Sam 72:13-19

¹³Tataru ni sa saripu malohoro na habahuala, meke harupi sa sari na tinoa tadi pu koa pa tinasuna.

¹⁴Va sarei sa si arini pu ta naqoto gore meke ta ṉoṉovala pa dia tinoa; sari na dia tinoa si marilaedi hola koa sa.

¹⁵Mani toa va gelenae sa baṉara, mani ta poni koa sa sari na qolo pa Siba. Madi lopu makudo la varavara nia rini si asa, meke mani ta manae si asa koe Tamasa doduru totoso.

¹⁶Madi soku palapalae vuadi sari na linetelete pu toa pa pepeso, kamo koari na toqere ba madi opotamuni na linetelete, madi vua katakata si arini, gua tugo pa Lebanoni. Madi koa va soku koari na vasivasileana nomadi sari na tinoni, gua tugo rina ilaka pu opotamuni na duduli.

¹⁷Mani lopu ta muliṉae sa pozana sa baṉara, mani koa hola ninae rane sa pozana sa, gua tugo sa seunaena gua sa rimata. Madi tamanae tugo sari doduru butubutu pa kasia popoa koasa, meke sari doduru butubutu si kaqu poza ia rini, “Na tie tamanaena si asa,” gua.

¹⁸Vahesia se Zihova, sa Tamasa tadi pa Izireli, telena sa taveti sari doduru tiṉitoṉa variva magasadi.

¹⁹Mada vahesia sa pozana; marilaena sa Tamasa ninae rane. Mani siṉia Nana ṉiniraṉira na ṉinedalana sa doduru kasia popoa.