SALMOS 82:1-7

¹Toteco Dios itztoc ipan se hueyi tlasentilistli nepa ilhuicac. Huan nopona tlayolmelahua quenicatza quintlatzacuiltis nopa jueces huan quinilhuía:

²“¿Hasta quema tlamis antlacajcayahuaj quema antetlajtolsencahuaj? ¿Hasta quema tlamis anquinchicoicnelise amo cuajcualme catli fiero quichihuaj?

³Xiquintenpalehuica catli ayamo quipiyaj tetili huan catli icnotzitzi. Xiquintlajtolsencahuaca catli tlaijiyohuíaj huan catli amo tleno quipiyaj.

⁴Xiquinmaquixtica catli ayacmo quipiyaj chicahualistli huan quinpolohua catli quinmonequilía. Quena, xiquinmanahuica ininmaco nopa masehualme catli amo aqui quitlepanitaj.

⁵Amojuanti catli anquintlaijiyohuiltíaj amo tleno anquimatij huan amo tleno anquimachilíaj. Annemij ipan tzintlayohuilotl huan nochi itzinpehualtil tlaltipactli huihuipica.

⁶Quena, na nimechtocaxtijtoc ‘andioses’ huan ‘annoconehua niDios Catli Más Hueyi’,

⁷pero quema hualas miquilistli, nimantzi anmiquise pampa amojuanti san anmasehualme. Amopantis quen ipanti aqui hueli masehuali catli quipiya tequiticayotl, pampa nochi miquise.” Quej nopa quiijto Toteco.