SALMOS 94:1-21

¹TOTECO, ximonexti. Ta tiDios catli tijpiya motequi para tiquincuepilis catli amo cuali techchihuilijtoque tocualancaitacahua.

²Ximotlanana huan xijtlatzacuilti ni tlali. Nochi catli mohueyimatij xiquintlatzacuilti quen quinamiqui.

³TOTECO, ¿hasta quema tlamis tlatlanise huan mopaquilismacase nopa masehualme catli amo aqui quitlepanitaj?

⁴¿Hasta quema tlamis tetlaijilhuise huan mohueyimatise nopa tlajtlacolchijca masehualme?

⁵TOTECO, inijuanti tlahuel quintlaijiyohuiltíaj huan quintequipacholmacaj momasehualhua catli tiquinicnelía.

⁶Inijuanti quinmictíaj cahual toahuihua catli ehuani ipan sequinoc altepeme huan catli icnotzitzi.

⁷Huan quiijtohuaj para ta, TOTECO, amo tiquita, niyon amo timomaca cuenta. Quej nopa quiijtohuaj tlen ta catli tiiTeco tohuejcapan tata Jacob.

⁸Amojuanti catli anhuihuitique ipan ni masehualme, xijmachilica. ¿Hasta quema anquitequihuise amotlalnamiquilis para antlamachilise?

⁹Toteco quisencajqui tonacashua, huajca ¿anmoilhuíaj para amo quicaquis catli anquiijtohuaj? Yaya quichijchijqui toixteyol, huan ¿anmoilhuíaj para amo quiitas catli anquichihuaj?

¹⁰Yaya quintlatzacuiltía masehualme ipan nochi tlalme, ¿anmoilhuíaj amo anmechtlatzacuiltis nojquiya? Yaya quimati nochi catli pano, huan ¿anmoilhuíaj amo quimati tlaque anquichihuaj?

¹¹TOTECO quiiximati inintlalnamiquilis masehualme huan quimati para san moilhuíaj tlamantli catli amo cuali.

¹²Pero cuali ininpanti nopa masehualme catli ta, TOTECO, tiquintlatzacuiltis para tiquintlalnamictis. Ya nopa quinpalehuía para quitoquilise moojhui, huan para monejnemiltise xitlahuac ipan motlanahuatilhua.

¹³Huan para itztose ica paquilistli quema ajsis nopa tonali catli fiero. Pero nopa masehualme catli amo quitlepanitaj TOTECO mochihuilíaj se ostotl para ipan momasiltise huan motzontlamiltise.

¹⁴Pampa TOTECO amo quintlahuelcahuas imasehualhua pampa inijuanti iaxcahua.

¹⁵Se tonal Toteco tetlajtolsencahuas xitlahuac, huan nochi catli itztoque ica ininnemilis xitlahuac, inijuanti paquise miyac.

¹⁶¿Ajqueya nechmanahuis ininmaco nopa mosisinijca masehualme? ¿Ajqueya nechmocuitlahuis tlen nopa tlaixpanoca masehualme?

¹⁷Sintla Toteco amo nechpalehuijtosquía, huajca noyoltzi ya eltosquía campa tlatzitzicatoc pampa ya nimictosquía.

¹⁸Na nitzajtzic huan niquijto: “TOTECO, xixitlaca noicxihua.” Huan yaya nechtlasojtlac huan nechmaquixti.

¹⁹NoTeco, quema san nimonejnehuilía tlen miyac tequipacholi huan san ya nopa nijmati, ta techyoltlalía. Techchihua ma nimotemachi ipan ta huan techmaca paquilistli.

²⁰Se tlanahuatijquetl catli amo quichihua catli xitlahuac, amo tijcahuas para mosentilis ica ta. Niyon amo itztoc mohuaya catli quichihua se tlanahuatili catli amo xitlahuac.

²¹Pero tlanahuatiani quej nopa mosentilíaj huan mocamanalhuíaj para quenicatza quimictise se catli amo tleno quichijtoc, o se catli cuali monejnemiltía.