Sam 68:20-29

²⁰Sa nada Tamasa si na Tamasa variharupi. Asa tugo se Zihova sa nada Baṉara sapu va sare gita pa minate.

²¹Ba kaqu va puzulu ṉaepi Tamasa sari Nana kana, saripu lulidi sari na hahanana seadi.

²²Zama sa Baṉara, “Kaqu turaṉa pule maeni Rau sarini pu koadi pa Basani; kaqu va pule maei Rau saripu koadi pa hubi lamana,

²³pude mu ovovae ni sari na eharadi; pude sari na mia siki ba kaqu vagi gedi hinia tugo pude meai sari na eharadi rini,” gua si Asa.

²⁴Ke Tamasa, sa Mua inene va mataqara si ta dogoro koari doduru tie, sa puku vinarigara tie te Tamasa sa qua Baṉara sapu ene nuquru pa Nana vasina hopena.

²⁵Sari na tie kerakera si luli pa mudimu Goi, meke sari na vineki pu kizai sari na tabarini si pa kokorapana, meke sari na tie mikemike si luli mumudi mae.

²⁶Mi Vahesia sa Tamasa koari Nana vinarigarae tinoni, gamu na tutina e Zekopi, mi vahesia se Zihova.

²⁷Sa butubutu Benisimane sapu hitekena koari doduru si kekenu, meke luli la sari na koimata pa butubutu Ziuda koasa dia pukuna, meke luli mudi la sari na koimata pa Zeboloni meke Napitalai.

²⁸Ke Tamasa, Mu vata dogoro nia sa Mua ṉiniraṉira; sa Mua ṉiniraṉira gua sapu tavetavete nia Goi koa gami totoso lahe,

²⁹koasa Mua Zelepade pa Zerusalema, vasina atu luari rina baṉara sari na dia vinariponi koa Goi.