Sam 119:41-115

⁴¹Kei Zihova, Mu tataru nau pa Mua tataru nabuna, Mu va sare au koari na qua kana gua sapu ele va tatara nia Goi.

⁴²Pude qu boka olaṉi rau sarini pu zama ṉoṉovalau, sina kalavarae si rau koari na Mua Zinama.

⁴³Va boka au pude tozi vura nia sa hinokara doduru totoso, sina raṉei rau sari na Mua vinilasa.

⁴⁴Kaqu va tabei rau sari na Mua tinarae ninae rane ka rane,

⁴⁵meke kaqu koa ta rupaha si rau, sina podekia rau pude va tabei sari na Mua vina tumatumae.

⁴⁶Kaqu tozi vura ni rau sari na Mua vina totolie koari na baṉara, meke lopu kaqu tava kurekure si rau.

⁴⁷Na vagi nia qinetuqetu rau sa vina tabedi rina Mua tinarae, sina tataru ni rau si arini.

⁴⁸Pamaṉa ni na tataru ni rau sari na Mua tinarae, kaqu balabala va lohi la i rau sari na Mua ginarunu.

⁴⁹Mu lopu muliṉi nia sa Mua vina tatara koa rau sa Mua nabulu, ura raṉego rau pude poni nau gua sapu va tatara nia Goi.

⁵⁰Sa Mua vina tatara asa si va manotau pa qua totoso tasuna, sina ele va tatara nau Goi sa tinoa.

⁵¹Saripu vahesi pule ni si pesipesi au doduru totoso, ba arau si lopu hite luaria sa Mua tinarae.

⁵²Kei Zihova, sipu balabala i rau sari na Mua vinilasa pukeranedi, si koa manoto si rau.

⁵³Ta ṉaziri hola ni rau sari na tie huporo pu sekei sari na Mua tinarae.

⁵⁴Pa qua tinoa papakana pa pepeso si kerakera ni rau sari na Mua ginarunu.

⁵⁵Pana boṉi si balabala Igo rau Zihova, meke hoke balabala i tugo rau sari na Mua tinarae.

⁵⁶Vagi nia qinetuqetu rau sa vinatabedi rina Mua vina tumatumae.

⁵⁷Zihova, Agoi mo si okoro nigo rau pa doduruna sa qua tinoa; va tatara nia rau si pude va tabei sari na Mua zinama.

⁵⁸Pa doduruna sa buloqu si hata ia rau sa Mua tinamanae, gua sapu ele va tatara nia Goi.

⁵⁹Sipu balabala i rau sari na qua hahanana na tinavete, kekere la si rau pude kaqu luli i sari na Mua vina totolie.

⁶⁰Lopu aqa si rau, ba va tabe i mo rau sari na Mua tinarae.

⁶¹Sekesekei nau rina tie kaleadi si rau pude tavete va sea, ba lopu muliṉi ni rau sari na Mua tinarae.

⁶²Pana korapa boni si vaṉunu si rau meke vahesigo, sina toṉoto sari na Mua tinarae.

⁶³Arau si na dia baere arini pu pamaṉa nigo, meke luli i sari na Mua vina tumatumae.

⁶⁴Kei Zihova, sa kasia popoa si siṉia na Mua tataru nabuna, Mu va tumatumae nau sari na Mua ginarunu.

⁶⁵Kei Zihova, ele kopu nia Goi sa Mua vina tatara, meke ele tavete va leana si Goi koa rau sa Mua nabulu.

⁶⁶Mu poni nau sa vinilavilasa va toṉoto meke sa tinumatumae. Ura va hinokari rau sari na Mua tinarae.

⁶⁷Sipu lopu ele va kilasa au Goi si hoke ene sea si rau, ba kamahire si va tabe i rau sari na Mua zinama.

⁶⁸Tavete valeana, meke tataru na vatukana si Goi, Mu va tumatumae nau sari na Mua ginarunu.

⁶⁹Saripu vahesi pule ni si totozi va hakehakei nau si rau, ba pa doduruna sa buloqu si va tabe i rau sari na Mua vina tumatumae.

⁷⁰Sari kasa tie sara si loke dia ginilagilana; ba arau si qetuqetu ni sari na Mua tinarae.

⁷¹Leana koa rau sa vina kilasaqu, sina gua asa meke boka va nonoga i rau sari na Mua ginarunu.

⁷²Leana hola koa rau sari na Mua tinarae, hola ni sari na tina qolo na siliva.

⁷³Agoi tavete au si rau, meke kopu nau Goi; Mu va tumatumae au pude qu tumae ni sari na Mua tinarae.

⁷⁴Sarini pu pamaṉa Nigo si kaqu qetu pana dogorau ri, sina kalavarae si rau koari na Mua zinama.

⁷⁵Kei Zihova, gilania rau sapu toṉoto sari na Mua vinilavilasa. Meke ta ronuena sa Mua vina kilasa koa rau.

⁷⁶Maqu koa manoto si rau koasa Mua tataru nabuna, gua sapu ele va tatara nia Goi koa rau sa Mua nabulu.

⁷⁷Mu tataru nau na taleoso nau, meke kaqu toa si rau, sina qetu ni rau sari na Mua tinarae.

⁷⁸Saripu vahesi pule ni si madi koa kurekure ni sari na dia zinutu kokoha koa rau; ba arau si kaqu balabala va lohi la i rau sari na Mua vina tumatumae.

⁷⁹Sarini pu pamaṉa Nigo si madi mae koa rau, pude madi gilani sari na Mua vina totolie.

⁸⁰Maqu va tabe valeana i sari na Mua ginarunu, pude qu lopu tava kurekure si rau!

⁸¹Kei Zihova ele mabo sa qua tinoa pa inaqamu Goi pude harupau; ba raṉea rau sa Mua zinama.

⁸²Ele mabo sari na mataqu na hakehakei Nigo rau koasa Mua vina tatara; nanasa guahe si rau, “Panavisa kaqu va manoto au e Zihova,” gua si rau.

⁸³Ele loke laequ mo si rau, gua tugo na ututuvuana kolo lulurana, ba lopu hite muliṉi ni rau sari na Mua ginarunu.

⁸⁴Ve seunae gua si kaqu aqa si rau? Panavisa kaqu va kilasi Goi saripu ṉoṉovalau?

⁸⁵Sari na tie vahesi puleni pu sekei sari na Mua tinarae si sekesekei nau, pude va hoqa au, gua.

⁸⁶Sari na Mua tinarae si ta ronuedi; sari na tie kaleadi si ṉoṉovala au pa kinohakoha, ke Mamu toka nau!

⁸⁷Tata hokara va mate au rini si rau, ba soto va nabu si rau koari na Mua vina tumatumae.

⁸⁸Koa sa Mua tataru nabuna si Mu va sare au pa qua tinoa, pude maqu va tabei sari na Mua vina totolie.

⁸⁹Kei Zihova sa Mua zinama si koa hola ninae rane; koa hola si asa pa maṉauru.

⁹⁰Kopu ni Goi sari na Mua zinama koari doduru sinage na sage, ele sokirae nia Goi sa pepeso meke koa hola si asa.

⁹¹Sari doduru tiṉitoṉa si koa hola kamoa pa rane ṉinoroi, sina koa gua koasa Mua zinama, meke sina na Mua nabulu sari doduru.

⁹²Be guana lopu sa Mua tinarae si na ṉatina sa qua qinetuqetu, si ele mate tu si rau koari na qua tinasigiti.

⁹³Lopu kaqu hite muliṉi ni rau sari na Mua vina tumatumae, ura koarini mo si poni nau Goi sa tinoa.

⁹⁴Tamugoi mo si rau, ke Mu harupau! Ura podekia rau pude kopu ni sari na Mua vina tumatumae.

⁹⁵Sari na tie kaleadi si korapa opo aqa nau pude va mate au, ba arau si korapa balabala va lohi la i rau sari na Mua vina totolie.

⁹⁶Ele gilania rau sapu sari doduru tiṉitoṉa si koa dia kokoidi, ba sa Mua tinarae si gotogoto puta.

⁹⁷Kei, tataru hola nia rau sa Mua tinarae! Balabala va lohi la ia rau si asa doduru totoso.

⁹⁸Sa Mua tinarae si koa koa rau doduru totoso, meke toka nau sa pude tumatumae hola ni sari na qua kana.

⁹⁹Gilagilana hola ni rau sari doduru qua tie va tumatumae, sina balabala va lohi la i rau sari na Mua vina tumatumae.

¹⁰⁰Tumatumae hola ni rau sari na tie koadi, sina va tabei rau sari na Mua tinarae.

¹⁰¹Va talevara ni rau sari doduru hahanana kaleadi, pude maqu boka kopu ni sari na Mua zinama.

¹⁰²Lopu hite kilu i rau sari na Mua tinarae. Ura na Agoi mo telemu sa qua tie va tumatumae.

¹⁰³Avoso lea koa rau sari na Mua zinama, lomoso hola nia sa sa namu zipale.

¹⁰⁴Vagi ni tinumatumae rau sari na Mua tinarae, gua asa ke hakohako ni rau sari doduru hahanana seadi.

¹⁰⁵Sa Mua zinama si na zuke pa nenequ, meke na kalalasa pa qua siraṉa.

¹⁰⁶Ele tokotokoro nia rau sa qua vina tatara, pude va tabe i sari na Mua tinarae toṉotodi.

¹⁰⁷Kei Zihova, ta sigiti hola si rau, Mu va sare au pa minate, gua sapu ele va tatara nia Goi.

¹⁰⁸Mu va egoa sa qua vinahesi pu poni Igo rau, kei Zihova, Mamu va tumatumae nau sari na Mua tinarae.

¹⁰⁹Vala ia rau pa tinasuna sa qua tinoa doduru totoso, ba lopu muliṉi nia rau sa Mua tinarae.

¹¹⁰Sekesekei nau rina tie kaleadi pude va mate au, gua; ba lopu hite sekei rau sari na Mua vina tumatumae.

¹¹¹Sari na Mua vina totolie si na qua vinagi ninae rane ka rane, arini tugo si na qua qinetuqetu pa buloqu.

¹¹²Ele vizatia rau si pude va tabei sari na Mua ginarunu osolae beto sa qua tinoa.

¹¹³Kukiti ni rau sarini pu ruarabeke pa dia sinoto koa Goi, ba tataru nia rau sa Mua tinarae.

¹¹⁴Agoi si na qua tinokae meke na qua lave. Raṉei rau sari na Mua zinama.

¹¹⁵Mi taloa koa rau gamu doduru pu tavete va kaleana. Arau si kaqu va tabe i sari na tinarae tanisa qua Tamasa.