SALMOS 51:6-19

⁶Ta tijnequi se masehuali ma mitztlepanita ipan iyolo; tijnequi ma tijchihuaca san catli melahuac. Techchihua na ma nijmati motlalnamiquilis hasta campa más tlatzintla ipan noyoltipa.

⁷Xiquijtzelo nopani nopa estli catli tetlapajpacchihua, huan quej nopa nimocahuas nitlapajpactic. Quena, techpajpaca, huan nimocahuas onpano nichipahuac moixpa.

⁸Huan teipa quema ya techtlatzacuiltijtos, xijchihuas para sempa ma niyolpaqui. Huan elis quen sempa moyancuilise noomiyohua catli tijtlatixchijtoc.

⁹Amo xijsenhuiquili xijtlachilijto notlajtlacolhua. Xiquixpolo tlen moixtla nochi catli amo cuali nijchijtoc.

¹⁰NoTeco Dios, xijchihua para noyolo ma eli yancuic huan tlapajpactic. Xijchihua para ma nimonejnehuilis san ipan tlamantli catli cuali, huan para ma nijnequis nijchihuas san catli xitlahuac.

¹¹Amo techiyocacahua tlen ta moixtla, niyon amo techquixtili moTonaltzi catli tlatzejtzeloltic.

¹²Xijchihua para sempa ma nijmati nopa paquilistli catli nijpixqui pampa ta techmaquixti. Ica moTonaltzi techchihua para nochipa ma nijnequis nimitztlepanitas.

¹³Huan huajca niquinnextilis moojhui sequinoc tlajtlacolchihuani catli tlaixpanotoque quen na. Huan tlajtlacolchihuani moyolcuepase huan hualase campa ta.

¹⁴Toteco Dios, ta catli techmaquixtía, techmanahui tlen ni tlaeticayotl catli nijpiya pampa nitemicti. Huan huajca nihuicas tiohuicatl para niteyolmelahuas para ta tijchihua catli senquistoc xitlahuac.

¹⁵Toteco, xijchihua para sempa ma nihuica, huan nitepohuilis nochi catli techchihuilijtoc huan na nimitzpaquilismacas.

¹⁶Pampa ta amo tijnequi ma nimitzmacas tlacajcahualistli para techtlapojpolhuis. Sintla quej nopa elisquía, huajca ica paquilistli nijchihuasquía. Pero amo mitzpactía ma niquintlali tlapiyalme ipan tlaixpamitl para niquintlatis moixpa, quen se tlacajcahualistli tlatlatili.

¹⁷Ta tijnequi ma nimoyolcoco, huan ma nimotequipacho ica nochi catli amo cuali nijchijtoc, huan ma nimoyolcuepa. Quena, nopa masehuali catli moechcapantlalía huan moyolcuepa, ta tinoTeco Dios, temachtli tijtlacaquilía huan amo tijhuejcamajcahua.

¹⁸Huan, Toteco, amo xijtlatzacuilti altepetl Sion por notlajtlacolhua. Ta xiquinpalehui momasehualhua huan xijmocuitlahui moaltepe Jerusalén.

¹⁹Huan quema noyolo ya eltos xitlahuac moixpa, tipaquis ica catli cuali nijchihuas. Huan tijselis nochi tlacajcahualistli quema niquinhuicas torojme para niquinmictis, huan nimitzmacas ipan motlaixpa.