Pisalem 72:6-20

⁶Di king la gii hai gadoo be di uwa dela e doo gi hongo di gelegele, gei gii hai gadoo be nia wai o di uwa ala ma gaa too gi hongo tenua.

⁷Di tonu o nnaganoho la gii gila humalia i lodo dono madagoaa, gei di haadanga lamalia gii noho beelaa i di waalooloo o di malama dela e haga maalama ai tenua.

⁸Di hagageinga o dono henua le e tugi i di mada o di tai gaa tugi i di tai dela i golo, mai di monowai go Euphrates gaa tugi i di mada o henuailala.

⁹Digau o lodo henua gaa pala gi lala i ono mua, mo nia hagadaumee o maa gaa pala gi lala gi hongo di gelegele.

¹⁰Nia king o Spain mo nia waa henua gaa wanga gi mee nadau wanga dehuia, gei nia king o Sheba mo Seba ga gaamai nadau mee tigidaumaha gi mee.

¹¹Nia king o nia henua huogodoo gaa pala gi lala i mua o mee, mo nia henua huogodoo ga hai hegau gi mee.

¹²Idimaa, mee e haga dagaloaha digau hagaloale ala e gahigahi a mee, mo digau ala gu haadanga balua mo digau ala gu deai nadau hagamaamaa ai.

¹³Mee e manawa dumaalia ang gi digau paagege mo digau hagaloale, gei e abaaba nia mouli o digau ala gu haadanga balua.

¹⁴Mee gaa daa digaula gi daha mo nadau hai hagahuaidu mo nadau dadaaligi. Nadau mouli le e hagalabagau i dono baahi.

¹⁵Di king gi mouli waalooloo! Digau Sheba gi wanga ina gi mee nia goolo. Nia daangada gii hai dalodalo i mee i nia madagoaa huogodoo. Di haga maluagina mai baahi o God gi madalia ia, dolomeenei gaa hana hua beelaa!

¹⁶Nia laagau hai palaawaa gii logo i lodo tenua deenei. Nia hagadili ni tenua gii logo i tomo nia gonduu, gei nia huwa o tenua gi dau logo gadoo be nia laagau o Lebanon, Digau o nia waahale gi dogologowaahee gadoo be nia geinga o lodo henua.

¹⁷Di ingoo di king gi noho hua beelaa dono hagaodi ai. Ono humalia gii noho beelaa i di waalooloo o di laa dela e maahina. Nia henua huogodoo gi tangi anga gi God gi hagahumalia ina ginaadou, gii hai be dana hagahumalia di king.

¹⁸Gidaadou gi hagaamuina a Yihowah God, dela go di God o digau Israel, idimaa ma go Mee dela e hai ana mee haga goboina aanei.

¹⁹Gidaadou gi hagaamuina di madamada o dono ingoo gaa hana hua beelaa! Dono madamada gi haga honu ina henuailala hagatau! Amen! Amen!

²⁰Deenei di hagaodi o nia dalodalo a David go di tama Jesse.