Yontu 51:2-14

²Tə tɑɑ kɛ́ Tɑfiiti kɛɛsəɣɩ wɑɑtʋ wei ɩ nɑ Ulii ɑlʋ Pɑsepɑ pɑ lɑpɑ Wɑsɑŋkɑlətʋ, nɑ Ɩsɔ kʋyɔɣɔtʋtʋ tɛləsʋlʋ Nɑtɑŋ polo nɑ ɩ́ kɑlənɑ-ɩ tɔ pə tɔm. Yontu ntəɣəlɛ sɩ:

³Hɑɩ, Ɩsɔ, nyənɩ mɑ pətɔɔtəlɛ kɛ nyɑ́ kʋpɑntʋ tɔɔ. Hɩɩsɩ mɑ kɑwɑlɑɣɑ kɛ nyɑ́ suulu sɔsɔ tɔɔ.

⁴Nyɑɑlɩ mɑ ɩsɑɣɑtʋ təkpɑtɑkpɑtɑ, hɩɩsɩ mɑ təpəntəlɛ nɑ mɑ́ wɛɛ tənɑŋŋ.

⁵Mpi tɔ, mɑ nyəmɑ mɑ kɑwɑlɑɣɑ tɔɔ, mɑ nɑɑkɩ mɑ təpəntəlɛ kɛ tɑm.

⁶Nyɑ́ tike kɛ mɑ pəntənɑɑ, mpi tɔ, mɑ lɑpɑ mpi pə fɛɩ-ŋ teu tɔ. N wɛnɑ tɑmpɑnɑ kɛ timpi n hʋʋkənɑ-m tɔɣɔ, n tɑ wɑkəlɩ tiili.

⁷Mɑ kɛ́ kɑwɑlɑɣɑ tʋ kɛ hɑtoo kʋyɑŋku mɑ too hɑɣɑ-m tɔɣɔ. Ɩsɑɣɑtʋ tɑɑ kɛ́ ɩ lʋlɑ-m.

⁸Amɑ n cɑɑ kɛ́ sɩ tɑmpɑnɑ ɩ́ wɛɛ mɑ lotu tɑɑ. Tʋ ləmɑɣɑsɛɛ kɛ hɑtoo mɑ tɑɑ.

⁹Hɩɩsɩ mɑ ɩsɑɣɑtʋ nɑ mɑ́ wɛɛ tənɑŋŋ. Nyɑɑlɩ-m nɑ mɑ́ kəlɩ kponkpo mʋlʋm kɛ hʋlʋmʋɣʋ.

¹⁰Kɛɛsɩ-m lɑŋhʋlʋmlɛ sɔsɔɔlɛ tɔm, ɩlɛnɑ mɑ wei mɑ lɑŋlɛ kɑ wɑkəlɑɑ tətɔɣɔtɔɣɔ tɔ tə́ hʋləmɩ təloiloi.

¹¹Kɛɛsɩ nyɑ́ ɩsɛ, tɑɑ nyənɩ mɑ ɩsɑɣɑtʋ, hɩɩsɩ mɑ təwɑkəllɛnɑɑ.

¹²Hɑɩ, Ɩsɔ tʋ mɑ tɑɑ kɛ́ ləmɑɣɑsəlɛ nɑŋŋ nyəntɛ. Lɑɣɑsɩ-m kʋfɑlʋ nɑ mɑ́ nɩɩkənɑ-ŋ nɑ lotu kʋlʋmtʋ.

¹³Tɑɑ lɔ-m nɑ mɑ́ hɑtələnɑ-ŋ, yɑɑ ń ləsɩ nyɑ́ Feesuɣu Nɑŋŋtʋ kɛ mɑ tɑɑ.

¹⁴Mələnɑ-m mɑ nyʋɣʋ yɑpʋ lɑŋhʋlʋmlɛ, tʋ mɑ tɑɑ kɛ́ nɩɩnɑʋ ləmɑɣɑsəlɛ.