Sam 18:3-41

³Tepa tinokae si rau koe Zihova, sapu garona pude tava lavata, meke harupau Sa koari na qua kana.

⁴Sa tinasuna tana minate si koa pa vari likohaequ, sari na bogusu tinahuara si nobi tamunau si arau.

⁵Sari na tinasuna variva matedi si koa pa vari likohaequ, meke sa tinapusi tana minate si soqo au.

⁶Pa korapa qua tinasuna si tepa la si rau koe Zihova. Tepaia rau sa tinokae koa sa qua Tamasa, pa korapana sa Nana Zelepade si avosia Sa sa mamalaiṉiqu, meke sa qua kinabo si ele avosia Sa.

⁷Ke ziziziri sa pepeso meke niniu, meke madidiri hubidi sari na toqere, sina ta ṉaziri sa Tamasa.

⁸Na tuṉaha si vura pa isuna meke na nika huruṉuna meke na motete leradi si vura pa ṉuzuna.

⁹Sira tukelia Sa sa maṉauru, meke gore mae, na lei huporona si koa pa kauru Nenena.

¹⁰Koi pa keke mateana tapuruna meke gore mae si Asa, rerege mae si Asa koasa givusu.

¹¹Va poko pule nia si Asa koasa huporo, meke sari na lei muhodi pu siṉia na kolo si koa pa vari likohaena.

¹²Sari na ruku kabukabue aesi meke na malara nika, si vura mae pa ṉinedalana Sa.

¹³Meke lulusu guana paka maṉauru se Zihova, meke ta avoso sa mamalaiṉina sa Tamasa Ululuna Hola.

¹⁴Gonani Sa sari Nana tupi pude va talahuaraei sari Nana kana. Sa malakapina sa kapi, si va goveti Sa si arini.

¹⁵Kei Zihova, sipu ta ṉaziri ni na norei Goi sari na Mua kana, sari na lolomo pa hubi lamana, meke sari na sinokiraena sa pepeso si ta dogoro, koasa givusuna sa siniṉomu Goi.

¹⁶Qaqama gore mae pa Maṉauru sa Tamasa meke harupau Sa, meke daku vura nau Sa pa lamana peava.

¹⁷Harupau Sa si rau koari na qua kana ṉiṉiradi, meke koari doduru pu kukiti nau, ura ṉiṉira hola nau rini si rau.

¹⁸Sipu korapa koa si rau pa tinasuna, si mae rapata nau rini, ba va sare au e Zihova.

¹⁹Toka nau Sa meke va seu au Sa pa tinasuna, harupau Sa sina qetu nau Sa.

²⁰Pia au e Zihova si arau, sina tavete va toṉoto si rau. Mana nau Sa, sina viaqu, lopu sea si rau.

²¹Ele va tabei rau sari na tinarae te Zihova, meke lopu va mudia rau sa qua Tamasa.

²²Kopu beto ni rau sari doduru Nana tinarae, meke lopu hite va kari rau sari na Nana ginarunu.

²³Loke tinazutuqu si rau pa kenuna Sa, meke ele kopu pulenau si rau pude lopu tavete va sea.

²⁴Gua asa ke pia au Sa si arau, sina tavete va toṉoto si rau, meke gilania Sa sapu loke qua sinea si rau.

²⁵Kei Zihova, ta ronuemu si Goi koarini pu soto va nabu koa Goi, meke va dogoro nia Goi sa Mua tinoṉoto koari na tie toṉoto.

²⁶Via si Goi koarini pu via, ba koari na tie sekesekei si guana tie sekesekei guni Nigo rini.

²⁷Ura harupi Goi saripu va pepekae, ba va hoqai Goi sarini pu vahesi puleni.

²⁸Kei Zihova, va toa ekoa Goi sa qua kalalasa, ke Tamasa, va kalalasa ia Goi sa qua hinuporo.

²⁹Poni nau Goi sa ṉiniraṉira pude rapati sari na qua kana, meke sa vinarane pude boka va kilasia rau sa dia vasina varipera ṉiṉirana.

³⁰E Tamasa si toleṉe gua toṉotodi sari Nana tinavete; ta ronu hola sari Nana zinama! Guana lave si Asa koa ri doduru pu tome koa Sa.

³¹E Zihova mo telena si na Tamasa, Asa mo telena sa nada Patu aqoroana.

³²Asa mo sa Tamasa sapu va ṉiṉira au, toka nau Sa pa siraṉa gotogotona.

³³Va boka au Sa pude ene koari na vasina tasunadi pa toqere, meke lopu kaqu hite ta tubarae si arau.

³⁴Va tumatumae nau Sa pude varipera, ke boka ṉavea rau sa bokala ṉiṉirana hola.

³⁵Kei Zihova, lavelave hukata nau Agoi. Pa Mua ṉiniraṉira si kopu nau Agoi, meke koasa Mua vina pepekae si tava lavata si rau.

³⁶Ele va labe poni au Goi sa siraṉa, ke lopu vagi au ri na qua kana, meke lopu hite hoqa si arau.

³⁷Hadu luli rau sari na qua kana meke va kilasi rau si arini, lopu hite noso si rau osolae va mate betoi rau si arini.

³⁸Seke va hoqai rau si arini, ke lopu boka turu pule. Mate eko mo pa kenuqu rau si arini.

³⁹Ele poni nau Goi sa ṉiniraṉira pa vinaripera, meke va todoṉi sari na qua kana pa kenuqu rau.

⁴⁰Ele va govete taloai Goi koa rau sari na qua kana, meke ele va matei rau saripu kukiti nau.

⁴¹Tepa tinokae, ba loke tie harupi si arini. Tepa la si arini koe Zihova, ba lopu olaṉi Sa.