Sam 77:3-12

³Totoso balabala ia rau sa Tamasa, ba lopu manoto si rau; totoso koa noso meke balabala si rau, si malohoro sari na qua binalabala.

⁴Peqa si rau doduru boṉi, talotaṉa hola si rau, pa qua tinalotaṉa si lopu gilania rau sapu sa si kaqu zama nia rau.

⁵Balabala i rau sari na rane pu ele hola, meke sari na vuaheni pukerane.

⁶Pana boṉi si balabala sisigiti pa buloqu si rau; noso meke balabala si rau, meke guahe si balabala ia rau:

⁷“Vea, kaqu etulu pani gami sa Baṉara si gami? Vea, lopu kaqu qetu pule hokara ni gami Sa si gami?

⁸Vea kokoi mo Sa Nana tataru nabuna koa gami? Vea sari nana vina tatara koa gami doduru totoso si beto mo?

⁹Vegua, ele muliṉi nia tu Tamasa si pude koa tataru na taleosae? Vegua, ele hobe nia tinaṉaziri tu Sa sa ṉinoṉo?”

¹⁰Meke zama si rau pa qua binalabala soti, “Sa ta sigiti hola nia rau si hie mo, sapu doṉo guana sa Tamasa Ululuna Hola si lopu tokani gami kamahire.”

¹¹Kei Zihova, kaqu balabala i rau sari na Mua tinavete marilaedi, kaqu balabala pule la i rau sari na tinavete variva magasadi pu ele evaṉi Goi pukerane.

¹²Kaqu koa noso meke balabala va lohi la i rau sari doduru Mua tinavete, meke kaqu balabala i rau sari na Mua tinavete ṉiṉiradi variva magasadi.