sa Tamasa.

¹¹Kei Zihova, va tumatumae nau sa Mua siraṉa, maqu lulia sa Mua hinokara; va tumatumae nau gua pude nabulu Nigo pa doduruna sa buloqu.

¹²Kei Baṉara qua Tamasa, kaqu vahesi Igo rau pa doduruna sa buloqu, kaqu va lavatia rau sa Pozamu ninae rane ka rane.

¹³Nomana lavata sa Mua tataru nabuna koa rau! Ele harupu au Goi si rau koasa lovu.

¹⁴Kei Tamasa, sari na tie vahesi pule ni si korapa varipera mae koa rau; keke puku minate kaleana si korapa hiva va mate au, sari na tie pu lopu pamaṉa nia sa Tamasa.