Sam 45:3-12

³Mu palekia sa mua magu varipera, ke agoi na tie varane pa vinaripera. Agoi si na baṉara lavata ṉiṉiramu, meke poko nia goi sa tinolava variva magasana.

⁴Mamu ene la pa mua tinolava, mamu lavelave hukata nia sa hinokara meke na tinoṉoto. Mamu mataqara koasa mua ṉiniraṉira koari doduru Mua tinavete pa lima mataomu.

⁵Ṉarudi sari na mua tupi, ke qaha nuquru si arini pa bulodi ri na mua kana. Hoqa todoṉo pa kenumu Goi sari na butubutu pa kasia popoa.

⁶Ke Tamasa, sa Mua habohabotuana Baṉara si koa hola ninae rane ka rane. Koa totoli ni Goi sari na Mua tinoni pa tinoṉoto.

⁷Tataru nia goi sa tinoṉoto, ba kukiti nia goi sa kinaleana. Gua asa ke vizatigo, meke va madigo sa mua Tamasa si goi, pude poni nigo sa qinetuqetu nomana, hola ni sari doduru turaṉamu.

⁸Tava humaṉa lea sari na mua poko koa sa moa, na aloesi, meke na kasia, sari na tie mikemike si va qetuqetu igo koasa mua vetu baṉara sapu tava sarie kadakada livo elopaniti.

⁹Sari na tudia vineki rina baṉara si koa somanae koari na barikaleqe pu ta pamaṉaedi, meke pa kali mataomu si turu nana sa kalaho sapu tava sarie qolo ṉedala.

¹⁰Tuqu vineki, mu avoso valeana mae koa rau. Mamu veko pani sari na mua butubutu soti, meke sa mua tatamana soti.

¹¹Okoro nia sa baṉara sa mua tinolava, asa tu sa mua baṉara, ke mamu va lavatia.

¹²Sari na tie koasa vasileana nomana pa Taera, si kaqu paleke ponigo vinariponi, sari na tie tagotagodi hola ba kaqu paleke ponigo soku votivotiki vinariponi arilaedi.