SALMOS 78:50-53

⁵⁰Cualanqui nelchicahuac huan amo quimanahui niyon se Egipto ejquetl. San quintitlanili tlatzacuiltili huan huejhueyi cocolistli.

⁵¹Teipa Toteco quinmicti nopa achtihui ehuani ipan sesen familia tlen tlali Egipto. Quena, quinmicti catli elqui iniachtihui fuerza quema pejque quinpiyaj coneme.

⁵²Pero quinquixti imasehualhua quen elisquíaj pilborregojtzitzi, huan quinyacanqui ica yejyectzi ipan nopa huactoc tlali.

⁵³Quinyacanqui ica miyac temachili para ma amo majmahuica. Pero nopa hueyi atl quinatzonpolihuilti inincualancaitacahua.