SALMOS 51:2-14

²¡Techpajpaca huan techquixtili ni notajtacol para sempa nielis nitapajpactic!

³Pampa ya nimomacac cuenta para nelía nitajtacolchijtoc moixpa. Huan san ya nopa nimosenilhuijtoc nochipa.

⁴San ica ta nitajtacolchijtoc. Quena, san ica ta nijchijtoc ni hueyi tajtacoli cati ta amo tijnequi tiquitas. Ta tiquitac nochi cati nijchijqui huan xitahuac techtajtolsencajtoc.

⁵Pero na ipa nitajtacolchijquet hasta quema nitacatqui. Quena, ipa nitajtacolchijca masehuali hasta quema pejqui nimoscaltía iijtico nonana.

⁶Ta tijnequi se masehuali ma mitztepanita ipan iyolo; tijnequi ma tijchihuaca san cati melahuac. Techchihua na ma nijmati motalnamiquilis hasta campa más tatzinta ipan noyolo.

⁷Xiquijtzelo nopani nopa esti cati tetapajpacchihua, huan quej nopa nimocahuas nitapajpactic. Quena, techpajpaca, huan nimocahuas tahuel nichipahuac moixpa.

⁸Huan teipa quema ya techtatzacuiltijtos, xijchihuas para sempa ma niyolpaqui. Huan elis quej sempa moyancuilise noomiyohua cati tijtatixchijtoc.

⁹Amo xijsenhuiquili xijtachilijto notajtacolhua. Xiquixpolo ten moixpa nochi cati amo cuali nijchijtoc.

¹⁰NoTeco Dios, xijchihua para noyolo ma eli yancuic huan tapajpactic. Xijchihua para ma nimoyolilhui san ipan tamanti cati cuali, huan ma nijnequi nijchihuas san cati xitahuac.

¹¹Amo techiyocacahua ten ta moixpa, yon amo techquixtili moTonaltzi cati tatzejtzeloltic.

¹²Xijchihua para sempa ma nijmati nopa paquilisti cati nijpixqui pampa ta techmaquixti. Ica moTonaltzi techchihua para nochipa ma nijnequi nimitztepanitas.

¹³Huan huajca niquinnextilis moojhui sequinoc tajtacolchihuani cati taixpanotoque quej na. Huan tajtacolchihuani moyolcuepase huan hualase campa ta.

¹⁴Toteco Dios, ta cati techmaquixtía, techmanahui ten ni taeticayot cati nijpiya pampa nitemicti. Huan quej nopa nihuicas tiohuicat para niteyolmelahuas para ta tijchihua cati senquisa xitahuac.