SALMOS 73:5-20

⁵Amo quinajsi tlaohuijcayotl niyon tequipacholi, quen sequinoc quipiyaj.

⁶Yeca quema mohueyimatij, quiitaj para yejyectzi quen se costli catli tlachijchihuali ica piltetzitzi catli pajpatiyo. Huan quema quichihuaj catli amo cuali, quiitaj quen ininyoyo catli yejyectzi.

⁷Nopa tlaixpanoca masehualme ya quiijquisas iniixteyol pampa tlahuel motomajtoque, huan ya quipixtoque nochi catli ininyolo quinequij.

⁸Inijuanti san quihuetzquilíaj Toteco huan quintemajmatíaj imasehualhua. Mohueyimatij quema camanaltij.

⁹Fiero quitlaijilhuíaj Toteco Dios catli itztoc ipan ilhuicactli. Huan quintelchihuaj catli itztoque ipan ni tlaltipactli.

¹⁰Yeca Toteco Dios quinhualicas sempa nochi imasehualhua ipan ni inialtepe, huan quipiyase miyac atl nochi inijuanti.

¹¹Huan quiijtose: “¿Atlac Toteco quimatis tlaque pano? ¿Atlac Yaya Catli Más Hueyi quichihuilía cuenta catli pano nica?”

¹²Xiquitaca, ni masehualme catli amo tleno quineltocaj amo tleno ininpati. Quipiyaj se yejyectzi nemilistli huan tlatoctzitzi quimiyaquilíaj más inintomi.

¹³¡Amo tleno nechpalehuía para nijpiya noyolo tlapajpactli, huan san tlapic nimocuatotonía para amo nijchihuas tlajtlacoli!

¹⁴Pampa nochi se tonal nechtlatzacuiltíaj huan nechtlaijiyohuiltíaj sesen ijnaloc.

¹⁵Sintla nicamanaltitosquía quen inijuanti, huajca niquincajcayajtosquía nochi momasehualhua.

¹⁶Quema nijnejqui nijmachili para tlen itztoque cuali nopa masehualme catli quicualancaitaj Toteco, elqui tlahuel ohui para nijmachilis.

¹⁷Pero se tonal nicalajqui ipan motiopa, Toteco Dios, para nimonejnehuilis tlen nopa tlamantli, huan huajca nijmachili tlaque quinchiya.

¹⁸Tiquintlalijtoc ipan se ojtli catli tlahuel alaxtic. Quema tiquincuatopehuas, huajca nimantzi huetzise ipan se hueyi ostotl huan nopona tzontlamise.

¹⁹Quena, ica se tlatoctzi tlamis nochi ininpaquilis. Huan itztose ipan majmajtli para nochipa.

²⁰¡Nochi ininnemilis eltoc quen se temictli! Quena, quen quema se cochtoc huan isatiquisas, Toteco, quej nopa quema timotlananas huan tiquinhuejcamajcahuas.