Sam 72:6-13

⁶Sa tinolitolie tanisa baṉara si mani kekeṉoṉo na ruku pu va toai sari na duduli. Guana ruku remiremisi pu hoqa pude va bobosia sa pepeso

⁷Mani lovuru valeana la pa doduru vasina sa tinoṉoto tadi na tie koasa nana binaṉara; madi koa tie mamutu si arini ninae rane ka rane koa sa binule.

⁸Sa nana binaṉara si mani kamo la pa doduru popoa pa kalidi rina lamana, meke podalae pa Ovuku Iuparetisi meke kamo la koari na hukihukirina sa kasia popoa.

⁹Madi hoqa todoṉo pa kenuna Sa sari nana kana, meke madi tava kilasa gedi sarini pu kukiti nia.

¹⁰Sari na baṉara pa Sipeini meke koari na nunusa pa seu si kaqu la veko dia vinariponi koa sa, meke sari na baṉara pa Siba meke pa Seaba si kaqu paleke la dia vinariponi koa sa.

¹¹Madi todoṉo pa kenuna sa sari doduru baṉara, madi nabulu nia ri doduru butubutu si asa.

¹²Ura ele harupi sa saripu malaṉa meke tepa la tinokae koasa, meke sari na habahuala pu loke dia tinokae.

¹³Tataru ni sa saripu malohoro na habahuala, meke harupi sa sari na tinoa tadi pu koa pa tinasuna.