SALMOS 89:3-36

³Ta tiquijtojtoc para tijchijqui se camanal sencahuali ica motequipanojca David catli tijtlapejpenijtoc. Titlatestigojquetzqui catli tijchihuilis.

⁴Tiquilhui para se iixhui mosehuis ipan isiya campa yaya tlanahuatía, huan nopona tlanahuatis para nochipa.

⁵TOTECO, catli itztoque ipan ilhuicac mitzpaquilismacaj por nochi nopa tiochicahual nextili catli tijchihua. Huan miyac millones motequihuajcahua mitzhueyimatise pampa titemachtli.

⁶Pampa ipan nochi ilhuicac amo aqui seyoc catli san se quen ta, Toteco Dios. Huan niyon se tequihuajquetl amo quipiya chicahualistli catli quiaxilía catli tijpiya ta, Toteco.

⁷Toteco Dios, ta nelía tihueyi huan titemajmati. Nochi motlatzejtzeloltijca tequihuajcahua mitztlepanitaj. Quena, nochi catli mitzyahualojtoque, majmahuij quema moquetzaj moixpa.

⁸TOTECO, ta tiDios Catli Tijpiya Nochi Chicahualistli, ¿ajqueya seyoc tlahuel quipiya chicahualistli quen ta? ¡Amo aqui seyoc! San ta TOTECO tlahuel tijpiya chicahualistli. San ta nelía titemachtli.

⁹San ta tihueli tijnahuatía nopa hueyi atl quema mosisinía huan mocoxonía chicahuac. Tijtlacahualtía huan quichihua catli tiquilhuía.

¹⁰Ta tijtzontlamilti nopa catli temajmatiyaya ipan hueyi atl. Ica mohueyi chicahualis tiquinsemanqui mocualancaitacahua.

¹¹Ta moaxca ilhuicactli, tlaltipactli huan nochi catli onca, pampa nochi tijchijchijqui ta.

¹²Tijchijchijqui nopa norte huan sur. Nopa tepeme Tabor huan Hermón paquij pampa ta tiquinchijchijqui.

¹³Moajcol tlahuel quipiya chicahualistli. Huan monejmac quipiya tetili huan miyac yajatili para tlatlanis.

¹⁴Motlanahuatilis motlatzquilijtoc ipan ome tlamantli: Titetlajtolsencahua xitlahuac huan tijchihua catli cuali. Titeicnelía huan tiquijtohua catli melahuac.

¹⁵Nelía paquij nopa masehualme catli quicaquij nopa tlapitzali catli quinnotza ma mitzhueyichihuaca, TOTECO. Inijuanti nemise nelía monechca huan ta tiquintlahuilis.

¹⁶Semilhuitl mopaquilismacase ipan ta pampa tlahuel tihueyi huan tixitlahuac.

¹⁷Pampa san ta tijpiya mohueyitilis huan tiquinfuerzajmaca. Timasehualme tijpiyaj chicahualistli pampa ta techpalehuía.

¹⁸Quena, Toteco Dios, ta catli titlatzejtzeloltic techmocuitlahuía tojuanti ipan tlali Israel. Ta titotlanahuatijca.

¹⁹Ipan se tlanextili tijcamanalhui motlatzejtzeloltijca tlajtol pannextijca huan tiquilhui: “Tlen nochi masehualme nijtlapejpenijtoc se yejyectzi telpocatl catli tlahuel motemaca, huan nijtequitlali ma eli tlanahuatijquetl para na.

²⁰Quena, nijpantijtoc notequipanojca David huan nicaltijtoc ica nopa aceite catli ica niteiyocatlalía para ma nechtequipanoca.

²¹Nijchihuas ma eli temachtli huan nijmacas chicahualistli.

²²Amo quiechcapantlalise icualancaitacahua, niyon amo quitlanise tlaixpanoca masehualme.

²³Iixpa niquintzontlamiltis icualancaitacahua huan nochi catli quicualancaitaj.

²⁴Na catli nitemachtli nijmocuitlahuis huan nijtiochihuas tlatoctzitzi, huan tlahuel miyac niquicnelis. Ica na notlapalehuil yaya elis tlahuel hueyi.

²⁵Na nijchihuas para itlanahuatilis pehuas campa hueyatl Eufrates, huan tlamis hasta campa hueyi atl catli itoca Mediterráneo.

²⁶Huan yaya nechtzajtzilis huan nechilhuis: ‘¡Ta tinoTata, ta tinoTeco Dios! Ta catli techmaquixtía huan techtlatía para amo tleno nechajsis.’

²⁷Na niquitas nopa tlanahuatijquetl quen noachtihui cone. Nijchihuas para yaya ma eli nopa tlanahuatijquetl catli más hueyi ipan nochi tlaltipactli.

²⁸Niquicnelis para nochipa huan para nochipa nijchihuilis catli cuali. Huan nopa camanal sencahuali catli nijchijtoc ihuaya, amo quema tlamis.

²⁹Na nijtequimacas se iixhui para ma tlanahuatis campa yaya tlanahuatiyaya. Itlanahuatilis huejcahuas para nochipa quen huejcahuas ilhuicactli.

³⁰Pero sintla iconehua quitlahuelcahuase noley huan amo monejnemiltise quen quiijtohua notlamachtil,

³¹o sintla quiixpanose catli niquinnahuatijtoc ma quichihuaca ipan ininnemilis huan amo quintlepanitase notlanahuatilhua,

³²huajca niquintlatzacuiltis pampa ya nopa quinextis para amo nechneltocatoque huan tlajtlacolchihuaj.

³³Pero amo nijcahuas niquinicnelis, niyon amo nijtlamiltis nopa camanali catli nijchijtoc ininhuaya.

³⁴Amo niquelcahuas catli ica nimocajtoc David huan amo nijpatlas nocamanal.

³⁵Pampa na nitlatestigojquetzqui para nijchihuilis David nochi catli nijtlajtolcahuilijtoc. Huan na niDios catli nitlatzejtzeloltic amo hueli niistlacatis.

³⁶Iixhui mosehuis huan tlanahuatis para nochipa campa ya mosehui. Itlanahuatilis huejcahuas san quen imiyaca tonali tlahuijtos tonati.