SALMOS 72:6-20

⁶Huan nochi altepeme ipan itanahuatilis nocone ma eli cuajcualtzi huan temachti, quej nopa at cati huetzi para ma chamanica cuame, o quej nopa ajhuechti cati quixolonía nopa tali.

⁷Huan nochi masehualme cati itztoque xitahuaque huan cuajcualme, ma itztoca ica cuajcualtzi quema yaya tanahuatis. Quema yaya tanahuatis, oncas miyac tasehuilisti hasta itamiya tonali.

⁸Itanahuatilis nocone ma ajsi hasta campa pehua huan hasta campa ontami nopa hueyi at. Ma ajsi ten campa nopa hueyi at Eufrates hasta campa ontantoc taltipacti.

⁹Nochi masehualme cati itztose ipan huactoc tali mohuijtzomase iixpa, huan icualancaitacahua motancuaquetzase iixpa hasta quipipitzose taltepocti.

¹⁰Nochi nopa tanahuatiani cati itztoque itejteno nopa hueyi at cati itoca Mediterráneo, huan nopa tanahuatiani ten tali Tarsis huan nopa tanahuatiani ten tali Sabá huan Seba quihualiquilise miyac nemacti.

¹¹¡Quena, nochi tanahuatiani ten campa hueli talme quitamajmacase! ¡Huan nochi inijuanti motancuaquetzase iixpa huan quitequipanose!

¹²Yaya quinmanahuis nopa teicneltzitzi huan cati amo teno quipiyaj quema quitajtanise tapalehuili. Pampa inijuanti amo quipiyaj ajquiya quinpalehuis.

¹³Yaya quintasojtas cati amo quipiyaj chicahualisti huan cati teicneltzitzi, huan quinmanahuis.

¹⁴Quinmanahuis para amo quintaijyohuiltise huan para amo quintehuise. Pampa quiitas para ininemilis tahuel miyac ipati iixpa.

¹⁵Huan quema noja itztos nopa tanahuatijquet, quimacase miyac oro cati onca ipan tali Sabá. Huan imasehualhua quisenhuiquilijtose motatajtijtose ica Toteco huan mojmosta quitascamatise.

¹⁶Ma oncas miyac trigo ipan nochi nopa tali, huan hasta nopa cuame cati onca ipan tepeme ma temacase inintajca quej temacaj nopa cuame cati onca ipan tali Líbano. Huan ma onca miyac masehualme ipan altepeme, quej imiyaca nopa xihuime cati onca ipan cuatitamit.

¹⁷Nochi ma quihueyimatica nopa tanahuatijquet para nochipa, huan itequiticayo ma huejcahua quej huejcahuas tonati. Nochi ma quiselica tatiochihualisti por ya. Huan masehualme ipan nochi talme ma quipaquilismacaca, huan ma quiijtoca para Toteco quintiochijtoc.

¹⁸Ma tijhueyichihuaca TOTECO Dios cati toDios tiisraelitame, pampa san yaya hueli quichihua huejhueyi tamanti.

¹⁹Nochipa ma tijpaquilismacaca Toteco. ¡Nochi taltipacti ma temi ica ihueyitilis! ¡Quej nopa ma eli!

²⁰Nica tami motatajtía David, icone Isaí.