Sam 78:33-64

³³Gua asa, ke va kokoi i mo Sa sari na ranedi, guana keke siniṉo mo, meke va raza va hodaka ni Sa sari na dia tinoa pa minate.

³⁴Totoso va matei sa Tamasa sari kaiqa, si tiqe kekere saripu koa hola, meke hata sisigitia rini si Asa.

³⁵Tiqe balabala ia rini sapu Asa sa dia Patutokaena, meke sa Tamasa Ululuna Hola, sa dia tinokae pude koa valeana pule.

³⁶Ba sari na dia zinama si tale kokohadi mo, meke loke hite vasi hinokara si koa koari na dia zinama.

³⁷Lopu hite koa soto koa Sa si arini, lopu hite va tabea rini sa Nana vinariva egoi sapu ele tavetia Sa koa rini.

³⁸Ba tataru ni na taleoso ni Tamasa sari Nana tinoni. Taleoso ni Sa sari na dia sinea, meke lopu va mate pani Sa si arini. Soku totoso si tuqe pulea Sa sa Nana binugoro, meke lopu va ṉiṉira ia Sa sa Nana tinaṉaziri,

³⁹sina balabala pulea Sa sapu na tie mo si arini, sapu gua mo na givusu sapu raza meke hola taloa.

⁴⁰Soku totoso si lopu va egoa rini sa Tamasa pa soloso qega meke va talotaṉia rini si Asa pa qega.

⁴¹Podeke pilipulea rini si Asa, meke vata sigitia rini sa Tamasa Hopena tadi na tie Izireli.

⁴²Muliṉi nia rini sa Nana ṉiniraṉira lavata, meke sa totoso pu rupahi Sa si arini koa rina dia kana,

⁴³sipu tavetia Sa sari Nana vina gilagila pa Izipi meke sari Nana tinavete variva magasadi pa pezara pa Zoani.

⁴⁴Va iliri ni ehara Sa sari na dia ovuku, pude di lopu boka napoi rini sari na kolodi.

⁴⁵Garunu lani Sa koari na tie Izipi sari na dodoa vari sigiti, meke sari na bakarao pu ṉovalia sa popoa.

⁴⁶Va ganini kupokupo Sa sari na dia linetelete, meke sari na vuvua si va gani ni kupokupo Sa.

⁴⁷Ṉovala ni ruku aesi Sa sari na dia huda vaeni, meke sari na dia huda sikamoa si va tamunu ṉovala ni aesi Sa.

⁴⁸Va hoqa mate ni ruku aesi Sa sari na dia bulumakao, meke va mate ni kapi Sa sari na dia rovana sipi.

⁴⁹Vata dogoro nia Sa koa rini sa Nana tinaṉaziri ṉiṉirana, sa Nana binugoro na tinahuara si va raza lani Sa, sipu garunu lani Sa sari na mateana variva mate.

⁵⁰Lopu tuqe pulea Sa sa Nana binugoro, meke lopu hite ruriti Sa sari na dia tinoa, ba va matei Sa si arini koasa oza.

⁵¹Va mate pani Sa sari doduru koburu koreo kenudi tadi doduru tatamana pa Izipi.

⁵²Beto asa, si turaṉa vura ni Sa pa Izipi sari Nana tie guana sepati, meke turaṉa ene guni ni na rovana sipi Sa pa qega si arini.

⁵³Turaṉa va sarei Sa si arini, ke lopu matagutu si arini, ba sari na dia kana si va lodu matei Sa pa kolo.

⁵⁴Turaṉa va kamoi Sa si arini koasa Nana popoa madina, koasa toqere sapu ele vagia Sa pa vinaripera.

⁵⁵Hadu pani Sa sari na butubutu huporodi pa kenudi rina tie varipera Izireli, meke paqaha va hia poni Sa koari na butubutu tie sa popoa, meke sari na dia vetuvetu si poni ni Sa koari na Nana tie.

⁵⁶Ba bugoro nia ri Nana tie sa Tamasa Ululuna Hola, meke podepodekia rini si Asa. Lopu va tabei rini sari Nana tinarae,

⁵⁷ba bugoro nia rini meke lopu koa soto koa Sa si arini, gua tugo rina tamadia pukerane, lopu ta raṉe si arini kekeṉoṉo gua tugo na tupi kokoqina.

⁵⁸Va bugoria rini si Asa koari na dia vasina hopena pa toqere, meke vata ṉaziria rini si Asa koari na dia beku.

⁵⁹Sipu dogoria Tamasa sa dia tamasa huporona si ta ṉaziri si Asa, meke kilu pani hokari Sa sari Nana tie Izireli.

⁶⁰Muliṉi pani hokaria Sa sa dia vasina vina vukivukihi sapu pozana Saelo, sapu sa vasina pu koa ia Sa pa Ipi Hopena pa varikorapadi ri Nana tinoni.

⁶¹Va malumi Sa sari nada kana pude raovo vagia sa Bokese Tanisa Vinariva Egoi, sapu sa vina gilagilana sa Nana ṉiniraṉira na tinolava.

⁶²Bugoro ni Sa sari nana tie soti, meke va malumi Sa si arini pude tava mate koari na dia kana.

⁶³Sari na tie vaqura si tava mate pa vinaripera, ke lopu boka varihaba sari na tudia vineki.

⁶⁴Sari na hiama si tava mate, meke lopu tava malumu sari na nabokodi rini pude kabo pa tinalotaṉa.