Sam 50:2-21

²Sa Tamasa si ṉedala vura mae pa Zaione, sa vasileana lavata sapu gotogoto mate pa Nana tinolava!

³Korapa mae sa nada Tamasa, ba lopu mae golomo, keke nika huruṉuna si koa pa kenuna Sa, meke na raneboṉi ṉiburuna si koa pa vari likohaena Sa.

⁴Tiokia Tamasa sa Maṉauru panaulu meke sa pepeso, pude kekeṉoṉo Nana tie va sosode pana varipitui ni Sa sari Nana tie.

⁵“Mi varigara mae koa Rau, gamu doduru qua tie tava madimia. Gamu sapu somana tavetia sa vinariva egoi koa Rau pa vina vukivukihi.”

⁶Sa maṉauru si tozi vura nia sa Nana tinoṉoto, ura telena e Zihova sina tie varipitui.

⁷“Kei Izireli, gamu na Qua tinoni, Mi avoso mae, meke kaqu zama si Rau, kaqu tozi vura ni Rau sari na mia sinea. Arau se Zihova, sa mia Tamasa.

⁸Lopu nore gamu Rau pa ginuadi rina mia vina vukivukihi, meke koari na mia vinariponi vina uququ pu paleke mae ni gamu doduru totoso!

⁹Ba lopu okoro nia Rau si pude paleke mae nia gamu si keke bulumakao kokoreo, babe keke qoti pa mia bara.

¹⁰Ura sari doduru kurukuru pa hiqohiqo si Taqarau, meke sari na rovana bulumakao koari na tina toqere.

¹¹Sari doduru kurukuru tapuru pa galegalearane, meke sari doduru kurukuru ṉame pu koa pa pepeso si Taqarau!

¹²Be ovia si Rau, lopu kaqu tepa koa gamu! Ura sa kasia popoa meke sari doduru pu koa vasina si Taqarau!

¹³Vegua, hoke hena masa bulumakao na napo ehara qoti si Rau? Lokari!

¹⁴Mu ponia koe Zihova sa vina vukivukihi zinama leana, mu va gorevura i sari na mua vina tatara koasa Tamasa Ululuna Hola!

¹⁵Mu tepa mae koa Rau pa rane tinasuna, meke kaqu va sare igo Rau, pude boka va lavatau,” gua se Zihova.

¹⁶Ba koari na tie kaleadi si zama guahe sa Tamasa, “Lopu garo si pude zama ni gamu sari na Qua tinarae, babe vivinei nia sa Qua vinariva egoi.

¹⁷Ura lopu hiva tava tumatumae si gamu, meke kilui gamu sari na Qua tinarae.

¹⁸Pana dogoria gamu si keke tie hikohiko si baeria gamu si asa, meke koa somanae si gamu koari na tie barabaratadi.

¹⁹Doduru totoso si tupiti nia mo gamu si pude zama ni sari na zinama kaleadi, meke lopu hite pamaṉa nia gamu si pude zama kokoha.

²⁰Tupiti nia mo gamu si pude zutui sari kasa tasimia, meke pude hata vura ni sari na dia sinea.

²¹Evaṉi mo gamu sari doduru pu gua sara, ba lopu kulu si Rau. Gua asa ke balabala ia gamu, sapu gugua mo gamu si Rau, gua. Ba kamahire tu si Maqu gegesi gamu, Maqu va bakala atuni gamu sari na mia sinea.