Sam 69:25-32

²⁵Madi tava ivulu sa dia vasina pu koa ia rini; madi mate eoṉo beto sarini pu koa koari na dia ipi.

²⁶Ṉoṉovali rini sarini pu va kilasi Goi, meke zama pesipesi rini sari na tinasigiti tadirini pu va bakorai Goi.

²⁷Mu varitomotomoi ni Goi sari na vina kilasadi, madi lopu somana vagia rini si keke hinia koasa Mua tinaharupu.

²⁸Madi ta huara palae pozadi si arini koasa buka tinoa; madi lopu ta kubere somana pozadi si arini koari na tie toṉoto.

²⁹Ba arau si koa ta sigiti, meke balabala mamata, kei Tamasa, Mu toka nau, Mamu harupau.

³⁰Kaqu kera la nia rau si keke kinera vinahesi koasa pozana sa Tamasa. Kaqu va lavatia rau si Asa pa qua zinama leana koa Sa.

³¹Gua asa si variva qetu koasa Tamasa, hola nia sa vina vukivukihi bulumakao babe keke bulumakao kokoreo nomana valeana.

³²Sarini pu ta ṉoṉovala si kaqu dogoria sapu gua asa, meke kaqu koa qetu; gamu pu hata ia sa Tamasa si kaqu ta sovutu va ṉiṉira.