Samu 72:6-20

⁶Kiŋi baa ee yuupinya apunda kulimbwanyi peyalamuli pyuope dee apunda pura pura pyao epo yuu pyuku lanyi pyambwalamuli pyuo karena.

⁷Rolaena renge doko baa kararamo gii dusipana mondo lao ando paramopa kukwa kana rao karalu karo kararamo dupwana banya wambu dupwa kapa palyuo nao petenale.

⁸Banya isingi yulu doko ipwa kota mendasa piso pao kota pete mendena suu lao dee ipwa Yuporisa lenge dokona piso pao yuu wangu dolapona kapa kapa pira.

⁹Dokopa yuu muiyanena palenge wambu dupwame baa mupwaŋa lao pongwa nao banya kingi lakandarami. Banya yanda pimwai dupwame isa yuu sinjimu dupwana yuu paro oko soo soo pirami.

¹⁰Dopa pyuo yuu Sepene range kiŋipi dee yuu ipwa kota sukusa singi dupwana kiŋipi dupwame baa bange kipungi ingyuo maiyala eparaminyipa yuu Arapia rangepe yuu Itiopia rangepe dupwana kiŋi dupwame dopako pirami.

¹¹Dopa pyuo kiŋi peparaeme baa mupwa lao mona mairaminyipa yuu muu dupwana wambu peparaeme banya yulu pyakamyuo pirami.

¹²Baame pendewa wambupi bange aeya nange wambupi dee wambu mendeme nyuo sukusa pyambwa nangepe dupwame baa kyakale larami dupwa kyawa minyara.

¹³Baame poraya nange dupwape pendewape dupwa sakame kumuo karo dee bange yano piramo kararami dupwa kyawa minyuo karenge.

¹⁴Nakama banya mona nyingi bange angi dopale ingyarasa dokona nakama pipya pyalana pingi wambu dupwa keta nenge rekya lao nyingi.

¹⁵Kiŋi baa karo yaku nao kumunya. Baa yuu Arapia range wambumi kana golo maiyuo karena. Banya lao ateŋa doko lapa lapa pyuo sakaminya. Anatumi kalya pyuo nembenge renge doko baa keta palipa palipa pyuo pena.

¹⁶Yuu dokona nenge witi jingipi kakana pyakaminya. Yuu kyauli dupwa ee nengepeme pana naramopa yuu Lepanone dokona nenge kakana pipyamo nelyaminyi dopaleko inginya. Yuu taone andake dupwanawambu wai kiso simbunyi pyale laramopa yangi kuku alemakai pokwalipi ingyuo pena.

¹⁷Banya kingi doko kame see nao suu pyale pyale karena. Banya karenge arome pii doko neta rao karalu karenge dopale ingyuo pena. Yuu muu ree lao baa lakandenale. Wambu peparaeme kiŋidoko rae maiyuo karapyali lao Anatumi nakamba elyape keta pisinya lao pirami.

¹⁸Isaraele wambunya Kamongo Anatu dokona kingi doko iki lakando palena. Baame yeelyo yulu elyape ingyuo dapwa pilyamo.

¹⁹Banya kingi neta renge ingyuo karamo doko lakando karalu kararaminyipa banya neta renge yulu dokome yuu pinjingi dolapona kapa kapa pinyale.

²⁰Dakena epo akali Jesena ikinyingi Dapitimi ateŋa pii lao epo lumwa piya.