Sam 55:4-21

⁴Matagutu na tarazuzu sa buloqu, meke sa tinasuna tanisa minate si naqotau.

⁵Minatagutu na ziziziri si rau, tava kilasa pa tinaduaṉa sa tiniqu.

⁶Kei, be ari tatapuruqu gua mo na kukuva, maqu tapuru taloa qua pa seu, maqu la koa magogoso qua.

⁷Uve, maqu tapuru va seu la qua pa soloso qega, maqu la koa qua vasina.

⁸Maqu tuturei la hata ia si keke qua aqoroana pude qu tome koari na qua kana, arini pu guana givusu pa raneboṉi.

⁹Kei Baṉara, Mu huara pani gedi sari na dia minizimizi, sina dogoria rau sa vinari kakatorae na ṉinovaṉovala pa korapana sa vasileana lavata.

¹⁰Rane na boṉi si ene vari likohae si arini panaulu koari na gobana sa vasileana, evaṉi rini pa korapana sa vasileana sari na tinasuna na ṉinovaṉovala.

¹¹Na tinahuara si koa pa korapana sa vasileana; soku hola sari na ṉinovaṉovala na sinekesekei koari na siraṉa koa sa vasileana.

¹²Be guana qua kana si ṉoṉovalau na va sisire nau, si boka va kamoi rau. Be na kana sapu kukiti nau meke varipera koa rau, si kaqu tome nia rau si asa.

¹³Ba agoi mo, na qua baere soti, na turaṉaqu, meke na tie gua mo arau.

¹⁴Gita mo sapu hoke baere valeana, meke hoke ene varigara la pa vinahesi pa vetu te Tamasa.

¹⁵Madi mate makamakata gedi sari na qua kana, madi gore la gedi pa vasina tadi na tie matedi sipu lopu ele mate rini. Na kinaleana si koa koa ri na dia vetu soti meke pa bulodi.

¹⁶Ba tepa la si rau koe Zihova sa Tamasa, meke kaqu harupau Sa.

¹⁷Sari na qua tinalotaṉa si va sage la i rau koa Sa, pana munumunu, korapa rane, na veluvelu; meke kaqu avosia Sa sa mamalaiṉiqu.

¹⁸Rapata varikali nau rina qua kana si rau, ba kaqu va sare au Sa, meke lopu kaqu ari bakoraqu.

¹⁹Sa Tamasa sapu koa totoli ninae rane ka rane, si kaqu avosau si rau meke kaqu va kilasi Sa sari na qua kana; sina korodia hobei rini sari na dia tinoa meke korodia pamaṉa nia rini si Asa.

²⁰Sa qua baere koana mo si rapata ni sari nana baere, ke kumatia sa sa nana vina tatara.

²¹Sa nana vivinei si memehe hola nia sa bata, ba sa bulona si siṉia na kinukiti, sari nana zinama si lomoso guana oela olive, ba variva bakora guari na magu ta avaṉana si arini.