Sam 33:1-14

¹Gamu doduru tie toṉoto, mi velavela vahesia se Zihova pa qinetuqetu. Sa vinahesi si garo koari pu va tabea si Asa.

²Mi mikemike vahesia se Zihova, mi kera va lobere la koa Sa koari na mike soku madorodi!

³Mi kera la nia koa Sa si keke kinera vaqura, mikemike pa mia binokaboka, mamu velavela va ululae la koa Sa pa qinetuqetu!

⁴Ura sa zinama te Zihova si hinokara na toṉoto, meke ta ronuena si Asa koari doduru Nana tinavete.

⁵Qetu nia e Zihova sa tinoṉoto meke sa vinilasa va toṉoto. Sa nana tataru nabuna si koa pa doduruna sa kasia popoa.

⁶Pa zinama te Zihova si tava podaka sari na maṉauru, sa rimata, na sidara, na pinopino, meke doduru likakalae pu koa vasina.

⁷Varigara ni Sa sari na kolo lamana pa keke vasina, va naqiti Sa si arini pa vasina lohidi, guana kopu ni Sa pa keke lose.

⁸Sari doduru pa kasia popoa si madi pamaṉa nia se Zihova; madi va lavatia ri doduru tinoni pa kasia popoa si Asa.

⁹Ura zama si Asa meke ta kuri sa kasia popoa, pa Nana zinama si podaka vura mae sari doduru likakalae.

¹⁰Huara pani e Zihova sari na hiniva kaleadi tadi na butubutu meke hukati Sa si arini, pude di lopu gorevura gua saripu kuhana veko ni rini!

¹¹Ba sari Nana minizimizi na Nana ṉati hiniva si turu hola ninae rane ka rane.

¹²Tamanae tugo sa butubutu sapu e Zihova sa dia Tamasa, meke sari na tinoni pu vizati Sa pude Nana telena soti.

¹³Doṉo gore mae gua pa Maṉauru sa Tamasa, meke dogoro betoi Sa sari doduru tinoni pa kasia popoa.

¹⁴Na Baṉara lavata si Asa, meke doṉo gore mae koari doduru tinoni pu koa pa pepeso.