Sam 31:20-23

²⁰Tomei Goi si arini pude tava sare pa kenumu Goi, koari na ṉinovaṉovala tadi na tie. Va aqori Goi si arini pa keke vasina tometomeana kapae koa Goi, meke tava ilolo koari na zinama ṉoṉovala tadi na kana.

²¹Mani tava lavata se Zihova, ura ele va sare au Sa sipu mae rapata vari likohae nau rina qua kana.

²²Pa qua minatagutu si balabala si rau, sapu ele tava seu si rau pa kenumu Goi, gua. Ba ele avosi tu Goi sari na qua tinepatepa, totoso tepa atu tinokae si rau koa Goi.

²³Mi tataru nia se Zihova, gamu doduru Nana tie raṉeraṉe! Ura va sarei e Zihova sarini pu raṉe zoṉazoṉa ia, ba va kilasi Sa saripu vahesi puleni.