SALMOS 78:14-69

¹⁴Ica tonaya quinyacanqui ica se mixtli para quinecahuilis, huan ica tlayohua ica se mixtli catli tlahuiyaya quen tlitl.

¹⁵Ipan huactoc tlali quitlapo nopa hueyi tetl huan quisqui miyac atl para atlique hasta aixhuique.

¹⁶¡Quena, ipan tetl quisqui miyac atl catli motlalo quen se hueyatl!

¹⁷Pero inijuanti quisenhuiquilijque amo quitlepanitaque. Huan nepa campa huactoc tlali tlajtlacolchijque ica Toteco Catli Más Hueyi.

¹⁸Pampa quiyejyecojque Toteco Dios huan quitlajtlanijque tlacualistli catli ininyolo quinequiyaya.

¹⁹Hasta cualanque ica Toteco huan quiijtojque: “¿Atlac Toteco Dios huelis techtlamacas ipan ni huactoc tlali?

²⁰Xiquitaca, Toteco Dios quitlapo nopa hueyi tetl huan quisqui miyac atl quen eltosquía se hueyatl hasta atzonpoli tlali, pero ¿atlac nojquiya hueli techmacas tlacualistli? ¿Huelis techtlamacas tiimasehualhua ica nacatl?”

²¹Huan quema TOTECO quicajqui ni tlamantli, tlahuel cualanqui. Huan ipan icualancayo quisqui tlitl ica israelitame, inijuanti catli iixhuihua Israel,

²²pampa inijuanti amo quineltocaque Toteco Dios, niyon amo motemachijque ipan ya para quipiya chicahualistli para quinmaquixtis.

²³Pero masque quej nopa quichijque, Toteco Dios quinahuati nopa mixtli huan quitlapo ilhuicactli.

²⁴Huan quichijqui ma huetzi nopa tlacualistli catli itoca maná para ma quicuaca quen quema huetzi atl. Quinmacac tlacualistli catli hualajqui tlen ilhuicac.

²⁵Masehualme quicuajque catli elqui inintlacualis itequihuajcahua Toteco. Quena, quintlamacac hasta cuali ixhuique huan hasta mocajqui nopa tlacualistli.

²⁶Ica ihueyi chicahualis quihualicac nopa ajacatl catli huala campa hualquisa tonati huan catli huala ica tlani para ma tlaajaca campa ilhuicactli.

²⁷Quichijqui ma hualaca miyaqui totome quen imiyaca tlaltejpoctli. Quena, hualajque totome quen mixtli huan quen imiyaca xali catli onca iteno hueyatl.

²⁸Huan Toteco quichijqui para nopa totome ma huetzica tlatlajco campa quichijtoyaj ininyoyoncal.

²⁹Huan nopa masehualme tlacuajque hasta ixhuique. Toteco quinmacac nacatl quen ininyolo quinequiyaya.

³⁰Pero quema sanoc tlantoyaj tlacuaj, huan hasta noja quipixtoyaj nacatl ipan inincamac,

³¹Toteco Dios motlananqui ica ihueyi cualancayo, huan quintzontlamilti nochi nopa telpocame catli más tlapejpenilme ipan tlali Israel.

³²Pero masque Toteco quinchihuili ya nopa, nopa masehualme quisenhuiquilijque tlajtlacolchijque, huan amo quineltocaque nopa huejhueyi tiochicahual nextili catli yaya quichijqui iniixpa.

³³Yeca Toteco quintlaijiyohuilti ipan nochi ininnemilis huan quintzontlamilti san ica se tlatoctzi.

³⁴Pero teipa, quema ya quintzontlamiltijtoya sequin, huajca quena, ne sequinoc quitemojque Toteco Dios. ¡Quena, nimantzi mocuepque huan quitoquilijque!

³⁵Huan quielnamijque para yaya Toteco Dios catli quinmocuitlahuiyaya para amo quinajsis catli amo cuali. Huan quielnamijque para Toteco Catli Más Hueyi san yaya inintemaquixtijca.

³⁶Pero nopa israelitame amo quitoquiliyayaj ica nochi ininyolo. ¡Amo! Quitoquiliyayaj san ica inincamac.

³⁷Pampa ininyolo eltoya huejca tlen Toteco. Huan amo quichihuayayaj catli quitlajtolcahuilijtoyaj Toteco para quichihuase.

³⁸Pero Toteco quipixqui hueyi iyolo ica inijuanti. Quintlapojpolhuiyaya inintlajtlacolhua huan amo quintzontlamiltiyaya. Miyac huelta quiquetzqui icualancayo para amo quintlatzacuiltis.

³⁹Pampa Toteco quielnamijqui para inijuanti san elque masehualme catli ininnemilis ixpolihui san ica se tlatoctzi, huan amo quema mocuepasquíaj sempa.

⁴⁰Nepa ipan huactoc tlali, tlahuel miyac huelta amo tlatlepanitaque ica Toteco Dios huan quiyolcocojque.

⁴¹Tlatoctzitzi quiyejyecojque, huan ica ya nopa quichihualtiyayaj para Toteco ma quintzontlamilti. Niyon amo quicahuilijque para Toteco ma quintiochihua, yaya catli ininDios israelitame huan catli Tlatzejtzeloltic.

⁴²Quielcajque ihueyi chicahualis huan iteicnelijcayo. Huan quielcajque quenicatza quinmanahui ininmaco inincualancaitacahua.

⁴³Quielcajque quenicatza Toteco quititlanqui tlatzacuiltili ipan tlali Tanis huan ipan tlali Egipto.

⁴⁴Quielcajque quenicatza quicuepqui estli nopa atl huan ayacmo aqui huelqui quiijic.

⁴⁵Quielcajque quenicatza quintitlanqui tlahuel miyac sayolime hasta quitemitijque nopa tlali. Quielcajque quenicatza nopa temasolime quitemitijque nopa tlali Egipto.

⁴⁶Toteco quintitlanqui ocuilime huan chapolime para ma quicuaca inintlatochui huan ininpixquilis.

⁴⁷Ica tesihuitl quintzontlamilti ininxocomecamil huan ininhigueramil.

⁴⁸Ininhuacaxhua mijque ipan potrero pampa Toteco Dios quinmajcahuili tesihuitl catli tlahuel huejhueyi. Huan ininborregojhua mijque ica tlapetlancayotl.

⁴⁹Quena, Toteco tlahuel cualanqui ica inijuanti, huan yeca quintitlanili tlacuajcualocayotl huan tlaohuijcayotl. Huan quintitlanili se pamitl tlen itequihuajcahua Toteco catli tetzontlamiltíaj.

⁵⁰Cualanqui nelchicahuac huan amo quimanahui niyon se Egipto ejquetl. San quintitlanili tlatzacuiltili huan huejhueyi cocolistli.

⁵¹Teipa Toteco quinmicti nopa achtihui ehuani ipan sesen familia tlen tlali Egipto. Quena, quinmicti catli elqui iniachtihui fuerza quema pejque quinpiyaj coneme.

⁵²Pero quinquixti imasehualhua quen elisquíaj pilborregojtzitzi, huan quinyacanqui ica yejyectzi ipan nopa huactoc tlali.

⁵³Quinyacanqui ica miyac temachili para ma amo majmahuica. Pero nopa hueyi atl quinatzonpolihuilti inincualancaitacahua.

⁵⁴Huan quinhuicac hasta campa inepa nopa tlali catli tlatzejtzeloltic. Nopa tlali catli quipiya miyac tepeme catli Toteco quintlanili para inijuanti.

⁵⁵Iniixpa quintojtocac nopa masehualme catli itztoyaj ipan nopa tlali. Teipa quitamachijqui huan quinmajmacac nopa huejhueyi familias tlen israelitame para iniaxca. Huan nopona quincajqui ma itztoca.

⁵⁶Pero masque quinchihuili ya nopa, inijuanti quisenhuiquilijque quiyejyecohuaj huan quicualancamacaj Toteco Catli Más Hueyi. Huan amo quinejque quitlepanitase icamanal.

⁵⁷Yeca mocuepque para amo calaquise ipan nopa tlali tlatencahuali huan quicamaijixnamijque san se quen inintatahua quichijque. Huan quen se cuatlamintli catli huijcoltic amo yohui xitlahuac quema quimajcahuaj, inijuanti nojquiya amo yajque xitlahuac para quichihuase ipaquilis Toteco.

⁵⁸Quicualancamacaque Toteco pampa mochijchihuilijque teteyome huan tlaixpamitl para quinhueyichihuase ininteteyohua.

⁵⁹Pero quema Toteco Dios quiitac ya ni, tlahuel cualanqui huan pejqui quincualancaita.

⁶⁰Huan quitlahuelcajqui itiopa catli eltoya ipan altepetl Silo, nopa yoyon cali campa ipan itztoya catli quichijtoya nopona ininhuaya imasehualhua.

⁶¹Huan Toteco quincahuili inincualancaitacahua ma quihuicaca icaxa catli quinpixtoya itlanahuatilhua. Elqui quen quincuilijque ininchicahualis huan ininyejyejca.

⁶²Nojquiya quintemactili imasehualhua ininmaco inincualancaitacahua para ma quinmictica ica machete, pampa yaya tlahuel cualantoya ininhuaya.

⁶³Inintelpocahua quintlatijque, huan iniichpocahua quintzontlamiltijque, niyon amo quiaxilijque para monamictise huan huicase ipan nenamictili.

⁶⁴Quintzontlamiltijque nopa totajtzitzi ica machete huan ininsihuajhua nojquiya mijque nimantzi, niyon amo quinchoquilijque ininhuehuejhua.

⁶⁵Huajca Toteco motlananqui quen quema se acajya cochi huan mehua, o quen se tetica tlacatl catli tlahuel tzajtzi chicahuac pampa ihuintitoc.

⁶⁶Huan Toteco quinichtacahui quinhuilanqui icualancaitacahua. Quena, quinhuejcamajcajqui huan quintitlanqui ipan se lugar campa quipanose pinahualistli para nochipa.

⁶⁷Pero Toteco quintlahuelcajqui nopa huejhueyi familias catli hualajqui tlen José huan Efraín.

⁶⁸San quintlapejpeni ihueyi familia Judá, huan nopa tepetl Sion catli yaya tlahuel quiicneliyaya.

⁶⁹Huan nopona quichijchijqui itiopa catli yejyectzi huan temachtli, huan catli huejcahuasquía para nochipa quen huejcahua ilhuicactli huan tlaltipactli.